"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għas-suq intern u l-industrija, 25 ta' Frar 2021
Riżultati ewlenin
Semestru Ewropew – Pjanijiet nazzjonali għall-irkupru u r-reżiljenza
Il-ministri kellhom dibattitu ta' orjentazzjoni dwar kif il-pjanijiet nazzjonali għall-irkupru u r-reżiljenza jistgħu jintużaw bl-aħjar mod bħala strument għat-twettiq tal-għanijiet tal-politika industrijali: it-tisħiħ tas-Suq Uniku, it-tranżizzjonijiet tewmin u l-awtonomija strateġika f'UE miftuħa.
Il-Faċilità għall-Irkupru u r-Reżiljenza stabbiliet il-bażi. Issa hija r-responsabbiltà tagħna li nidentifikaw l-oqsma, is-setturi u l-azzjonijiet li huma kruċjali għall-irkupru fuq perijodu qasir u r-reżiljenza fit-tul tal-ekonomiji nazzjonali tagħna, kif ukoll tal-ekonomija tal-UE meħuda f'daqqa. Id-diskussjonijiet tal-lum huma l-ewwel pass importanti f'din id-direzzjoni.
Pedro Siza Vieira, Ministru tal-Istat għall-Ekonomija u t-Tranżizzjoni Diġitali tal-Portugall
Il-ministri qablu b'mod ġenerali li l-Kunsill Kompetittività għandu jaqdi rwol prominenti fl-implimentazzjoni tal-Faċilità għall-Irkupru u r-Reżiljenza u li għandu jipprovdi koordinazzjoni u gwida fl-investimenti li ser isiru.
Ġie enfasizzat li Suq Uniku li jaħdem sew u kompetizzjoni ġusta huma l-prekondizzjonijiet ewlenin biex l-Ewropa toħroġ aktar b'saħħitha u aktar reżiljenti mill-kriżi tal-COVID-19. Il-ministri ssottolinjaw l-importanza li jiġi żgurat il-fluss liberu ta' oġġetti u servizzi għall-funzjonament bla xkiel tas-Suq Uniku. Huma saħqu fuq il-ħtieġa li l-istati membri jikkoordinaw bejniethom qabel ma jistabbilixxu miżuri ta' kontroll temporanji fil-fruntieri interni fl-UE.
L-awtonomija strateġika tal-UE wkoll trid tibqa' tingħata prijorità fuq l-aġenda. Jeħtieġ li l-UE tnaqqas id-dipendenzi f'setturi u prodotti kritiċi bħall-produzzjoni tal-vaċċini u s-semikondutturi. Fl-istess ħin, għadd kbir ta' ministri ġibdu attenzjoni għall-fatt li l-ekonomija tal-UE hija mibnija fuq il-prinċipju ta' swieq miftuħa u tiddependi fuq regoli multilaterali u network solidu ta' ftehimiet ta' kummerċ ħieles ma' sħab globali. Madankollu, huma enfasizzaw ukoll l-importanza li jinżammu kondizzjonijiet ekwivalenti ta' kompetizzjoni globali u li l-istrumenti kummerċjali eżistenti jintużaw b'mod ġust u sod biex in-negozji u l-konsumaturi tal-UE jiġu protetti minn prattiki inġusti minn kompetituri mhux tal-UE.
Ħafna ministri saħqu fuq ir-rwol tar-riċerka u l-innovazzjoni biex jitħaffef l-irkupru u tissaħħaħ ir-reżiljenza. Il-miżuri ta' appoġġ għandhom ikunu mmirati lejn il-ħtiġijiet speċifiċi tal-intrapriżi żgħar u ta' daqs medju, li huma t-tessut li jgħaqqad flimkien l-ekonomija tal-UE. Għadd kbir ta' stati membri enfasizzaw il-ħtieġa li jiġu żviluppati standards aktar armonizzati biex jirfdu s-Suq Uniku. Għadd ta' ministri semmew l-importanza ta' proġetti transkonfinali innovattivi, pereżempju dwar il-konnettività tal-5G, kif ukoll ir-rwol ta' proġetti importanti ta' interess Ewropew komuni (IPCEIs) bħala mod kif tissaħħaħ il-koordinazzjoni tagħhom.
