Kunsill Ambjent, 04/03/2016, 4 ta' Marzu 2016

Riżultati ewlenin

F'Pariġi 195 pajjiż adottaw il-ftehim storiku dwar il-klima, bidla ta' vera biex tiġi limitata ż-żieda fit-temperatura u biex jiġu evitati r-riskji maħluqa mill-bidla fil-klima. Issa l-istati membri ser jagħmluha realtà billi jieħdu azzjonijiet konkreti fil-livell tal-UE u dak nazzjonali. Sharon Dijksma, il-Ministru Netherlandiż għall-Ambjent u l-President tal-Kunsill

Ftehim ta' Pariġi dwar it-tibdil fil-klima

Il-ministri ddiskutew s-segwitu għall-Ftehim ta' Pariġi dwar it-tibdil fil-klima u l-implikazzjonijiet tiegħu għall-politika tal-UE dwar il-klima.  Huma ssottolinjaw il-ħtieġa li l-momentum ta' Pariġi jibqa' ħaj u li issa l-enfasi tkun fuq l-implimentazzjoni tal-impenji, inklużi dawk stabbiliti fil-wegħdiet nazzjonali. 

L-implimentazzjoni f'waqtha tal-qafas tal-UE għall-klima u l-enerġija għall-2030 tqieset bħala sinjal importanti tal-impenn tal-UE lejn l-objettivi tal-Ftehim ta' Pariġi. Il-ministri enfasizzaw ukoll ir-rilevanza tar-ratifika rapida tal-ftehim. 

Ser tintbagħat sintesi ta' dan id-dibattitu lill-President tal-Kunsill Ewropew.

Il-Ministru Netherlandiż għall-Ambjent, Sharon Dijksma, il-President attwali tal-Kunsill Ambjent, stqarret: "F'Pariġi 195 pajjiż adottaw il-ftehim storiku dwar il-klima, bidla ta' vera biex tiġi limitata ż-żieda fit-temperatura u biex jiġu evitati r-riskji maħluqa mill-bidla fil-klima. Issa l-istati membri ser jagħmluha realtà billi jieħdu azzjonijiet konkreti fil-livell tal-UE u dak nazzjonali."

Ekonomija ċirkolari 

Il-Kunsill kellu dibattitu dwar il-pjan ta' azzjoni tal-UE għall-ekonomija ċirkolari li huwa parti minn pakkett li jinkludi wkoll erba' proposti leġislattivi dwar l-iskart. L-għan tal-pakkett huwa li jistimula t-transizzjoni tal-Ewropa lejn ekonomija ċirkolari li tkun aktar sostenibbli u kompetittiva mill-mudell attwali. Huwa jintroduċi miżuri li jnaqqsu l-użu tar-riżorsi, inaqqsu l-iskart u jagħtu spinta lir-riċiklaġġ.

Il-ministri esprimew l-appoġġ tagħhom għall-pjan ta' azzjoni u identifikaw azzjonijiet ta' prijorità minn perspettiva ambjentali. Huma ddiskutew ukoll miżuri komplimentari li għandhom jittieħdu fil-livell nazzjonali u enfasizzaw il-ħtieġa li l-pjan ta' azzjoni jintuża bl-aktar mod effettiv u li l-progress ikun issorveljat. Id-dibattitu tagħhom u d-dibattitu li seħħ aktar kmieni din il-ġimgħa fil-Kunsill Kompetittività ser jikkontribwixxu għal sett ta' konklużjonijiet li hu ppjanat li jiġi adottat f'Ġunju.

"L-UE u l-gvernijiet għandhom jaħdmu mill-qrib flimkien man-negozji u l-NGOs sabiex l-ekonomija ċirkolari tiffunzjona. Illum il-ministri tal-UE iddiskutew b'suċċess kif aħna nistgħu inrawmu d-domanda għal materjali riċiklati u l-ħtieġa ta' leġislazzjoni koerenti biex tiġi promossa l-innovazzjoni", qalet il-Ministru Dijksma.

Interferenti endokrinali 

Il-Kunsill adotta dikjarazzjoni li tikkonċerna deċiżjoni reċenti dwar l-interferenti endokrinali (sustanzi kimiċi li jistgħu jfixklu s-sistema ormonali).  Il-Qorti Ġenerali kkunsidrat li l-Kummissjoni naqset milli tispeċifika, fi żmien adatt, kriterji xjentifiċi għal dawn is-sustanzi.

Id-dikjarazzjoni tenfasizza l-importanza ta' azzjoni urġenti mill-Kummissjoni biex tkun konformi mas-sentenza u l-obbligi legali tagħha, sabiex jiġi evitat aktar dewmien fl-iżvilupp ta' kriterji bbażati fuq ix-xjenza għall-interferenti endokrinali.

Streaming dirett, filmati u ritratti

• Streaming dirett ta’ sessjonijiet pubbliċi u okkażjonijiet għall-istampa
• Ritratti u filmati mil-laqgħa, Kunsill Ambjent, 4 ta' Marzu 2016