An Chomhairle Gnóthaí Eachtracha, 22/07/2014, 22 Iúil 2014

Téann an Chomhairle i mbun gníomhaíochta i ndáil le turnamh eitleán MH17

Ag an gCruinniú den Chomhairle Gnóthaí Eachtracha, phléigh an Chomhairle an staid san Úcráin tar éis thurnamh eitleán MH17 mar aon le smachtbhannaí breise i gcoinne na Rúise. Pléadh Gaza agus an Iaráic freisin.

Is méala mór ag AE agus a chuid Ballstát, agus tá suaitheadh nach beag orthu, gur tugadh anuas eitilt MH 17 de chuid Malaysian Airlines in Donetsk, an Úcráin agus gur tugadh anbhás chomh tubaisteach sin ar an oiread sin daoine neamhchiontach.

Chuir airí an Aontais Eorpaigh a gcomhbhrón ó chroí in iúl do na daoine agus do na rialtais i ngach tír lena mbaineann agus do theaghlaigh na n-íobartach ach go háirithe.

Cháin siad go géar na gníomhaíochtaí mídhleathacha atá á ndéanamh ag míleataigh armtha i gcónaí in Oirthear na hÚcráine agus breathnófar tuilleadh ar na grúpaí seo a ainmniú mar eagraíochtaí sceimhlitheoireachta.

Áitíonn siad ar Chónaidhm na Rúise a tionchar ar na grúpaí seo a imirt go gníomhach chun rochtain ar an suíomh tubaiste a ráthú agus comhoibriú le breathnóirí ESCE agus le saineolaithe idirnáisiúnta.

Imscrúdú iomlán idirnáisiúnta neamhspleách agus trédhearcach i ndáil le turnamh eitleán MH17

D'iarr an Chomhairle ar na scarúnaithe rochtain iomlán, láithreach, shlán agus shábháilte a áirithiú ar an suíomh tubaiste. Taobhaíonn AE leis an ngairm ó CSNA agus ón Eagraíocht um Shlándáil agus Comhoibriú san Eoraip (ESCE) le haghaidh imscrúdú idirnáisiúnta neamhspleáchagus trédhearcach.

Ní mór na daoine atá freagrach go díreach nó go hindíreach as turnamh an eitleáin a thabhairt chun cuntais agus chun dlí.

Smachtbhannaí

Molann an Chomhairle go gcuirfear dlús le hullmhú na mbeart spriocdhírithe a comhaontaíodh ag an gcruinniú speisialta a bhí ag an gComhairle Eorpach an 16 Iúil. Ba cheart liosta eintiteas agus daoine a thagann faoi na critéir fheabhsaithe a ghlac an Chomhairle an 18 Iúil a chur ar bun láithreach.

Maidir le bearta spriocdhírithe breise sonracha, d'iarr an Chomhairle ar an gCoimisiún agus ar SEGS a réamhobair a chur i gcrích agus tograí a chur i láthair, an 24 Iúil, maidir le gníomhú, lena n-áirítear maidir le rochtain ar mhargaí caipitil, cosaint, earraí dé-úsáide, agus teicneolaíochtaí íogaire, lena n-áirítear in earnáil an fhuinnimh.

Plean síochána agus sos comhraic

Chuir an Chomhairle i dtreis go dtacaíonn sí le socrú síochánta i leith na géarchéime san Úcráin. D'iarr airí an Aontais Eorpaigh tacaíocht do ESCE agus don Ghrúpa Teagmhála Tríthaobhach maidir lena n-iarrachtaí chun dálaí ar mhaithe le sos comhraic inbhuanaithe a chruthú.

D'áitigh siad ar an Rúis stop a chur leis an sruth arm, trealamh agus míliteach trasna na teorann agus a cuid trúpaí breise a aistarraingt ó limistéar na teorann.

Na cinntí is déanaí maidir leis an Úcráin

18 Iúil - an ghéarchéim san Úcráin: Cuireann AE le raon feidhme na smachtbhannaí

An 18 Iúil, leathnaigh an Chomhairle an bunús dlí do bhearta sriantacha an Aontais Eorpaigh ionas gur féidir díriú isteach ar eintitis a thacaíonn, ó thaobh ábhair nó ó thaobh airgid de, le gníomhaíochtaí i gcoinne na hÚcráine.

16 Iúil - cruinniú speisialta na Comhairle Eorpaí

Ba chúis aiféala do cheannairí an Aontais Eorpaigh nár ghlac an Rúis agus na scarúnaithe na céimeanna a iarradh mar a leagadh amach iad sna conclúidí ón gComhairle Eorpach an 27 Meitheamh. Chomhaontaigh siad sraith nua de 6 bheart sriantacha a dhíriú ar an Rúis.

26 Meitheamh - Conclúidí ón gComhairle Eorpach

Leag ceannairí an Aontais Eorpaigh síos 4 chéim shonracha a ghlacfaidh an Rúis agus na scarúnaithe chun an ghéarchéim a mhaolú.

Ábhair eile ar an gclár oibre

Próiseas síochána an Mheánoirthir

Is ábhar mór imní é don Chomhairle méadú leanúnach an fhoréigin in Gaza agus éilíonn sí go gcuirfear stop leis láithreach. Ba dhíol sásaimh di na hiarrachtaí atá á ndéanamh ag na comhpháirtithe réigiúnacha sos comhraic a bhunú agus d'iarr sí ar Hamas teacht ar chomhaontú faoin sos comhraic sin.

Le linn an lóin, phléigh airí na himeachtaí is déanaí san Iaráic. D'athdhearbhaigh siad gur cúis mhór imní dóibh go raibh cúrsaí slándála ag dul in olcas in aghaidh an lae, agus cháin siad go mór na hionsaithe a rinne Stát Ioslamach na hIaráice agus an Leiveaint (ISIL).

Cruinniú airí Chomhpháirtíocht an Oirthir

An 22 Iúil, agus an Chomhairle Gnóthaí Eachtracha ar siúl, d'fhreastail airí an Aontais Eorpaigh ar an 5ú cruinniú bliantúil Chomhpháirtíocht an Oirthir. Díríodh sa phlé sin ar chur chun feidhme Comhaontuithe Comhlachais agus Saorthrádála, chomh maith lena riachtanaí atá difreáil níos fearr i gcaidreamh déthaobhach. Phléigh na hairí freisin ullmhúchán chruinniú mullaigh Chomhpháirtíocht an Oirthir a thionólfar in Riga i mBealtaine 2015.

Ghlac an Chomhairle freisin roinnt mír gan gá le plé:

• conclúidí maidir le Poblacht na hAfraice Láir (FR)
• conclúidí maidir le Réigiún na Mór-Lochanna
• síneadh a chur le EUCAP Nestor
• síneadh a chur le misean CCS an Aontais Eorpaigh sa Nígir
• smachtbhannaí AE níos láidre i gcoinne réimeas na Siria
• misean a chur ar bun chun comhairle a thabhairt maidir le hathchóiriú in earnáil na slándála sibhialta san Úcráin