"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għall-ekonomija u l-finanzi, 19 ta' Jannar 2021
Riżultati ewlenin
Faċilità għall-Irkupru u r-Reżiljenza
Il-ministri kellhom skambju ta' fehmiet dwar l-implimentazzjoni tal-Faċilità għall-Irkupru u r-Reżiljenza.
Il-presidenza ddeskriviet l-elementi ewlenin tal-ftehim mal-Parlament Ewropew u l-passi li jmiss. Il-Kummissjoni pprovdiet informazzjoni orizzontali dwar it-tħejjija tal-pjanijiet nazzjonali u l-ministri qasmu l-esperjenzi tagħhom rigward it-tħejjijiet.
Il-Parlament Ewropew mistenni jivvota dwar ir-regolament li jistabbilixxi l-faċilità fis-sessjoni plenarja tiegħu ta' Frar, qabel l-adozzjoni formali mill-Kunsill. Il-faċilità hija mistennija tidħol fis-seħħ fit-tieni nofs ta' Frar, u wara dan l-istati membri jkunu jistgħu jibdew jissottomettu l-pjanijiet tagħhom għall-irkupru u r-reżiljenza b'mod uffiċjali.
Il-Faċilità għall-Irkupru u r-Reżiljenza hija element ewlieni tar-rispons tal-Ewropa għall-pandemija tal-COVID-19. Il-ħidma għall-implimentazzjoni rapida u bla xkiel tagħha hija għalhekk prijorità ewlenija għall-presidenza Portugiża. Matul il-mandat tagħna, aħna ser nagħmlu kull sforz biex nappoġġaw il-proċess ta' tħejjija u approvazzjoni tal-pjanijiet nazzjonali għall-irkupru u r-reżiljenza, li huma kruċjali għall-irkupru ekonomiku tal-Ewropa u għat-tranżizzjonijiet ekoloġiċi u diġitali inklużivi tagħha.
João Leão, Ministru tal-Istat għall-Finanzi tal-Portugall (ritratt: il-Gvern Portugiż))
Faċilità għall-Irkupru u r-Reżiljenza (Infografika)
Il-Kummissjoni ppreżentat il-komunikazzjoni tagħha dwar l-indirizzar tas-self improduttiv (NPLs) wara l-pandemija tal-COVID-19. Il-ministri kellhom dibattitu ta' orjentazzjoni dwar il-pjan ta' azzjoni.
Is-self improduttiv huwa self minn bank li jkun skada b'aktar minn 90 jum jew li x'aktarx ma jitħallasx lura kollu mingħajr il-ħtieġa ta' bejgħ ta' kollateral. Il-kriżi tal-COVID-19 mistennija li twassal biex il-proporzjon tiegħu jiżdied. Fil-komunikazzjoni l-ġdida tagħha, li tibni fuq il-pjan ta' azzjoni maqbul mill-Kunsill fl-2017, il-Kummissjoni tipproponi li tindirizza l-kwistjoni permezz ta' sensiela ta' azzjonijiet u miżuri b'erba' għanijiet ewlenin:
L-iżvilupp ulterjuri ta' swieq sekondarji għal assi f'diffikultà
Il-konverġenza tal-oqfsa tal-insolvenza madwar l-UE
L-appoġġ għall-istabbiliment u l-kooperazzjoni ta' kumpaniji nazzjonali tal-immaniġġjar tal-assi
L-implimentazzjoni ta' miżuri ta' prekawzjoni
Matul id-dibattitu, il-ministri qablu dwar il-ħtieġa li titlesta l-implimentazzjoni tal-miżuri pendenti mill-pjan ta' azzjoni tal-2017. Il-presidenza enfasizzat l-għan tagħha li tagħmel progress rapidu f'dak li għandu x'jaqsam mal-proposti leġiżlattivi rigward is-swieq sekondarji għall-NPLs u l-infurzar extraġudizzjarju aċċellerat tal-kollateral, ladarba l-Parlament Ewropew ikun lest.
Il-ħidma ser tkompli tibni fehma komuni f'oqsma oħra.
Il-presidenza Portugiża ppreżentat il-prijoritajiet tagħha għall-affarijiet ekonomiċi u finanzjarji għat-tul tal-mandat tagħha, li jibda minn Jannar sa Ġunju 2021.
