An Chomhairle Gnóthaí Eachtracha, 15/08/2014, 15 Lúnasa 2014

Áitíonn AE ar an Rúis stad a chur leis an gcogaíocht

Ag an gcruinniú a bhí acu an 15 Lúnasa, d'áitigh airí eachtracha AE ar an Rúis a fórsaí a tharraingt siar ón teorainn leis an Úcráin agus stad a chur leis an gcogaíocht.

Tar éis don Rúis conbhua a chur chun na hÚcráine, thug airí AE foláireamh don Rúis gan idirghabháil mhíleata a dhéanamh san Úcráin, ar chúinse ar bith, cúinsí daonnúla san áireamh. Chuir siad i bhfáth nach mór aon chúnamh a chur ar fáil agus an aird chuí á tabhairt ar phrionsabail dhaonnúla an neamhspleáchais, na neodrachta agus na neamhchlaontachta agus trí chomhaontú le húdaráis na hÚcráine.  

D'áitigh siad ar an Rúis freisin stad a chur leis an gcogaíocht ar an teorainn, a fórsaí a tharraingt siar ón teorainn leis an Úcráin agus stop a chur le sreabhadh arm, comhairleoirí míleata agus foirne armtha isteach i réigiún na coinbhleachta. Dúirt siad go raibh gá leis an méid sin leis an gcoinbhleacht a cheansú agus le feabhas a chur ar chás an daonra sibhialta. 

D'iarr an Chomhairle ar an Rúis, ar an Úcráin, ar na Stáit Aontaithe agus ar an Eagraíocht um Shlándáil agus Comhar san Eoraip (ESCE) cabhrú leis an Aontas chun teacht ar réiteach polaitiúil, inbhuanaithe maidir leis an ngéarchéim.

Agus imní orthu faoin gcás daonnúil san Úcráin, d'iarr airí AE go rachfaí i gcomhar lena chéile chun go bhféadfaí faoiseamh daonnúil a chur ar fáil do shibhialtaigh atá i ngátar agus chun go gcuirfear ar chumas na ndaoine bogadh amach as an gceantar ina bhfuil an choinbhleacht go dtí limistéir níos sábháilte. 

Dúirt na hairí go ndéanfadh AE measúnú ar an tionchar a bheadh ag na bearta a d'fhógair an Rúis le déanaí in aghaidh allmhairiú táirgí agraibhia ó AE. Tionólfar cruinniú urghnách de chuid na Comhairle Talmhaíochta agus Iascaigh ag tús mhí Mheán Fómhair le measúnú a dhéanamh ar an tionchar sin agus ar an bhfreagairt iomchuí.

Chuir an Chomhairle i bhfáth nár cheart go mbainfeadh tíortha eile tairbhe as an toirmisc a chuir an Rúis ar tháirgeoirí Eorpacha, agus chuir siad in iúl go mbeadh gá leis sin lena áirithiú go mbeadh an pobal idirnáisiúnta aontaithe agus le seasamh leis an dlí idirnáisiúnta.     

Foraithníodh an cosc ón Rúis mar fhreagairt ar bhearta srianta ó AE a ceapadh roimhe sin, a bhain go díreach leis an sárú ar an dlí idirnáisiúnta a rinneadh le nascghabháil neamhdhleathach na Crimé agus leis an díchobhsú a rinne an Rúis ar an Úcráin. Dúirt an Chomhairle go bhfuil na forais maidir leis na bearta sin ón Aontas a fhorchur fós bailí. 

Dúirt na hAirí freisin go bhfuil an tAontas ag coinneáil súil ghéar ar an gcás mar atá ar an láthair agus go raibh sé réidh le céimeanna breise a mheas.