Kunsill Kompetittività (Riċerka u spazju), 29 ta' Novembru 2024

Riżultati ewlenin

Riċerka

It-tisħiħ tal-kompetittività tal-UE, it-tisħiħ taż-Żona Ewropea tar-Riċerka u li tingħeleb il-frammentazzjoni tagħha

Il-ministri responsabbli għar-riċerka bdew il-parti tar-Riċerka tal-Kunsill COMPET billi approvaw il-konklużjonijiet tal-Kunsill dwar it-tisħiħ tal-kompetittività tal-UE, it-tisħiħ taż-Żona Ewropea tar-Riċerka u li tingħeleb il-frammentazzjoni tagħha.

Il-ministri affermaw mill-ġdid l-impenn tagħhom li jsaħħu l-kompetittività, il-prosperità u n-newtralità klimatika tal-UE sal-2050 permezz ta' politiki mtejba ta' riċerka u innovazzjoni (R&I). Il-konklużjonijiet jenfasizzaw il-ħtieġa li titrawwem l-eċċellenza xjentifika, l-innovazzjoni fixkiela, u li jiġu indirizzati sfidi bħat-tranżizzjoni ekoloġika u dik diġitali u s-sigurtà ekonomika. Il-konklużjonijiet jappellaw biex jitnaqqas id-distakk bejn l-istati membri u jiżdiedu l-investimenti fir-R&I biex tintlaħaq il-mira ta' 3 % tal-PDG sal-2030 u tiġi promossa kollaborazzjoni nazzjonali u tal-UE. Il-konklużjonijiet jenfasizzaw l-importanza tal-għarfien, it-talent, u t-tfassil ta' politika mnebbaħ mill-evidenza fit-tisħiħ tal-kompetittività u l-pożizzjoni globali tal-UE. Iż-Żona Ewropea tar-Riċerka (ŻER) ser tkun vitali għat-tnaqqis tal-frammentazzjoni tal-ekosistema tar-R&I u għat-tisħiħ tal-kollaborazzjoni fost l-istati membri. It-test jappoġġa governanza aħjar taż-ŻER f'oqsma bħax-xjenza miftuħa, l-ekosistemi tal-innovazzjoni, u l-infrastrutturi ta' riċerka, filwaqt li jippromwovi ċ-ċirkolazzjoni tat-talent u l-mobbiltà tar-riċerkaturi. Fl-aħħar nett, iħeġġeġ il-ħolqien ta' ambjent favur l-investituri għan-negozji ġodda, li jinċentiva l-investimenti privati u finanzjament flessibbli għat-tkabbir teknoloġiku tal-Ewropa.

• Konklużjonijiet tal-Kunsill dwar it-tisħiħ tal-kompetittività tal-UE, it-tisħiħ taż-Żona Ewropea tar-Riċerka u li tingħeleb il-frammentazzjoni tagħha
• Aġenda ta' politika taż-ŻER 2022-2024
• Żona Ewropea tar-Riċerka (informazzjoni ġenerali)

L-isfruttar tal-potenzjal tal-bijoekonomija tal-Ewropa Ċentrali u tal-Lvant

Il-ministri approvaw ukoll il-konklużjonijiet tal-Kunsill dwar inizjattiva potenzjali tar-riċerka u l-innovazzjoni mal-Ewropa kollha dwar l-avvanz tal-ġestjoni sostenibbli tar-riżorsi naturali, is-sigurtà tas-sistemi tal-ikel u l-implimentazzjoni tal-bijoekonomija, filwaqt li jiġi sfruttat il-potenzjal tal-Ewropa Ċentrali u tal-Lvant.

