"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għar-riċerka, 26 ta' Frar 2021
Riżultati ewlenin
Riċerka u innovazzjoni fil-pjanijiet għall-irkupru u r-reżiljenza: investimenti u riformi
Il-ministri kellhom dibattitu ta' orjentazzjoni dwar kif il-faċilità għall-irkupru u r-reżiljenza (RRF) tista' tikkontribwixxi għall-iżvilupp ulterjuri taż-żona Ewropea tar-riċerka (ŻER).
Ir-riċerka u l-innovazzjoni jixprunaw l-isforzi lejn l-irkupru ekonomiku mill-kriżi tal-COVID-19. Dawn jistgħu mhux biss jixprunaw l-attività ekonomika iżda wkoll jaċċelleraw it-tranżizzjonijiet ekoloġiċi u diġitali u jsaħħu r-reżiljenza tal-ekonomija tagħna. Il-Faċilità għall-Irkupru u r-Reżiljenza toffri opportunità unika biex tissaħħaħ iż-Żona Ewropea tar-Riċerka u biex din issir aktar ta' impatt - u viċi versa.
Manuel Heitor, Ministru Portugiż għax-Xjenza u t-Teknoloġija u l-Edukazzjoni Għolja
Il-ministri enfasizzaw li l-pandemija tal-COVID-19 żvelat l-importanza tar-riċerka u l-innovazzjoni fil-ġlieda kontra l-kriżi attwali tas-saħħa u l-ekonomija, kif ukoll il-potenzjal tagħha li tipprevjeni vulnerabbiltajiet fi kriżijiet futuri. Barra minn hekk, ġie rikonoxxut b'mod wiesa' li r-riċerka u l-innovazzjoni huma kruċjali biex jinkisbu t-tranżizzjonijiet ekoloġiċi u diġitali.
Peress li l-RRF toffri opportunità unika biex tissaħħaħ iż-ŻER u biex din issir aktar ta' impatt, il-ministri qablu b'mod ġenerali li l-investimenti u r-riformi fis-sistemi tar-riċerka u l-innovazzjoni għandhom jiġu riflessi b'mod xieraq fil-pjanijiet nazzjonali għall-irkupru u r-reżiljenza li attwalment qed jiġu elaborati fl-istati membri.
Kien hemm kunsens li r-riformi strutturali u l-investimenti intelliġenti fil-kuntest tal-pjanijiet nazzjonali għall-irkupru u r-reżiljenza għandhom jiffukaw fuq ir-riċerka u l-innovazzjoni fl-aktar oqsma promettenti, bħall-idroġenu ekoloġiku, il-computing ta' prestazzjoni għolja u l-quantum, l-intelliġenza artifiċjali, is-sistemi spazjali u ċ-ċentri ta' innovazzjoni. Diversi ministri indikaw li huwa essenzjali li jitħaffef id-dħul fis-suq ta' soluzzjonijiet innovattivi.
Filwaqt li jibnu fuq l-assi b'saħħithom taż-ŻER, jiġifieri l-infrastrutturi pan-Ewropej, ir-riżorsi umani, il-kooperazzjoni tranżnazzjonali fir-riċerka u x-xjenza miftuħa, l-UE u l-istati membri tagħha jistgħu jsaħħu bil-kbir l-inklużjoni u jagħtu spinta lill-prosperità ekonomika permezz ta' xjenza eċċellenti. F'dan ir-rigward, għadd ta' ministri enfasizzaw il-ħtieġa li jiġu mmodernizzati l-universitajiet u l-karrieri fir-riċerka, filwaqt li ssottolinjaw l-importanza tal-investiment fil-kapital uman u l-iżvilupp tal-ħiliet.
Ħafna ministri enfasizzaw l-importanza li jiġu appoġġati negozji ġodda u SMEs innovattivi billi jiġu ssimplifikati l-proċeduri għall-aċċess għall-finanzjament. Sabiex jiġi massimizzat l-ingranaġġ, jenħtieġ li jiġu mfittxija sinerġiji bejn il-finanzjament nazzjonali u d-diversi programmi Ewropej, b'mod partikolari Orizzont Ewropa, kif ukoll l-investiment tas-settur privat, filwaqt li jiġu evitati d-duplikazzjonijiet. Diversi ministri semmew ukoll ir-rwol li għandhom is-sħubiji fil-kooperazzjoni pubblika-privata u fi proġetti transkonfinali. F'dan il-kuntest, kien hemm diversi sejħiet għal gwida u għarfien espert mill-Kummissjoni biex jinkiseb il-livell ta' koordinazzjoni meħtieġ għall-implimentazzjoni b'suċċess ta' proġetti transkonfinali u multinazzjonali.
