An Chomhairle Ceartais agus Gnóthaí Baile, 07-08/03/2019, 7-8 Márta 2019

Na príomhthorthaí

Gnóthaí baile, Déardaoin an 7 Márta

An imirce

Rinne na hairí athbhreithniú ar sheasamh an Aontais ó thaobh a chomhair le tíortha na hAfraice Thuaidh maidir leis an imirce, agus d'fhéach siad ar cá háit is féidir tuilleadh cúnaimh a sholáthar.

Is féidir leis an Aontas tuilleadh a dhéanamh chun cuidiú leis na tíortha sin trí fheabhas a chur ar a n-acmhainneacht chun imirce a bhainistiú, lena n-áirítear rialú teorann, cuardach agus tarrtháil ar muir, glacadh agus cur chun feidhme na reachtaíochta tearmainn agus imirce, athimeascadh, fillteacha agus athligean isteach.

Leanamar inniu d'obair a dhéanamh ar ár gcur chuige cuimsitheach maidir leis an imirce. Tá an-dul chun cinn déanta againn ón ngéarchéim a bhí ann in 2015, le laghdú 90% ar líon na n-imirceach a tháinig isteach. Mar sin féin, ní fhéadfaimid na maidí a ligean le sruth. Is tosaíocht thábhachtach leanúnach é tacaíocht a thabhairt do thíortha na hAfraice Thuaidh ionas go mbeidh acmhainní leordhóthanacha acu chun déileáil leis na dúshláin imirce atá os a gcomhair. Carmen Daniela Dan, Aire Gnóthaí Baile na Rómáine

Chuir an Uachtaránacht na hairí ar an eolas faoin dul chun cinn a rinneadh sa chaibidlíocht le Parlaimint na hEorpa i ndáil leis an rialachán maidir leis an nGarda Teorann agus Cósta Eorpach, mar aon le staid na himeartha i ndáil le hathchóiriú tearmainn.

• Beartas imirce an Aontais (eolas cúlra)

Freagairt an Aontais Eorpaigh ar an sceimhlitheoireacht

Phléigh na hairí staid na himeartha agus an bealach chun cinn i dtaca le freagairt an Aontais ar an sceimhlitheoireacht. Dhírigh siad ar bhearnaí praiticiúla agus reachtacha a shainaithint ar gá aghaidh a thabhairt orthu, mar aon leis na réimsí ba cheart a bheith mar thosaíocht. Chuir siad béim ar a thábhachtaí is atá sé na bearta a glacadh cheana a chur chun feidhme.

Ar bhonn na díospóireachta sin, leanfar den phróiseas de mhachnamh a dhéanamh ar an mbealach chun cinn ar an leibhéal teicniúil.

• Freagairt ar bhagairt na sceimhlitheoireachta agus ar na hionsaithe sceimhlitheoireachta a tharla san Eoraip le gairid (eolas cúlra)

An Sásra um Chosaint Shibhialta

Ghlac an Chomhairle cinneadh inniu an Sásra Aontais um Chosaint Shibhialta a leasú. Foráiltear leis na rialacha nua do stór breise acmhainní a bhunú, dá nglaoitear rescEU, chun cúnamh a chur ar fáil i gcásanna nach leordhóthanach an acmhainneacht atá ann cheana féin. Cuirfear feabhas freisin ar an gcosc ar riosca agus ar an gcomhroinnt faisnéise.

• An chosaint shibhialta: Rialacha nua glactha ag an gComhairle chun tacaíocht i gcás tubaiste a neartú (preaseisiúint, 07/03/2019)

Ceartas, 8 Márta

R-fhianaise

Chomhaontaigh an Chomhairle a seasamh i ndáil leis an treoir maidir le hionadaithe dlíthiúla a cheapadh d'fhonn fianaise a bhailiú in imeachtaí coiriúla. Tá an treoir seo mar chuid de phacáiste a dhíríonn ar rochtain trasteorann ar r-fhianaise a fheabhsú trí chreat dlíthiúil a chruthú ionas gur féidir orduithe breithiúnacha a sheoladh go díreach chuig na soláthraithe seirbhíse atá ag oibriú san Aontas.

Phléigh an Chomhairle freisin na sainorduithe caibidlíochta don dara prótacal breise atá i gceangal le Coinbhinsiún Bhúdaipeist agus do chomhaontú idir an tAontas Eorpach agus na Stáit Aontaithe maidir le rochtain ar r-fhianaise a éascú. Tá na sainorduithe sin ríthábhachtach chun an pacáiste reachtach maidir le r-fhianaise a chomhlánú d'fhonn rochtain thapa, éifeachtach ar r-fhianaise a stóráiltear lasmuigh den Aontas a chinntiú. Thug na hairí treoshuíomh agus treoirlínte polaitiúla chun an obair a dhéantar ar an leibhéal teicniúil a stiúradh agus chun na sainorduithe a ghlacadh ina dhiaidh sin le linn Uachtaránacht na Rómáine.

Tá rochtain éifeachtach agus níos tapúla ar r-fhianaise de dhíth ar ár n-údaráis bhreithiúnacha agus forfheidhmithe dlí in imeachtaí coiriúla. Táimid ag gníomhú in dhá bhealach chun a chinntiú go gcuirfear ar fáil: sa chéad dul síos, laistigh den Aontas trí rialacha nua a bhunú chun go seolfar orduithe go díreach chuig soláthraithe seirbhíse, agus sa dara dul síos lasmuigh den Aontas trí phlé a dhéanamh leis na príomhghníomhaithe, go háirithe na Stáit Aontaithe, chun go mbeidh an malartú r-fhianaise níos tapúla agus níos sábháilte. Tudorel Toader, Aire Dlí agus Cirt na Rómáine

• Pacáiste r-fhianaise: A seasamh comhaontaithe ag an gComhairle maidir le rialacha chun ionadaithe dlíthiúla a cheapadh d'fhonn fianaise a bhailiú (preaseisiúint, 08/03/2019)

Comhaid reachtacha atá le glacadh sna seachtainí atá romhainn

Chuir an Uachtaránacht an Chomhairle ar an eolas faoi chomhaid reachtacha ar thángthas ar chomhaontú ina leith agus a ghlacfar faoi dheireadh an reachtais reatha. Áirítear orthu sin an treoir maidir le calaois neamhairgid, an treoir maidir le hábhar digiteach agus an treoir maidir le díolachán earraí.

• Comhaontú maidir le rialacha nua chun calaois íocaíochta neamhairgid a chomhrac (preaseisiúint, 11/12/2018)
• An Chomhairle agus an Pharlaimint tagtha ar chomhaontú faoi rialacha nua maidir le conarthaí faoi dhíolachán earraí agus ábhair dhigitigh (preaseisiúint, 29/01/2019)