Il-ministri appellaw lill-Kummissjoni biex tqis l-ideat imsemmija hawn fuq meta tiffinalizza l-aġġornament tagħha tal-istrateġija industrijali l-ġdida għall-Ewropa.
Il-presidenza ser tiġbor fil-qosor l-eżitu tad-dibattitu f'ittra li ser tintbagħat lill-president tal-Kunsill Ewropew, bħala kontribut għad-diskussjonijiet fil-laqgħa tal-Kunsill Ewropew ta' Marzu 2021.
L-Aġenda ġdida tal-Konsumatur tal-UE
Il-ministri kellhom dibattitu ta' orjentazzjoni dwar il-komunikazzjoni tal-Kummissjoni "Aġenda Ġdida għall-Konsumaturi". Permezz ta' dan, huma rreferew ukoll għall-konklużjonijiet tal-Kunsill dwar is-suġġett adottati fit-22 ta' Frar 2021. Kemm dawn il-konklużjonijiet kif ukoll l-eżitu tad-dibattitu ta' orjentazzjoni huma maħsuba biex jipprovdu lill-Kummissjoni bi gwida politika għal inizjattivi futuri f'dan il-qasam.
Il-fiduċja tal-konsumaturi taqdi rwol kruċjali fl-irkupru u r-reżiljenza tal-ekonomiji tagħna. Jeħtieġ li nsaħħu din il-fiduċja billi nagħtu spinta lis-suq intern u nipprovdu mezzi lill-konsumatur biex ikollu rwol attiv fit-tranżizzjoni tal-ekonomiji tagħna lejn l-Ewropa ekoloġika u diġitali ta' għada.
Pedro Siza Vieira, Ministru tal-Istat għall-Ekonomija u t-Tranżizzjoni Diġitali tal-Portugall
Il-ministri ssottolinjaw ir-rwol kruċjali tal-konsumaturi fl-irkupru ekonomiku. Huma saħqu li sabiex tingħata spinta lis-suq uniku u jitħaffef l-irkupru ekonomiku, jeħtieġ li l-protezzjoni tal-konsumatur tissaħħaħ u tiġi integrata fl-oqsma kollha ta' politika.
Diversi ministri enfasizzaw li l-fiduċja tal-konsumaturi u informazzjoni trasparenti għall-konsumaturi huma elementi importanti għall-irkupru tal-ekonomija tal-Ewropa wara l-kriżi tal-COVID-19. Pereżempju, fil-kuntest tat-tranżizzjonijiet ekoloġiċi u diġitali, ser ikun hemm bżonn li l-konsumaturi jħossuhom responsabbilizzati u protetti meta jbiddlu x-xejriet tal-konsum tagħhom kontra prattiki bħall-greenwashing.
Xi ministri ġibdu attenzjoni għall-importanza tal-ġlieda kontra l-obsolexxenza programmata u l-promozzjoni tad-dritt għat-tiswija, sabiex jitħeġġeġ il-konsum sostenibbli.
Sabiex tingħata spinta lill-konsum bl-imnut online, ir-regoli dwar is-servizzi diġitali madwar l-UE għandhom jiżguraw livell għoli ta' protezzjoni tal-konsumatur billi jiċċaraw u jsaħħu l-obbligu li l-pjattaformi online jerfgħu responsabbiltà. Diversi ministri semmew ir-rwol importanti ħafna li ser ikollhom l-atti futuri dwar is-servizzi diġitali u dwar is-swieq diġitali f'dan ir-rigward.
Huwa importanti wkoll li l-Kummissjoni u l-istati membri jeżaminaw l-effettività tal-mekkaniżmi eżistenti fil-politika tal-konsumatur sabiex ikunu mħejjija għal kriżijiet futuri u b'hekk isaħħu r-reżiljenza tal-konsumatur.
Il-ministri kellhom skambju ta' fehmiet (seduta pubblika) dwar kif id-direttiva proposta għandha titmexxa 'l quddiem.
It-trasparenza fiskali hija prinċipju fundamentali fi kwalunkwe soċjetà demokratika. Dan jippermetti lil dawk li jfasslu l-politika biex jieħdu deċiżjonijiet infurmati u biex jiżguraw li l-atturi ekonomiċi kollha jikkontribwixxu b'mod ġust u ekwu għall-ekonomija tad-diversi pajjiżi fejn iwettqu n-negozju tagħhom. Id-dibattitu tal-lum witta t-triq biex id-direttiva proposta timxi 'l quddiem bħala kwistjoni ta' prijorità.
