"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
Tháinig airí comhshaoil an Aontais le chéile i Lucsamburg agus tháinig siad ar chur chuige ginearálta maidir leis an Treoir maidir le Maímh Ghlasa, an Treoir maidir le Faireachán Ithreach agus an Treoir Réime Dramhaíola athbhreithnithe. Ghlac siad go foirmiúil leis an dlí maidir le hathbhunú an dúlra.
Thapaigh an tAontas deis uathúil chun cailliúint na bithéagsúlachta a aisiompú sula mbeidh sé ródhéanach, rud a chinnteoidh todhchaí inmharthanach do na glúnta atá le teacht.
Thángamar ar chomhaontú freisin maidir le trí threoir tábhachtacha don gheilleagar ciorclach agus do shláinte ithreach san Aontas: léiríomar a thiomanta atá muid don aistriú glas, léiríomar go gcosnóimid ár dtomhaltóirí ar an nglas-snasú, ag díriú ag an gcur amú bia agus teicstíle agus ag cosaint na hithreach ón díghrádú.
Tá an tAontas ag treabhadh chun cinn lena chuspóirí comhshaoil agus aeráide agus leis an sprioc aeráidneodracht a bhaint amach san Aontas faoi 2050.
Alain Maron, Aire Rialtais Réigiún Príomhchathrach na Bruiséile, a bhfuil freagracht air maidir leis an Aistriú Aeráide, an Comhshaol, Fuinneamh agus an daonlathas rannpháirtíochta
Dlí um athbhunú an dúlra
Ghlac an Chomhairle go foirmiúil an rialachán – an chéad cheann dá leithéid – maidir le hathbhunú an dúlra. Is é is aidhm don togra bearta a chur i bhfeidhm chun 20% ar a laghad de limistéir thalún agus farraige an Aontais a athchóiriú faoi 2030, agus na héiceachórais uile a bhfuil athchóiriú de dhíth orthu a athchóiriú faoi 2050.
Leagtar síos ann spriocanna agus oibleagáidí sonracha atá ceangailteach ó thaobh dlí maidir le hathbhunú an dúlra sna héiceachórais talún, mhuirí, fionnuisce, foraoise, talmhaíochta agus uirbeacha. Áirítear ar na bearta sonracha pailneoirí agus féileacáin féarthalún a chosaint, spásanna glasa uirbeacha a chosaint agus 3 bhilliún crann breise ar a laghad a chur faoi 2030 ar leibhéal an Aontais.
Tháinig na hairí comhshaoil ar chur chuige ginearálta maidir le togra chun athbhreithniú a dhéanamh ar an treoir réime dramhaíola, ag díriú go sonrach ar na hearnálacha teicstíle agus bia. Is é an aidhm fhoriomlán laghdú a dhéanamh ar na tionchair chomhshaoil agus aeráide a bhaineann le giniúint agus bainistiú dramhaíola teicstíle agus bia. Tá sé d’aidhm aige freisin an chiorclaíocht a chothú san earnáil teicstíle.
Leis na rialacha nua, tugtar isteach scéimeanna éigeantacha comhchuibhithe freagrachta leathnaithe táirgeora do tháirgeoirí teicstíle i mBallstáit uile an Aontais. Leagtar síos sa chur chuige ginearálta freisin spriocanna do na Ballstáit atá ceangailteach ó thaobh dlí de chun an cur amú bia a laghdú, ar spriocanna iad atá le baint amach faoi 2030: 10% sa phróiseáil agus sa mhonaraíocht, agus 30% (in aghaidh an duine) sa mhiondíol, i mbliana, i seirbhísí bia agus i dteaghlaigh.
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Cur amú bia: cosc, athúsáid agus athchúrsáil (Grafaic faisnéise)
Maímh Ghlasa
Tháinig na hairí ar chur chuige ginearálta i ndáil leis an Treoir atá beartaithe maidir le Maímh Ghlasa.
Is é is aidhm don treoir tomhaltóirí a chosaint ar an nglas-snasú: leagtar síos leis na híoscheanglais a bhaineann le bunús a thabhairt le maímh chomhshaoil shainráite (i scríbhinn nó ó bhéal) agus le lipéid chomhshaoil, iad a chur in iúl agus a fhíorú.
Is é an aidhm atá ann dlús a chur leis an aistriú glas i dtreo geilleagar ciorclach glan san Aontas, agus ar an gcaoi sin rannchuidiú leis an gcuspóir foriomlán aeráidneodracht an Aontais a bhaint amach faoi 2050.
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Tháinig airí comhshaoil an Aontais ar chur chuige ginearálta i ndáil leis an treoir maidir le faireachán agus athléimneacht ithreach. Is é is aidhm don treoir an tAontas a chur ar chonair i dtreo ithreacha sláintiúla faoi 2050.
Chun an sprioc sin a bhaint amach, leagtar síos sa chur chuige ar thángthas air bearta chun faireachán éigeantach a dhéanamh ar shláinte na hithreach, soláthraítear treoirphrionsabail maidir le bainistiú inbhuanaithe ithreach, agus tugtar aghaidh ar chásanna ina mbaineann rioscaí do-ghlactha don tsláinte agus don chomhshaol le héilliú ithreach.