Il-konklużjonijiet tal-Kunsill jenfasizzaw il-produzzjoni sostenibbli tal-bijomassa bħala essenzjali biex jintlaħqu l-għanijiet tal-Patt Ekoloġiku Ewropew għall-2030 u l-2050 u biex tingħata spinta lill-kompetittività tal-Ewropa permezz ta' bijoekonomija ċirkolari. It-test jappella għal aktar kollaborazzjoni tranżnazzjonali, b'mod partikolari mal-pajjiżi ġirien (il-Balkani tal-Punent u l-pajjiżi kandidati), biex jiġu indirizzati l-isfidi fil-ġestjoni tar-riżorsi u s-sigurtà tal-ikel, u jirrikonoxxi l-ħidma tal-BIOEAST, inizjattiva li tgħaqqad lill-pajjiżi tal-Ewropa Ċentrali u tal-Lvant biex titrawwem il-bijoekonomija ċirkolari, għar-rwol tagħha fil-koordinazzjoni tar-riċerka rilevanti. Fl-aħħar nett, il-konklużjonijiet jistiednu lill-Kummissjoni tivvaluta l-ħtieġa u l-fattibbiltà ta' inizjattiva potenzjali ġdida tar-R&I fil-qasam tal-bijoekonomija.

• Konklużjonijiet tal-Kunsill dwar it-tisħiħ tal-kompetittività tal-UE, it-tisħiħ taż-Żona Ewropea tar-Riċerka u li tingħeleb il-frammentazzjoni tagħha
• Sit web ta' BIOEAST

Materjali avvanzati

Il-ministri approvaw ukoll il-konklużjonijiet tal-Kunsill dwar il-komunikazzjoni tal-Kummissjoni dwar materjali avvanzati.

Il-Kunsill jilqa' l-komunikazzjoni tal-Kummissjoni dwar id-domanda dejjem tikber għal materjali avvanzati fl-Ewropa u jappella għal riċerka u innovazzjoni (R&I) aċċellerati biex tkompli tiġi żviluppata l-ekosistema tal-materjali avvanzati. Dawn il-materjali għandhom ikunu sikuri, sostenibbli u effiċjenti fl-użu tar-riżorsi biex jappoġġaw lill-Patt Ekoloġiku u l-ekonomija ċirkolari. Il-Kunsill jistieden lill-Kummissjoni u lill-istati membri jtejbu s-sigurtà tar-riċerka, jidentifikaw objettivi komuni u jaġġornaw l-oqsma prijoritarji tar-R&I, kif meħtieġ. Iqis is-suġġeriment li tinħoloq infrastruttura diġitali għall-materjali avvanzati, li tibni fuq infrastrutturi eżistenti bħall-EuroHPC u l-Cloud Ewropew tax-Xjenza Miftuħa. Il-Kunsill jitlob lill-Kummissjoni tevita piż amministrattiv għall-istati membri meta tistabbilixxi Kunsill tat-Teknoloġija għall-Materjali Avvanzati. Jenfasizza l-ħtieġa ta' investiment pubbliku u privat, bl-użu ta' inizjattivi bħas-sħubija "Materjali Innovattivi għall-UE" jew Proġetti ta' Interess Ewropew Komuni biex jiġi attirat finanzjament privat. Il-Kunsill jappella wkoll għal sinerġiji aktar b'saħħithom bejn il-fondi tal-UE, għal appoġġ għall-innovaturi u l-SMEs, u għall-iżvilupp tal-ħiliet tal-forza tax-xogħol, filwaqt li jinnota t-tnedija ta' "Akkademja ta' Materjali Avvanzati." Fl-aħħar nett, jenfasizza l-implikazzjonijiet etiċi u dawk għas-soċjetà tal-materjali avvanzati, inkluż l-impatt tagħhom fuq is-saħħa u l-ambjent.

• Konklużjonijiet tal-Kunsill dwar il-komunikazzjoni tal-Kummissjoni dwar materjali avvanzati

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN BG ES CS DA ET EL FR GA HR IT LV LT HU NL PL PT RO SK SL FI SV
• Komunikazzjoni dwar materjali avvanzati għat-tmexxija industrijali

Il-kontribut tar-riċerka u l-innovazzjoni għall-kompetittività tal-UE

Il-ministri kellhom dibattitu ta' orjentazzjoni dwar il-kontribut tar-riċerka u l-innovazzjoni għall-kompetittività tal-UE. Id-dibattitu kien iggwidat minn nota mħejjija mill-presidenza Ungeriża.