Pedro Siza Vieira, Ministru tal-Istat għall-Ekonomija u t-Tranżizzjoni Diġitali tal-Portugall
Maġġoranza ċara tal-ministri kienu tal-fehma li l-aħħar proposta konsolidata tal-presidenza hija teknikament matura. Huma stiednu lill-presidenza Portugiża biex tfittex mandat ta' negozjar mingħajr dewmien sabiex flimkien mal-Parlament Ewropew tesplora l-possibbiltà ta' ftehim għall-adozzjoni rapida tad-direttiva.
Il-presidenza Portugiża kkonkludiet li kien hemm appoġġ politiku għaliha biex tfittex mandat ta' negozjar sabiex flimkien mal-Parlament Ewropew tesplora l-possibbiltà ta' ftehim għall-adozzjoni rapida tad-direttiva proposta.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Task force għall-produzzjoni industrijali fuq skala akbar tal-vaċċini kontra l-Covid-19
Il-ministri ġew infurmati mill-Kummissjoni dwar il-ħidma mwettqa s'issa mit-task force l-ġdida għall-produzzjoni industrijali fuq skala akbar tal-vaċċini kontra l-Covid-19 fl-UE. L-istati membri ġew mistiedna jipprovdu lill-Kummissjoni b'informazzjoni dwar l-isforzi u l-kapaċitajiet nazzjonali biex jindirizzaw l-ostakli possibbli assoċjati mal-produzzjoni tal-vaċċini kontra l-Covid-19. Fl-interventi tagħhom, ħafna ministri laqgħu b'sodisfazzjon il-ħolqien tat-task force biex tindirizza din il-kwistjoni importanti.
D9+ Laqgħa Ministerjali – "Leading the Way to Europe’s Digital Decade" ("Inwittu t-Triq lejn id-Deċennju Diġitali tal-Ewropa") (27 ta' Jannar 2021)
Il-ministri ġew infurmati mid-delegazzjoni Finlandiża dwar l-eżitu tal-aħħar laqgħa tal-grupp D9+, li ġiet organizzata permezz ta' vidjokonferenza mill-Finlandja fis-27 ta' Jannar 2021. Dan l-eżitu jikkonsisti minn dikjarazzjoni konġunta "Leading the Way to Europe’s Digital Decade" mill-pajjiżi parteċipanti kollha, li l-messaġġ ewlieni tagħha huwa li l-kompetittività teknoloġika tal-Ewropa hija bbażata fuq l-iżvilupp diġitali, l-innovazzjonijiet u suq intern li jaħdem.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-Faċilità għall-Irkupru u r-Reżiljenza stabbiliet il-bażi. Issa hija r-responsabbiltà tagħna li nidentifikaw l-oqsma, is-setturi u l-azzjonijiet li huma kruċjali għall-irkupru fuq perijodu qasir u r-reżiljenza fit-tul tal-ekonomiji nazzjonali tagħna, kif ukoll tal-ekonomija tal-UE meħuda f'daqqa. Id-diskussjonijiet tal-lum huma l-ewwel pass importanti f'din id-direzzjoni.
Il-fiduċja tal-konsumaturi taqdi rwol kruċjali fl-irkupru u r-reżiljenza tal-ekonomiji tagħna. Jeħtieġ li nsaħħu din il-fiduċja billi nagħtu spinta lis-suq intern u nipprovdu mezzi lill-konsumatur biex ikollu rwol attiv fit-tranżizzjoni tal-ekonomiji tagħna lejn l-Ewropa ekoloġika u diġitali ta' għada.
It-trasparenza fiskali hija prinċipju fundamentali fi kwalunkwe soċjetà demokratika. Dan jippermetti lil dawk li jfasslu l-politika biex jieħdu deċiżjonijiet infurmati u biex jiżguraw li l-atturi ekonomiċi kollha jikkontribwixxu b'mod ġust u ekwu għall-ekonomija tad-diversi pajjiżi fejn iwettqu n-negozju tagħhom. Id-dibattitu tal-lum witta t-triq biex id-direttiva proposta timxi 'l quddiem bħala kwistjoni ta' prijorità.
