Il-politika industrijali tal-UE

L-istrateġija industrijali Ewropea

L-UE għandha l-għan li tagħmel l-industriji tagħha aktar kompetittivi globalment, u faċilitaturi tal-bidla, tal-innovazzjoni u t-tkabbir.

L-istrateġija industrijali għall-Ewropa tiffoka fuq tliet oqsma:

• l-indirizzar tad-dipendenzi strateġiċi tal-UE
• it-tisħiħ tar-reżiljenza tas-suq uniku
• l-aċċellerazzjoni tat-tranżizzjoni ekoloġika u dik diġitali

Ġew proposti inizjattivi addizzjonali taħt il-pjan industrijali tal-Patt Ekoloġiku biex titħaffef it-trasformazzjonital-industrija lejn emissjonijiet żero netti u biex l-Ewropa titqiegħed fit-triq lejn in-newtralità klimatika.

Barra minn hekk, taħt il-boxxla għall-kompetittività, il-Kummissjoni pproponiet patt għal industrija nadifa u att għall-aċċellerazzjoni industrijali, biex tgħin lill-manifatturi jaqilbu għal produzzjoni u teknoloġiji nodfa, tagħti spinta lill-manifattura u ssaħħaħ it-tkabbir u l-kompetittività tal-UE.

Awtonomija strateġika

L-awtonomija strateġika tikkonsisti fit-tnaqqis tad-dipendenza tal-UE fuq ħaddieħor, pereżempju għall-materjali u t-teknoloġiji kritiċi, l-ikel, l-infrastruttura u s-sigurtà.

Hija wkoll opportunità biex jiġu żviluppati swieq, prodotti u servizzi u tingħata spinta lill-kompetittività fl-UE.

L-istrateġija industrijali tipproponi:

• ħidma lejn sħubijiet internazzjonali diversifikati li jgħinu fil-bini tar-reżiljenza ekonomika permezz tal-investiment u l-kummerċ
• appoġġ ta' alleanzi industrijali ġodda f'oqsma strateġiċi li jattiraw investituri privati u jikkontribwixxu għall-ħolqien tal-impjiegi
• monitoraġġ tad-dipendenzi strateġiċi

Materja prima kritika

L-att dwar il-materja prima kritika, adottat f'Marzu 2024, għandu l-għan li:

• iżid u jiddiversifika l-provvista tal-UE ta' materja prima kritika
• itejjeb iċ-ċirkolarità, inkluż ir-riċiklaġġ
• jappoġġaw ir-riċerka u l-innovazzjoni dwar l-effiċjenza tar-riżorsi u l-iżvilupp ta' sostituti

L-UE stabbiliet l-objettivi li ġejjin għall-2030 fir-rigward tal-konsum annwali tal-UE:

• mill-inqas 10% mill-estrazzjoni tal-UE
• mill-inqas 40% mill-ipproċessar tal-UE
• mill-inqas 25% mir-riċiklaġġ domestiku

L-industrija taċ-ċipep

L-att tal-UE dwar iċ-ċipep jindirizza l-isfidi ewlenin li qed tiffaċċa l-industrija tas-semikondutturi, bil-ħsieb li:

• itaffi n-nuqqasijiet
• isaħħaħ is-sigurtà tal-provvista tal-UEu t-tnaqqis tad-dipendenza fuq atturi barranin
• joħloq impjiegi ta' kwalità tajba u opportunitajiet ta' negozju

L-objettiv huwa li sal-2030 jiġi rduppjat is-sehem tal-UE mis-suq globali tas-semikondutturi.

Reżiljenza tas-suq uniku

L-UE adottat l-att dwar l-emerġenza u r-reżiljenza tas-suq intern, li jipprovdi qafas strutturat għall-antiċipazzjoni, it-tħejjija u r-rispons għal tfixkil sinifikanti fis-suq intern tal-UE.

B'dan l-att, l-UE għandha l-għan li:

• issaħħaħ is-suq intern tagħha billi timplimenta miżuri proattivi li jippermettu risponsi effettivi għall-emerġenzi
• tissalvagwardja l-ktajjen ta' provvista kritiċi
• tiżgura li jkompli l-moviment liberu ta' oġġetti, servizzi u persuni

Prodotti tat-teknoloġija b'emissjonijiet żero netti

Bis-saħħa tal-att dwar l-industrija b'emissjonijiet żero netti, l-UE ser iżżid il-manifattura ta' teknoloġiji nodfa fl-UE.

Dawn ir-regoli l-ġodda ser jiffaċilitaw il-kundizzjonijiet għall-investimenti f'teknoloġiji ekoloġiċi.

L-objettiv huwa li jiġu koperti 40% tal-ħtiġijiet tal-UE fi prodotti teknoloġiċi strateġiċi b'emissjonijiet żero, bħall-pannelli fotovoltajċi solari, it-turbini tar-riħ, il-batteriji u l-pompi tas-sħana.

L-att ser jaċċellera l-progress lejn il-miri tal-UE dwar il-klima u l-enerġija, filwaqt li jagħti spinta lill-kompetittività tal-industrija tal-UE, joħloq impjiegi ta' kwalità u jappoġġa l-isforzi tal-UE biex issir indipendenti fl-enerġija.

Is-suq tal-elettriku

Ir-riforma tad-disinn tas-suq tal-elettriku għandha l-għan li:

• jagħmlu l-prezzijiet tal-elettriku inqas dipendenti mill-prezzijiet volatili tal-fjuwils fossili
• iħarsu lill-konsumaturi minn żidiet qawwijin fil-prezzijiet
• iħaffu l-varar tal-enerġiji rinnovabbli

Fl-istess ħin, ir-riforma ser tipprovdi aktar stabbiltà u kompetittività għall-kumpaniji.

Ara wkoll