D’fhormheas na hairí conclúidí maidir leis an athbhreithniú meántéarma ar an 8ú clár gníomhaíochta don chomhshaol, lena réitítear an bealach chun cinn chuig an aistriú glas, cóir agus cuimsitheach d’Eoraip inbhuanaithe.
Leagtar béim sna conclúidí ar a thábhachtaí a bheidh cur i bhfeidhm an Chomhaontaithe Ghlais don Eoraip chun cuspóirí tosaíochta an aistrithe ghlais a bhaint amach. Tugtar aghaidh sna conclúidí, i measc nithe eile, ar an athléimneacht in aghaidh an athraithe aeráide agus an ullmhacht i leith rioscaí, an maolú ar an athrú aeráide, ar chosaint na bithéagsúlachta, an truailliú nialasach agus an geilleagar ciorclach.
Leag na Ballstáit béim freisin ar an ngá atá leis an nglacadh sóisialta agus leis an aistriú cóir. Treoir a bheidh sna conclúidí sin don Choimisiún maidir le bearta a choigeartú chun cuspóirí 2030 a bhaint amach go héifeachtach.
Ina theannta sin, ghlac na hairí comhshaoil páirt i ndíospóireacht bheartais faoin teachtaireacht ón gCoimisiún maidir le sprioc aeráide 2040.
Bhí seisiún tuairimíochta ag na hairí maidir le sprioc aeráide 2040, agus an méid a chuireann sí le hiomaíochas an Aontais á chur san áireamh, agus an t-aistriú cóir á chinntiú ag an am céanna. Roinn siad a dtuairimí freisin maidir leis an gcreat iar-2030, agus chuir siad acmhainneacht na mbeart atá dírithe ar an éileamh acmhainneacht an gheilleagar chiorclaigh san áireamh leis sin.
Bhí seisiún tuairimíochta ag na hairí le linn am lóin faoin teachtaireacht ón gCoimisiún maidir le rioscaí aeráide a bhainistiú.
D'aithin na hairí go bhfuil gá le freagairt chórasach bheartais sna réimsí beartais ábhartha uile. Chuir siad a dtuairimí in iúl maidir le bealaí nua comhair a d’fhéadfadh a ghlacadh ar na leibhéil éagsúla rialachais, ina measc ar leibhéal an Aontais, chun aghaidh a thabhairt ar rioscaí aeráide. Roinn siad freisin leis na hairí eile aon bhearta a chur siad i bhfeidhm chun bainistiú riosca aeráide a chomhtháthú ina bpleanáil bhuiséadach.
Faoi mhíreanna gan phlé, ghlac an Chomhairle cinneadh thar cheann an Aontais an Comhaontú a thabhairt i gcrích faoi Choinbhinsiún na Náisiún Aontaithe maidir le Dlí na Farraige maidir le caomhnú agus úsáid inbhuanaithe na bithéagsúlachta muirí i limistéir lasmuigh den dlínse náisiúnta (comhaontú BBNJ), ar a dtugtar ‘Conradh na Mórmhara’ freisin.
Is é is aidhm don chomhaontú aigéin an domhain agus an maoirseacht a dhéantar orthu a chosaint thar ceann na nglúnta atá ann faoi láthair agus na nglúnta atá le teacht i limistéir lasmuigh den dlínse náisiúnta. Is ionann na limistéir sin agus thart ar dhá thrian de dhromchla an aigéin agus 95% dá thoirt.
Chuir Uachtaránacht na Beilge in iúl do na hairí faoin obair reachtach leantach i ndáil leis an rialachán atá beartaithe maidir le truailliú micreaphlaisteach ó chaillteanas millíní plaisteacha a laghdú agus i ndáil leis an rialachán atá beartaithe maidir le feithiclí a bhfuil a ré caite.
Chuir an Uachtaránacht agus an Coimisiún na hairí ar an eolas faoin toradh a d’eascair as an gceathrú seisiún den Choiste Caibidlíochta Idir-Rialtasach chun ionstraim idirnáisiúnta atá ceangailteach ó thaobh dlí a fhorbairt maidir le truailliú plaisteach, lena n-áirítear sa mhuirthimpeallacht (INC-4).
Thug an Pholainn, an tSeicia agus an Ungáir faisnéis (i seisiún neamhphoiblí) maidir le téarmaí agus coinníollacha Cheant an Chiste don Nuálaíocht 2024 le haghaidh táirgeadh hidrigine breoslaí in-athnuaite de thionscnamh neamhbhitheolaíoch (an dara babhta de cheant H2).
Thíolaic toscaireacht na hUngáire a clár comhshaoil mar uachtaránacht inteachta Chomhairle an Aontais Eorpaigh.
Ghlac an Chomhairle freisin, gan phlé, na míreanna ar liostaí na míreanna ‘A’.
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
