An Chomhairle um Ghnóthaí Ginearálta, 20/06/2017, 20 Meitheamh 2017

Na príomhthorthaí

Athbhreithniú meántéarma ar chreat buiséadach 2014-2020 an Aontais Eorpaigh

Ghlac an Chomhairle creat buiséadach athbhreithnithe an Aontais don tréimhse 2014-2020 chun freastal ar thosaíochtaí nua. Tá níos mó acmhainní á gcur ar fáil ann chun cuidiú le poist agus fás a threisiú agus chun aghaidh a thabhairt ar ghéarchéim na himirce. Tá neart á chur aige freisin le cumas an Aontais freagairt d’imeachtaí gan choinne.

“Le cinneadh an lae inniu, déantar creat buiséadach an Aontais a choigeartú lena thabhairt i gcomhréir leis na dúshláin atá os ár gcomhair amach. Ciallaíonn sin go mbeidh éifeacht níos mó ná riamh ag buiséad an Aontais mar ionstraim chun fás a neartú, poist a chruthú agus dul i ngleic le géarchéim na himirce. Fágann sin gur féidir leis an Aontas freagairt níos tapúla agus na cinntí is gá a ghlacadh tráth a mbeidh dúshláin nua os a chomhair amach.”

An Dr Helena Dalli, Aire Gnóthaí Eorpacha agus Comhionannais Mhálta agus Uachtarán na Comhairle

• Athbhreithniú déanta ag an Aontas Eorpach ar an gcreat buiséadach do 2014-2020 chun freastal ar thosaíochtaí nua

Comhairle Eorpach mhí an Mheithimh

Chuir an Chomhairle bailchríoch ar na hullmhúcháin do chruinniú na Comhairle Eorpaí ar an 22-23 Meitheamh le plé ar dhréachtchonclúidí lena gcumhdaítear na míreanna seo a leanas:

• an imirce - áit a ndéanfaidh an Chomhairle Eorpach na forbairtí is déanaí a mheas, le béim ar leith ar bhealach na Meánmhara Láir
• slándáil agus cosaint - áit a mbreithneoidh na ceannairí an dul chun cinn atá déanta agus a gcuirfidh siad treoir ar fáil le haghaidh tuilleadh oibre
• poist, fás agus iomaíochas - áit a ndéanfaidh an Chomhairle Eorpach athbhreithniú ar na hiarrachtaí i dtaca leis an margadh aonair a dhoimhniú agus a ndéanfaidh sí tiomantas láidir an Aontais don tsaorthrádáil chóir a athdhearbhú
• caidreamh seachtrach - áit a dtabharfar miontuairisc don Chomhairle Eorpach faoi roinnt cruinnithe ardleibhéil a bhí ann le déanaí
• Comhaontú Pháras maidir leis an athrú aeráide - áit a ndéanfaidh ceannairí a dtiomantas a athdhearbhú ina leith
• an Eoraip dhigiteach - áit a n-iarrfaidh an Chomhairle Eorpach go mbogfar ó chur chuige earnálach go cur chuige iomlánaíoch

“Cumhdófar réimse leathan saincheisteanna sa Chomhairle Eorpach. Is é is aidhm fhoriomlán di an Eoraip a neartú agus a cuid saoránach a chosaint. Is é atá i gceist leis sin bheith chun tosaigh maidir leis na nithe seo: dul i ngleic leis an athrú aeráide, teorainneacha na hEorpa a chosaint, an sceimhlitheoireacht a chomhrac, beartas stóinse trádála a shaothrú, an comhar i dtaca leis an tslándáil agus leis an gcosaint a neartú, agus cló a chur ar a todhchaí féin mar ghníomhaí a fheidhmeoidh chun leasa an domhain. Tá mé bródúil as dea-theist Mhálta i dtaca le cur leis an gclár oibre dearfach seo le linn na sé mhí a chaith an tír sin ag stiúradh na Comhairle.”

An Dr Helena Dalli, Aire Gnóthaí Eorpacha agus Comhionannais Mhálta agus Uachtarán na Comhairle

Tosaíochtaí don bhliain 2018

Bhí a céad phlé ag an gComhairle maidir leis na tosaíochtaí reachtacha don bhliain 2018. Chuir na hairí i bhfios a thábhachtaí atá sé díriú ar na saincheisteanna sin a bheadh ina gcabhair i dtaca leis an Eoraip a neartú agus a cuid saoránach a chosaint. Cuirfear plé na Comhairle san áireamh agus beidh se ina chuidiú agus a chlár oibre don bhliain 2018 á ullmhú ag an gCoimisiún.

“Tá go leor dúshlán os ár gcomhair ach a bhuí don phlé a bhí inniu againn, táimid in ann díriú ar na tionscnaimh agus ar na gníomhaíochtaí sin lena neartófar cumas na hEorpa dul i ngleic leis na dúshláin sin sa mheántéarma”

An Dr Helena Dalli, Aire Gnóthaí Eorpacha agus Comhionannais Mhálta agus Uachtarán na Comhairle 

Clár na Comhairle do na 18 mí seo romhainn

D’fhormheas an Chomhairle a clár oibre do na 18 mí seo romhainn, ón 1 Iúil 2017 go dtí an 31 Nollaig 2018. Le linn na tréimhse sin, beidh cathaoirleacht na Comhairle ag uachtaránachtaí rothlacha sé mhí na hEastóine, na Bulgáire agus na hOstaire, faoi seach. Tá sé mar aidhm leis an gclár oibre dul i ngleic le dúshláin a bhí ann le déanaí, muinín as an Aontas Eorpach a neartú agus an tAontas a thabhairt níos gaire dá shaoránaigh, agus saol na ndaoine agus saol lucht gnó a shimpliú, trí thorthaí nithiúla a bhaint amach. Aithnítear ann na cúig thosaíocht seo a leanas:

• Poist, fás agus iomaíochas
• Cosaint na Saoránach
• Aontas fuinnimh agus beartas ceannródaíoch aeráide
• Saoirse, slándáil agus ceartas
• An tAontas mar ghníomhaí láidir ar ardán an domhain

• Clár 18 mí na Comhairle, ón 1 Iúil 2017 go dtí an 31 Nollaig 2018