Kunsill Kompetittività (Suq intern u industrija), 28 ta' Novembru 2024

Riżultati ewlenin

Il-futur tal-kompetittività Ewropea

Il-presidenza Ungeriża ħarġet konklużjonijiet tal-presidenza dwar il-futur tal-kompetittività Ewropea. Il-konklużjonijiet tal-presidenza jirrikonoxxu l-urġenza li jissaħħu l-produttività u t-tkabbir sostenibbli, filwaqt li jinżamm il-mudell soċjali u ekonomiku tal-UE.

Biex jintlaħaq dan l-għan, il-konklużjonijiet tal-presidenza jappellaw għal:

• l-approfondiment tas-suq uniku
• il-promozzjoni tal-innovazzjoni
• it-tnaqqis tal-piżijiet regolatorji
• it-titjib tal-ambjent tan-negozju, speċjalment għall-intrapriżi żgħar u ta' daqs medju

Il-konklużjonijiet tal-presidenza jenfasizzaw il-ħtieġa urġenti li jiġi mobilizzat l-investiment f'setturi strateġiċi ewlenin, inkluż teknoloġiji nodfa u l-infrastruttura tal-enerġija, u li jittejjeb il-finanzjament tal-innovazzjoni.

Il-presidenza tistieden lill-Kummissjoni tiżviluppa strateġiji ġodda għas-suq uniku u għall-industrija, b'enfasi fuq il-modernizzazzjoni u s-simplifikazzjoni sabiex tappoġġa t-tkabbir ekonomiku u l-kompetittività fit-tul madwar l-Unjoni.

Regolamentazzjoni aħjar fl-Ewropa

Il-ministri kellhom dibattitu dwar regolamentazzjoni aħjar fl-Ewropa. Id-dibattitu kien iggwidat minn nota mħejjija mill-presidenza Ungeriża.

Il-ministri taw l-opinjonijiet tagħhom dwar tliet punti:

• appoġġ għal inizjattivi għal regolamentazzjoni aħjar fir-rapport ta' Draghi
• l-implimentazzjoni effettiva tat-tnaqqis tal-piż amministrattiv
• u t-titjib tal-għodod eżistenti għal regolamentazzjoni aħjar

Il-biċċa l-kbira tal-istati membri laqgħu s-suġġett bħala element importanti biex tittejjeb il-kompetittività fl-Ewropa. Il-maġġoranza tad-delegazzjonijiet laqgħu l-proposti tal-Kummissjoni biex jitnaqqas il-piż tar-rappurtar b'25%, b'mira ta' 35% għall-SMEs. Diversi delegazzjonijiet approvaw il-proposta tar-rapport ta' Draghi biex tmur lil hinn minn din il-mira (għal tnaqqis ta' rappurtar ta' 50% għall-SMEs), kif ukoll l-idea li jkun hemm metodoloġija unika għall-kalkolu tal-piż amministrattiv, inkluż il-piż kumulattiv ta' leġiżlazzjonijiet differenti. Bosta delegazzjonijiet laqgħu l-ħolqien ta' kummissarju għall-implimentazzjoni u s-simplifikazzjoni (il-Kummissarju Dombrovskis) u r-responsabbiltà għal kull kummissarju li jittestja l-istress tal-leġiżlazzjoni eżistenti u jiżgura li leġiżlazzjoni ġdida ma toħloqx piż addizzjonali bla bżonn, jirrapporta kull sena dwar it-tnaqqis tal-piż u jkollu djalogi ta' implimentazzjoni darbtejn fis-sena. Ħafna delegazzjonijiet qajmu wkoll il-kwistjoni ta' valutazzjonijiet tal-impatt aħjar (anke għall-emendi tal-Kunsill u tal-Parlament), inkluż b'enfasi speċifika fuq territorji differenti (bħar-reġjuni ultraperiferiċi) u tipi ta' kumpaniji (bħall-SMEs). Diversi ministri appellaw għal applikazzjoni msaħħa tal-għodod eżistenti ta' regolamentazzjoni aħjar, bħat-test "one-in-one-out" jew it-test tal-SMEs. Fl-aħħar nett, diversi interventi appellaw għall-użu ta' teknoloġiji eżistenti jew ġodda (diġitali, IA, blockchain) biex jitnaqqsu r-rekwiżiti ta' rappurtar.

Affarijiet oħra

• Il-presidenza Ungeriża infurmat lill-ministri dwar is-sitwazzjoni attwali tal-fajls leġiżlattivi li qed taħdem fuqhom
• Id-delegazzjoni Daniża, Estonjana, Finlandiża, Franċiża, Latvjana, Litwana, Portugiża, Spanjola u dik Żvediża infurmaw lill-ministri dwar il-"bijoekonomija – il-passi li jmiss fl-UE"

• Id-delegazzjoni Daniża, Finlandiża, Franċiża, Ġermaniża, Irlandiża, Latvjana, Slovakka u Spanjola infurmaw lill-ministri dwar "Nisfruttaw il-benefiċċji kollha tar-rivoluzzjoni tal-bijoteknoloġija"

• Id-delegazzjoni Franċiża, Ġermaniża u Żvediża infurmaw lill-ministri dwar "L-iżvilupp tal-produzzjoni Ewropea tal-Batteriji u t-triq 'il quddiem biex tiġi żgurata Industrija Ewropea tal-Batteriji kompetittiva"

• Id-delegazzjoni Awstrijaka, Bulgara, Ċeka, Taljana, Pollakka, Rumena u Slovakka infurmaw lill-ministri dwar "Proposta konġunta għal politika Ewropea mġedda dwar il-karozzi: nibbilanċjaw il-kompetittività mal-ambizzjoni klimatika"

• Il-Kummissjoni infurmat lill-ministri dwar ir-"Regolament dwar interfaċċa pubblika konnessa mas-Sistema ta' Informazzjoni tas-Suq Intern għad-dikjarazzjoni tal-istazzjonar ta' ħaddiema"

• Il-Kummissjoni infurmat lill-ministri dwar ir-rapport tal-2024 tan-Network tar-Rappreżentanti għall-SMEs lill-Kunsill Kompetittività

• Il-presidenza Pollakka li jmiss ippreżentat il-programm ta' ħidma tagħha fil-qasam tas-suq intern u l-industrija

Punti ''A''

Il-ministri adottaw ukoll il-lista ta' punti "A".

• Konklużjonijiet tal-presidenza dwar il-futur tal-kompetittività Ewropea

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Il-politika industrijali tal-UE (informazzjoni ġenerali)
• Il-politika dwar is-suq uniku (informazzjoni ġenerali)
• Appoġġ għall-intrapriżi żgħar u ta' daqs medju (SMEs) (informazzjoni ġenerali)