Kunsill Affarijiet Ekonomiċi u Finanzjarji, 06/12/2016, 6 ta' Diċembru 2016

Riżultati ewlenin

Evitar tat‑taxxa korporattiva: Diskrepanzi ibridi

Il-Kunsill għamel progress ulterjuri fil-prevenzjoni tal-evitar tat-taxxa korporattiva, hekk kif laħaq kunsens wiesa' dwar abbozz ta' direttiva mmirata lejn l-eliminazzjoni tad-'diskrepanzi ibridi' mas-sistemi fiskali ta' pajjiżi terzi.

Wara diskussjonijiet intensivi, il-Kunsill qabel fuq test stabbli għall-biċċa l-kbira tad-dispożizzjonijiet, u tħallew biss żewġ kwistjonijiet biex jiġu solvuti fil-ġimgħat li ġejjin: regoli li jippermettu lill-istati membri japplikaw eżenzjonijiet limitati u d-data ta' implimentazzjoni.

"Din id-direttiva ser iżżomm lill-kontribwenti ta' taxxa korporattiva milli jisfruttaw id-diskrepanzi bejn ġurisdizzjonijiet tat-taxxa sabiex inaqqsu r-responsabbiltà fiskali globali tagħhom", qal Peter Kažimír, Ministru Slovakk għall-finanzi u president tal-Kunsill. "Dawn l-arranġamenti huma mifruxa u jwasslu għal erożjoni sostanzjali tal-bażijiet taxxabbli ta' kontribwenti tat-taxxa korporattiva fl-UE”.

"Xogħolna hawnhekk juri li aħna serji dwar il-ġlieda kontra prattiki illeċiti fil-qasam tat-taxxa kemm fil-livell tal-UE kif ukoll f'dak globali, f'koordinazzjoni u kooperazzjoni mal-G20 u l-OECD", huwa stqarr.

Pjan ta' investiment għall-Ewropa

Il-Kunsill qabel dwar il-pożizzjoni tiegħu dwar proposta biex jiġi estiż it-tul ta' ħajja tal-fond Ewropew għall-investimenti strateġiċi (FEIS), l-inizjattiva ewlenija tal-UE taħt il-pjan ta' Investiment tagħha għall-Ewropa.

Huwa qabel li jestendi l-fond kemm f'termini ta' tul ta' żmien kif ukoll ta' kapaċità finanzjarja, b'mira ta' investiment ta' nofs triljun euro għall-2020. Il-proposta tintroduċi wkoll titjib operazzjonali biex jittieħed kont tat-tagħlimiet meħuda mill-ewwel sena ta' implimentazzjoni.

Ser jibdew taħditiet mal-Parlament Ewropew ladarba l-Parlament ikun laħaq qbil dwar il-pożizzjoni ta' negozjar tiegħu.

"L-Ewropa qed tiffaċċa ħafna sfidi bħalissa u l-ħtieġa li tingħata spinta lill-investiment hija waħda minnhom. Jeħtieġ li nagħmlu l-parti tagħna", qal is-Sur Kažimír. "Il-ftehim tal-lum ifisser li qed inwettqu waħda mill-prijoritajiet prinċipali tagħna, skont il-pjan direzzjonali ta' Bratislava maqbul f'Settembru. Huwa wkoll pass kruċjali fid-direzzjoni t-tajba."

"Ninsab fiduċjuż li FEIS akbar, aktar intelliġenti u aktar effettiv appoġġat minn unjoni tas-swieq kapitali li tiffunzjona sew huwa triq tajba 'l quddiem", huwa qal.

Il-Kunsill adotta wkoll konklużjonijiet dwar l-ostakli għall-investiment, tema ewlenija oħra tal-pjan ta' investiment.

Huwa appella lill-Kummissjoni biex tieħu kont tal-ostakli għall-investiment fir-rakkomandazzjonijiet tagħha dwar il-politika ekonomika, u lill-istati membri biex jimplimentaw bis-sħiħ dawk ir-rakkomandazzjonijiet.

Tassazzjoni: Informazzjoni dwar is-sjieda benefiċjarja

Il-Kunsill adotta direttiva li tagħti aċċess lill-awtoritajiet tat-taxxa għal informazzjoni miżmuma mill-awtoritajiet responsabbli għall-prevenzjoni tal-ħasil tal-flus.

Id-direttiva ser tippermetti lill-awtoritajiet tat-taxxa jkollhom aċċess għall-informazzjoni dwar is-sjieda benefiċjarja ta' kumpaniji fil-monitoraġġ tal-applikazzjoni xierqa tar-regoli ta' tassazzjoni.

B'hekk ser tgħin fil-prevenzjoni tal-evażjoni tat-taxxa u l-frodi tat-taxxa.