In-nota tfakkar li r-rapport ta' Mario Draghi "The future of European competitiveness" jissottolinja r-rwol kritiku tar-riċerka u l-innovazzjoni biex tiġi mmotivata l-produttività u l-kompetittività tal-Ewropa, u jenfasizza l-ħtieġa li jiġi eliminat id-distakk fl-innovazzjoni ma' ekonomiji globali oħra. Ir-rapport ta' Draghi jipproponi diversi miżuri biex jiġu indirizzati n-nuqqasijiet tal-innovazzjoni Ewropea u biex l-ekosistema tibda timxi 'l quddiem.

Dawn jinkludu:

• it-titjib tal-finanzjament tal-innovazzjoni, tan-negozji ġodda u tan-negozji li qed jespandu
• it-tħejjija tal-10 programm qafas għar-R&I li għandu jkun aktar sempliċi u aktar effettiv
• il-promozzjoni tal-eċċellenza akkademika l-investiment f'infrastruttura tar-riċerka minn ta' quddiem nett fix-xena globali
• koordinazzjoni aħjar tal-politiki biex tintlaħaq il-mira li 3 % tal-PDG jiġi ddedikat għar-R&D is-simplifikazzjoni tal-qafas regolatorju

Il-ministri esprimew l-opinjonijiet tagħhom dwar tliet kwistjonijiet:

• il-punti ewlenin tar-rapport ta' Draghi, u kif għandhom jiġu implimentati
• il-promozzjoni tal-eċċellenza filwaqt li jiġu ppreservati l-inklużività, l-aċċessibbiltà u l-qsim tal-benefiċċji u l-prosperità tar-R&I
• modi kif jista' jiġi ingranat il-kapital privat tar-R&I

Il-ministri kollha laqgħu l-analiżi tar-rapport ta' Draghi u qablu li r-riċerka u l-innovazzjoni huma essenzjali biex tittejjeb il-kompetittività tal-UE u jitnaqqas id-distakk fl-innovazzjoni mal-atturi ekonomiċi globali ewlenin. Ħafna ministri spjegaw il-miżuri li ttieħdu biex tintlaħaq il-mira li 3 % tal-PDG jiġi ddedikat għar-riċerka. Madankollu, skont ħafna delegazzjonijiet, l-investiment privat ser ikun essenzjali biex tintlaħaq din il-mira. Il-ministri appellaw għal qafas aħjar biex jiġi attirat l-investiment privat b'inqas piż amministrattiv, aktar inċentivi u unjoni tas-swieq kapitali reali. Il-presidenza appellat biex jinstab kompromess bejn l-eċċellenza u l-inklużività fil-politika tar-riċerka. Fl-aħħar nett, ħafna delegazzjonijiet qablu li wasal iż-żmien li tittieħed azzjoni.

Affarijiet oħra

L-indipendenza tal-Kunsill Ewropew tar-Riċerka (ERC)

Id-delegazzjoni Daniża, bl-appoġġ ta' 22 delegazzjoni oħra, tat informazzjoni dwar "It-tisħiħ tal-indipendenza tal-Kunsill Ewropew tar-Riċerka (ERC)".

Programm tal-presidenza li jmiss

Il-Kunsill ġie infurmat mid-delegazzjoni Pollakka dwar il-programm ta' ħidma tal-presidenza tagħha fil-qasam tar-riċerka u l-innovazzjoni.

Spazju

It-tisħiħ tal-kompetenzi Ewropej fis-settur spazjali

Il-ministri approvaw il-konklużjonijiet tal-Kunsill dwar "it-tisħiħ tal-kompetenzi Ewropej fis-settur spazjali".