Il-presidenza Portugiża ħabbret li l-eżitu tad-dibattitu ser jikkontribwixxi għad-diskussjonijiet li ġejjin tal-Kapijiet ta' Stat u ta' Gvern fis-summit tar-rebbiegħa tal-UE fil-25 u s-26 ta' Marzu.
Affarijiet oħra:
a) Is-sitwazzjoni attwali tar-regolament tal-Kunsill dwar l-istabbiliment tal-impriża konġunta Ewropea tal-computing ta' prestazzjoni għolja
Il-ministri ġew infurmati mill-presidenza Portugiża dwar il-progress miksub s'issa fl-eżami tar-regolament propost fil-korpi preparatorji tal-Kunsill. Il-proposta bħalissa qed tiġi diskussa fil-grupp ta' ħidma dwar ir-riċerka.
b) Il-forum tal-ERA għat-tranżizzjoni u l-patt għar-riċerka u l-innovazzjoni fl-Ewropa
Il-ministri ġew infurmati mill-Kummissjoni dwar l-attivitajiet tal-forum taż-ŻER għat-tranżizzjoni, li nħoloq f'Jannar. Ġie nnutat li l-Kummissjoni għandha l-intenzjoni li sa Lulju 2021 tagħmel proposta għal patt għar-riċerka u l-innovazzjoni, maħsub bħala ċ-ċentru tal-qafas futur ta' governanza taż-ŻER.
c) Proposta għal deċiżjoni tal-Parlament Ewropew u tal-Kunsill dwar il-parteċipazzjoni tal-Unjoni fis-sħubija Ewropea dwar il-metroloġija mwettqa b'mod konġunt minn diversi stati membri
Il-Kummissjoni ppreżentat (f'sessjoni pubblika) il-proposta tagħha għal deċiżjoni li tippermetti l-parteċipazzjoni tal-UE fis-sħubija Ewropea dwar il-metroloġija, li tressqet fit-23 ta' Frar.
d) Proposta għal regolament tal-Kunsill li jistabbilixxi l-Impriżi Konġunti taħt Orizzont Ewropa
Il-Kummissjoni ppreżentat il-proposta tagħha għal regolament tal-Kunsill li jistabbilixxi l-Impriżi Konġunti taħt Orizzont Ewropa, magħruf ukoll bħala l-"Att Bażiku Uniku", imressqa fl-24 ta' Frar.
e) Informazzjoni rigward l-opinjoni xjentifika dwar il-bijodegradibbiltà tal-plastik fl-ambjent miftuħ
Il-ministri ġew infurmati mill-Kummissjoni dwar l-opinjoni xjentifika tal-grupp ta' konsulenti xjentifiċi ewlenin tal-Kummissjoni dwar il-bijodegradabbiltà tal-plastik fl-ambjent miftuħ. L-opinjoni tipprovdi rakkomandazzjonijiet dwar il-kriterji li għandhom jintużaw biex jiġu massimizzati l-benefiċċji ambjentali tal-plastik bijodegradabbli meta mqabbla ma' dawk konvenzjonali. Skont il-Kummissjoni, il-grupp jirrakkomanda tnaqqis globali fl-użu tal-plastik.
f) Sħubija ta' Orizzont Ewropa dwar it-tħejjija għall-pandemija
Il-ministri ġew infurmati mill-Kummissjoni dwar l-aħħar sitwazzjoni attwali fit-tħejjija ta' proposta tal-Kummissjoni għal sħubija ta' riċerka u; innovazzjoni Ewropea għat-tħejjija għall-pandemija taħt Orizzont Ewropa. Is-sħubija, imħabbra mill-Kummissjoni f'April 2020 bħala parti mill-azzjonijiet stabbiliti fil-Pjan ta' Azzjoni ERAvsCorona, għandha l-għan li ssaħħaħ il-potenzjal ta' rispons Ewropew ikkoordinat għall-pandemija tal-COVID-19 f'termini ta' riċerka u innovazzjoni.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Ir-riċerka u l-innovazzjoni jixprunaw l-isforzi lejn l-irkupru ekonomiku mill-kriżi tal-COVID-19. Dawn jistgħu mhux biss jixprunaw l-attività ekonomika iżda wkoll jaċċelleraw it-tranżizzjonijiet ekoloġiċi u diġitali u jsaħħu r-reżiljenza tal-ekonomija tagħna. Il-Faċilità għall-Irkupru u r-Reżiljenza toffri opportunità unika biex tissaħħaħ iż-Żona Ewropea tar-Riċerka u biex din issir aktar ta' impatt - u viċi versa.
