Kunsill Affarijiet Ekonomiċi u Finanzjarji, 16/11/2016, 16 ta' Novembru 2016

Riżultati ewlenin

Il-Kunsill u l-Parlament Ewropew laħqu qbil dwar il-baġit tal-UE għall-2017. L-impenji totali ġew stabbiliti għal €157.88 biljun u l-pagamenti għal €134.49 biljun.

Biex tiġi indirizzata l-kriżi tal-migrazzjoni u tissaħħaħ is-sigurtà l-Kunsill u l-Parlament qablu li jżidu l-impenji b’madwar 11.3 % meta mqabbla mal-2016 biex jilħqu €5.91 biljun. Il-flus ser jintużaw biex jgħinu lill-istati membri fir-risistemazzjoni tar-refuġjati, il-ħolqien ta’ ċentri ta’ akkoljenza, l-appoġġ għal miżuri ta’ integrazzjoni u r-ripatrijazzjoni ta’ dawk li ma għandhomx dritt jibqgħu. Dawn ser jgħinu wkoll biex tissaħħaħ il-protezzjoni tal-fruntieri, il-prevenzjoni tal-kriminalità, attivitajiet ta’ kontra t-terroriżmu u l-protezzjoni ta’ infrastruttura kritika.

Kien hemm qbil dwar impenji ta’ €21.3 biljun biex tingħata spinta lit-tkabbir ekonomiku u jinħolqu impjiegi ġodda taħt is-subintestatura 1a (kompetittività għat-tkabbir u l-impjiegi). Din hija żieda ta' madwar 12% meta mqabbla mal-2016. Din il-parti tal-baġit tkopri strumenti bħal Erasmus+ li jiżdied bi 19 % għal €2.1 biljun u l-fond Ewropew għal investimenti strateġiċi li jiżdied b’25 % għal €2.7 biljun. Il-baġit tal-UE għall-2017 jinkludi wkoll €500.00 miljun f’impenji għall-inizjattiva favur l-impjieg taż-żgħażagħ biex tgħin liż-żgħażagħ isibu xogħol. Kien hemm qbil dwar €500.00 miljun oħra biex ikunu appoġġati l-bdiewa tal-ħalib u tal-bhejjem b’miżuri ta’ appoġġ addizzjonali mħabbra f’Lulju.

Is-saħħa tal-baġit tal-UE għall-2017 tinsab fl-iffukar tiegħu fuq miżuri ta’ prijorità bħall-indirizzar tal-migrazzjoni, inkluż l-indirizzar tal-kawżi ewlenin tagħha, u t-tħeġġiġ tal-investiment bħala mezz biex jgħin biex jiġu stimulati t-tkabbir u l-ħolqien tal-impjiegi. Dan jimmassimizza l-impatt tal-baġit għall-benefiċċju tal-kontribwenti tal-UE, għaċ-ċittadini u l-kumpanniji Ewropej. U jirrispetta l-isforzi kontinwi tal-istati membri li jikkonsolidaw il-finanzi pubbliċi tagħhom.

Ivan Lesay, segretarju tal-istat għall-finanzi tas-Slovakkja u President tal-Kunsill

Il-baġit tal-UE għall-2017 mistenni li jiġi adottat formalment mill-Kunsill fid-29 ta’ Novembru, u mill-Parlament fl-1 ta’ Diċembru.

• Il-baġit tal-UE għall-2017
• Kif jaħdem il-baġit tal-UE