Taħt il-presidenza tal-ministru tal-Istat Richárd Szabados, il-ministri għall-formazzjoni spazjali qablu li s-settur spazjali għandu rwol kruċjali fl-appoġġ tal-għanijiet ekonomiċi, soċjali, ambjentali, teknoloġiċi u ta' sigurtà tal-UE. Madankollu, hemm ħtieġa urġenti li jissaħħu l-kapaċitajiet tal-Ewropa f'dan il-qasam biex jinżammu l-kompetittività, it-tmexxija u l-indipendenza tagħha.

Il-konklużjonijiet jenfasizzaw l-importanza ta' approċċ komprensiv li jinkludi:

• l-iżvilupp tal-ħiliet,
• oqfsa regolatorji,
• kollaborazzjoni internazzjonali biex jiġi żgurat li l-Ewropa tibqa' fuq quddiem nett tat-teknoloġija tal-ispazju.

Il-konklużjonijiet jenfasizzaw il-ħtieġa ta' passi proattivi, bħall-investiment fl-edukazzjoni STEM (xjenza, teknoloġija, inġinerija u matematika) u l-ħolqien ta' sinerġiji bejn in-negozji, l-universitajiet u l-istituzzjonijiet pubbliċi. Dawn l-azzjonijiet mistennija jrawmu l-innovazzjoni, is-sostenibbiltà u r-reżiljenza fis-settur spazjali tal-Ewropa. Il-konklużjonijiet jappellaw ukoll għal inqas dipendenza fuq teknoloġiji mhux Ewropej biex jiġu protetti l-interessi tal-Unjoni u biex tissaħħaħ il-kapaċità tagħha li taġixxi b'mod indipendenti fix-xena globali u trawwem kultura ta' titjib u eċċellenza kontinwi fis-settur spazjali.

Valutazzjoni ta' nofs it-terminu tal-Programm Spazjali

Il-ministri approvaw il-konklużjonijiet tal-Kunsill dwar "l-evalwazzjoni interim tal-programm spazjali tal-Unjoni Ewropea".

Il-konklużjonijiet tal-Kunsill "L-evalwazzjoni interim tal-programm spazjali tal-Unjoni Ewropea" janalizzaw is-sejbiet ta' rapport dwar l-implimentazzjoni tal-Programm Spazjali tal-UE u dwar il-prestazzjoni tal-Aġenzija tal-UE għall-Programm Spazjali (EUSPA), li l-Kummissjoni ppubblikat f'Lulju 2024. Il-Programm Spazjali ġie stabbilit għall-perjodu 2021–2027 biex jimplimenta attivitajiet fl-ispazju fl-oqsma tal-osservazzjoni tad-dinja, in-navigazzjoni bis-satellita, l-Għarfien tas-Sitwazzjoni fl-Ispazju (SSA), il-Komunikazzjoni Governattiva bis-Satellita (GOVSATCOM), il-konnettività, ir-riċerka u l-innovazzjoni spazjali, u biex jappoġġa kapaċità awtonoma, sigura u kosteffiċjenti ta' aċċess għall-ispazju, filwaqt li jitqiesu l-interessi essenzjali tas-sigurtà tal-Unjoni; kif ukoll biex irawwem l-iżvilupp ta' ekonomija spazjali tal-Unjoni b'saħħitha, inkluż billi jappoġġa l-ekosistema spazjali u billi jsaħħaħ il-kompetittività, l-innovazzjoni, l-intraprenditorija, il-ħiliet u t-tisħiħ tal-kapaċitajiet fl-istati membri u r-reġjuni kollha tal-Unjoni, u jistabbilixxi l-Aġenzija tal-UE għall-Programm Spazjali (EUSPA). Il-konklużjonijiet tal-Kunsill iqisu l-progress li sar fl-implimentazzjoni tal-Programm Spazjali tal-UE, janalizzaw il-ħidma tal-EUSPA u jidentifikaw il-prijoritajiet għall-ħidma fil-futur. Il-konklużjonijiet iħeġġu azzjoni kontra t-theddid dejjem jikber għas-sikurezza u r-reżiljenza tal-programm u jappellaw għal inqas dipendenza u awtonomija msaħħa.