Fil-qasam tal-affarijiet ekonomiċi u finanzjarji, il-prijoritajiet ser jiġu segwiti fi tliet oqsma ewlenin:
Spinta mill-ġdid tal-ekonomija fl-Ewropa, fejn il-prijorità ewlenija tal-Presidenza ser tkun l-implimentazzjoni tal-Faċilità għall-Irkupru u r-Reżiljenza. Ser ikollha wkoll rwol attiv fl-adattament tas-Semestru Ewropew għall-irkupru u tmexxija 'l quddiem b'inizjattivi relatati ma' self improduttiv.
It-tisħiħ tal-Unjoni Ekonomika u Monetarja, fejn il-presidenza ser tmexxi 'l quddiem id-diskussjonijiet dwar l-inizjattivi tal-Unjoni Bankarja, b'mod partikolari l-istabbiliment ta' skema Ewropea ta' assigurazzjoni tad-depożiti, u dwar l-approfondiment tal-Unjoni tas-Swieq Kapitali. Barra minn hekk, qed tippjana li tibda diskussjonijiet dwar emendi għad-Direttiva u r-Regolament dwar ir-Rekwiżiti ta' Kapital, kif ukoll il-proposti leġiżlattivi dwar il-prevenzjoni tal-ħasil tal-flus u l-finanzjament tat-terroriżmu.
L-indirizzar ta' sfidi ġodda, inkluż it-tranżizzjonijiet ekoloġiċi u diġitali, fejn l-enfasi ser tkun fuq l-avvanz tal-Pakkett dwar il-Finanzi Diġitali, il-ħidma fuq Strateġija Mġedda għall-Finanzi Sostenibbli u t-tkomplija tal-ħidma fuq l-isfidi tat-taxxa relatati mal-ekonomija diġitali. Il-presidenza ser tibda wkoll diskussjonijiet dwar l-introduzzjoni ta' riżorsi proprji ġodda u segwitu dwar il-pjan ta' azzjoni tal-Unjoni Doganali.
Bħala parti mill-eżerċizzju tas-Semestru Ewropew tal-2021, il-ministri kellhom skambju ta' fehmiet rigward il-konklużjonijiet dwar ir-rapport dwar il-mekkaniżmu ta' twissija tal-2021 u l-abbozz ta' rakkomandazzjoni dwar il-politika ekonomika taż-żona tal-euro. Id-dokumenti mistennija jiġu approvati wara l-vidjokonferenza, jew f'laqgħa fiżika tal-Kunsill inkella permezz ta' proċedura bil-miktub. Wara l-approvazzjoni tagħha, ir-rakkomandazzjoni għaż-żona tal-euro ser tintbagħat lill-Kunsill Ewropew f'Marzu għall-approvazzjoni.
Il-ministri qiesu l-ħidma li saret fuq proposti leġiżlattivi fil-qasam tas-servizzi finanzjarji. Il-presidenza enfasizzat il-ħidma li jmiss fuq il-proposti li jikkonċernaw is-swieq sekondarji għal self improduttiv, l-iskema Ewropea ta' assigurazzjoni tad-depożiti, id-direttiva dwar l-assigurazzjoni tal-vetturi bil-mutur u l-pakkett FinTech.
Il-president tal-Bank Ewropew tal-Investiment, Werner Hoyer, ippreżenta s-sejbiet ewlenin tal-aħħar Stħarriġ dwar l-Investiment tal-BEI.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-Faċilità għall-Irkupru u r-Reżiljenza hija element ewlieni tar-rispons tal-Ewropa għall-pandemija tal-COVID-19. Il-ħidma għall-implimentazzjoni rapida u bla xkiel tagħha hija għalhekk prijorità ewlenija għall-presidenza Portugiża. Matul il-mandat tagħna, aħna ser nagħmlu kull sforz biex nappoġġaw il-proċess ta' tħejjija u approvazzjoni tal-pjanijiet nazzjonali għall-irkupru u r-reżiljenza, li huma kruċjali għall-irkupru ekonomiku tal-Ewropa u għat-tranżizzjonijiet ekoloġiċi u diġitali inklużivi tagħha.
