"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Raidiseatóip le haghaidh úsáid mhíochaine: conclúidí formheasta ag an gComhairle
D’fhormheas an Chomhairle conclúidí chun soláthar raidiseatóp leighis a chinntiú, mar chuid de thosaíochtaí Uachtaránacht na Beilge. Tá ról ríthábhachtach ag raidiseatóip leighis maidir le hailse, riochtaí cairdiacha agus galair eile a dhiagnóisiú, agus tá méadú ag teacht ar an úsáid a bhaintear astu le haghaidh cóireálacha ailse. Is é is aidhm do na conclúidí ón gComhairle neamhspleáchas na hEorpa chomh maith le ceannaireacht dhomhanda sa réimse sin a choinneáil ar bun.
Ag meabhrú dóibh tiomantas an Aontais Eorpaigh, Chomhphobal Euratom, agus na mBallstát ardleibhéal cúraim sláinte a chur ar fáil do shaoránaigh, leagtar béim sa tacar conclúidí seo ar ról na raidiseatóp i ndiagnóisic leighis agus i dteiripe leighis, agus béim á leagan go háirithe ar an ngá méadaitheach atá le radachógais theiripeacha.
Tá iompar raidiseatóp ar fud an Aontais ríthábhachtach chun rochtain a áirithiú d’othair, agus é á chur san áireamh nach mór cuid acu a úsáid laistigh de chúpla uair an chloig nó cúpla lá tar éis a dtáirgthe, agus nach bhfuil an táirgeadh comhchruinnithe ach i líon beag Ballstát den chuid is mó.
Chun a áirithiú go mbeidh iseatóip leighis ábhartha ar fáil do lia-chleachtóirí nuair a theastaíonn siad uathu agus san áit a dteastaíonn siad uathu, tá sé tábhachtach go mbeadh tuiscint shoiléir ag gach duine lena mbaineann ar an éileamh agus ar an soláthar a bheidh ann amach anseo.
Iarrann an Chomhairle ar an gCoimisiún, ar Ghníomhaireacht Soláthair Euratom, agus ar na Ballstáit, chomh maith le hearnáil na tionsclaíochta agus na páirtithe leasmhara ábhartha, leanúint de na hiarrachtaí chun soláthar iontaofa bunábhair do tháirgeadh raidiseatóp a chinntiú.
Thairis sin, cuireann an Chomhairle i dtreis an rannchuidiú tábhachtach a dhéanann imoibreoirí taighde núicléach na hEorpa agus saoráidí núicléacha eile atá in ann raidiseatóip leighis a tháirgeadh ar na leibhéil is gá do na riachtanais fhadtéarmacha san Aontas Eorpach.
Gach bliain, tá thart ar 10 milliún nós imeachta diagnóise nó cóireála san Eoraip, lena n-áirítear le haghaidh galair chairdiacha, néareolaíocha agus ailseacha, bunaithe ar raidiseatóip. Tá an gá le neamhspleáchas ríthábhachtach do gach amhábhar, ach sa leigheas núicléach, is ábhar do shaol an duine é. D’fhormheasamar conclúidí chun a soláthar slán agus rochtain shlán orthu a chinntiú ar fud an Aontais, agus taighde agus nuálaíocht á gcothú sa réimse chun freastal ar an ngá méadaitheach le radachógais.
Tinne Van der Straeten, Aire Fuinnimh na Beilge
Sna conclúidí ón gComhairle, tathantaítear ar an gCoimisiún gníomhú maidir le cúig phríomhcholún:
ról ceannaireachta domhanda na hEorpa i soláthar raidiseatóp míochaine
faireachán a dhéanamh ar éileamh agus soláthar do na raidiseatóip leighis ábhartha uile agus an t-éileamh agus an soláthar sin a thuar bunaithe ar thaithí na Faireachlainne Eorpaí um Sholáthar Raidiseaptóp Liachta
taighde agus nuálaíocht ar thopaicí a bhaineann le raidiseatóip leighis
Scileanna criticiúla a mheas agus a fhorbairt
measúnú a dhéanamh ar an gcreat maidir le raidiseatóip d’úsáid mhíochaine a iompar chun rannchuidiú le rochtain a áirithiú do na hothair i ngach Ballstát
Áitíonn siad freisin ar an Líonra Rialála Leigheasra Eorpach measúnú a dhéanamh, de réir na modheolaíochta atá ann cheana, ar chriticiúlacht na radachógas atá údaraithe san Eoraip.
Cúlra
Thacaigh na Ballstáit i gcónaí le gníomhaíochtaí an Aontais chun soláthar raidiseatóp leighis a chinntiú agus d’fhormheas siad conclúidí ina leith cheana féin in 2009, 2010 agus 2012 tar éis na géarchéime tromchúisí soláthair a bhí ann ag an am sin.
Le déanaí, in 2019, d’iarr an Chomhairle ar an gCoimisiún plean gníomhaíochta a fhorbairt maidir le teicneolaíochtaí núicléacha agus raideolaíocha neamhchumhachta agus raidiseatóip leighis freisin sna conclúidí ón gComhairle in 2021 maidir le hAontas Sláinte na hEorpa a neartú.
In 2021, ghlac an Coimisiún an Clár Oibre Straitéiseach maidir le feidhmeanna Leighis, Tionsclaíochta agus Taighde na Teicneolaíochta Núicléiche agus Radaíochta (SAMIRA) mar phlean gníomhaíochta cuimsitheach chun tacú le húsáid shábháilte, ardcháilíochta agus iontaofa na teicneolaíochta raideolaíche agus núicléiche i gcúram sláinte, rud a chuirfidh le plean sáraithe ailse na hEorpa.