• Konklużjonijiet tal-Kunsill dwar "L-evalwazzjoni interim tal-programm spazjali tal-Unjoni Ewropea"

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Rapport dwar l-implimentazzjoni tal-programm spazjali tal-UE u dwar il-prestazzjoni tal-aġenzija tal-UE għall-programm spazjali
• Sit web tal-EUSPA

Il-futur tal-politika spazjali tal-UE

Il-ministri kellhom skambju ta' fehmiet dwar "il-futur tal-politika spazjali tal-UE – Sinerġiji tad-difiża ma' Programm Spazjali ċivili".

Id-dibattitu ta' orjentazzjoni ffoka fuq l-aspetti strateġiċi u ta' sigurtà tal-politika spazjali, wara l-adozzjoni tal-istrateġija spazjali tal-UE għas-sigurtà u d-difiża (EUSSSD) f'Marzu 2023. Id-diskussjoni kienet iggwidata minn dokument imħejji mill-presidenza Ungeriża li identifika lill-ispazju bħala qasam strateġiku u kkontestat.

Il-ministri qasmu l-opinjonijiet tagħhom dwar tliet suġġetti:

• l-evoluzzjonijiet possibbli tal-Programm Spazjali biex jiġu indirizzati l-isfidi dejjem jikbru għas-sigurtà fl-Ewropa
• it-tisħiħ tar-reżiljenza u s-sigurtà tal-infrastrutturi spazjali tal-UE fil-kuntest tal-oqfsa attwali ta' sorveljanza ċivili
• kunsiderazzjonijiet dwar liema teknoloġiji b'użu doppju għandhom jingħataw prijorità u l-passi biex jiġi żgurat allinjament mal-għanijiet ta' sostenibbiltà

Ħafna delegazzjonijiet enfasizzaw il-ħtieġa li tiġi aġġornata l-perċezzjoni tal-politika Ewropea rigward l-ispazju biex jinżamm il-pass max-xenarju ġeopolitiku internazzjonali li qed jinbidel malajr. Diversi delegazzjonijiet indikaw li l-kunsiderazzjonijiet ta' użu doppju — l-użu ta' assi spazjali kemm għal skopijiet ċivili kif ukoll għal dawk militari jew ta' sigurtà — ser isiru dejjem aktar importanti fil-politika spazjali futura. Madankollu, f'konformità mal-Istrateġija Spazjali tal-UE għas-Sigurtà u d-Difiża, il-biċċa l-kbira tal-ministri qablu li l-programm spazjali tal-UE għandu jipprovdi aktar servizzi lill-utenti tad-difiża, filwaqt li jibqa' jinżamm il-kontroll ċivili. F'dan il-kuntest, il-Liġi Spazjali tal-UE li ġejja, il-Programm Spazjali li jmiss, u l-inizjattivi spazjali emblematiċi tal-UE għandhom iqisu l-ħtiġijiet ta' użu doppju biex jiżguraw ir-reżiljenza u s-sigurtà tas-sistemi spazjali tal-UE, jippreservaw is-sovranità teknoloġika fl-ispazju, u jsaħħu l-awtonomija strateġika ġenerali.

• Sit web tas-SEAE dwar l-istrateġija spazjali tal-UE għas-sigurtà u d-difiża
• Nota mill-presidenza dwar "Il-futur tal-politika spazjali tal-Unjoni"

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN DA IT PT

Affarijiet oħra

Programm tal-presidenza li jmiss

Il-Kunsill ġie infurmat mid-delegazzjoni Pollakka dwar il-programm ta' ħidma tal-presidenza li jmiss fil-qasam tal-ispazju.

• Riċerka u żvilupp teknoloġiku (informazzjoni ġenerali)
• Politika spazjali tal-UE (informazzjoni ġenerali)