Kunsill Ambjent, 26/06/2019, 26 ta' Ġunju 2019

Riżultati ewlenin

Sustanzi kimiċi

Il-ministri għall-ambjent adottaw konklużjonijiet li joffru gwida politika dwar l-iżvilupp ta' strateġija ta' politika sostenibbli tal-UE dwar is-sustanzi kimiċi. Il-konklużjonijiet jindirizzaw b'mod partikolari t-temi tar-REACH, l-interferenti endokrinali, in-nanomaterjali u l-farmaċewtiċi.

Dawn il-konklużjonijiet importanti u dettaljati ser jiggwidaw l-istrateġija ta' politika sostenibbli tal-UE dwar is-sustanzi kimiċi b'attenzjoni partikolari għall-protezzjoni tas-saħħa tal-bniedem u tal-ambjent permezz ta' ġestjoni tajba tas-sustanzi kimiċi. Graţiela Leocadia Gavrilescu, Viċi Prim Ministru u Ministru għall-Ambjent tar-Rumanija

Il-konklużjonijiet jenfasizzaw ukoll il-ħtieġa li jittejbu u jiġu integrati l-valutazzjoni tar-riskji kimiċi u l-ġestjoni tas-sustanzi kimiċi fil-leġislazzjoni kollha tal-UE sabiex tiżdied il-koerenza u l-effettività tal-leġislazzjoni tal-UE relatata mas-sustanzi kimiċi.

Il-ministri enfasizzaw il-ħtieġa li jiġi żviluppat mekkaniżmu rilevanti li jikkoordina l-protezzjoni ta' gruppi vulnerabbli bħat-tfal u n-nisa tqal u li qed ireddgħu, u qablu li dan għandu jinkludi l-introduzzjoni ta' rekwiżiti konsistenti tal-ġestjoni tar-riskju fil-leġislazzjoni rilevanti tal-UE dwar sustanzi ta' tħassib, inkluż newrotossini u interferenti endokrinali.

• Konklużjonijiet tal-Kunsill dwar is-sustanzi kimiċi (26/06/2019)

Użu mill-ġdid tal-ilma għat-tisqija agrikola

Fis-26 ta' Ġunju il-Kunsill Ambjent kellu diskussjoni f'seduta pubblika dwar l-użu mill-ġdid tal-ilma. Il-ministri laħqu approċċ ġenerali dwar dan ir-regolament ġdid li jnaqqas ir-riskju ta' nuqqas ta' ilma għat-tisqija tal-għelejjel u jgħin biex l-Ewropa tadatta għall-konsegwenzi tat-tibdil fil-klima.

L-ilma huwa riżorsa prezzjuża. Illum ħadna pass importanti biex indaħħlu fis-seħħ regoli ġodda li jippermettulna nirreklamaw l-ilma b'mod li hu sikur għall-bnedmin u l-annimali, u ta' ġid għall-ambjent. Huwa loġiku li niffissaw standards minimi armonizzati għall-kwalità tal-ilma reklamat u għall-monitoraġġ tal-konformità sabiex il-bdiewa tagħna jkunu jistgħu jużaw ilma bħal dan b'mod sigur għat-tisqija. Dan jinkludi li nitgħallmu mill-esperjenza ta' wħud mill-istati membri li ilhom għexieren ta' snin jerġgħu jużaw l-ilma b'suċċess. Ioan Deneș, Ministru għall-Ilmijiet u l-Foresti tar-Rumanija

• Użu tal-ilma mill-ġdid għat-tisqija agrikola: Il-Kunsill jaqbel dwar l-approċċ ġenerali (stqarrija għall-istampa, 26/06/2019)

Rieżami tal-Implimentazzjoni Ambjentali

Waranofsinhar, il-Kunsill kellu skambju ta' fehmiet dwar is-sejbiet taċ-ċiklu tar-Rieżami tal-Implimentazzjoni Ambjentali (EIR) tal-2019. L-istati membri kellhom djalogu u kooperazzjoni mal-Kummissjoni, u taw feedback prezzjuż lill-Kummissjoni li tkun tista' tuża biex ittejjeb xogħolha. Il-ministri użaw din l-opportunità biex jindirizzaw sfidi komuni u jikkondividu l-aħjar prassi fl-implimentazzjoni tal-politiki u l-leġislazzjoni fil-qasam ambjentali.

Suġġetti oħra fuq l-aġenda

Waqt sessjoni pubblika, il-Kunsill kellu l-opportunità li jisma’ preżentazzjoni mill-Presidenza dwar is-sitwazzjoni attwali taż-żewġ proposti leġislattivi attwali: ir-Regolament LIFE u r-regolament dwar il-monitoraġġ, ir-rappurtar u l-verifika tal-emissjonijiet tal-gassijiet b’effett ta’ serra mit-trasport marittimu. Il-Presidenza infurmat ukoll lill-ministri bis-sitwazzjoni attwali tad-diskussjonijiet dwar viżjoni strateġika fit-tul għal ekonomija newtrali għall-klima u flimkien mal-Kummissjoni rrappurtat dwar ir-riżultati ta' laqgħat internazzjonali importanti. Il-Kummissjoni ppreżentat il-komunikazzjoni tagħha dwar l-abbozz ta' pjanijiet nazzjonali integrati dwar l-enerġija u l-klima. Id-delegazzjoni Netherlandiża infurmat lill-ministri dwar konferenza reċenti dwar l-ipprezzar tal-karbonju u t-taxxi fuq l-avjazzjoni, u d-delegazzjoni Awstrijaka infurmat dwar sessjoni ta' ħidma dwar il-futur tal-Programm ta' Azzjoni Ambjentali. Id-delegazzjoni Bulgara ppreżentat miżuri Ewropej possibbli biex jappoġġaw il-mobbiltà nadifa, speċjalment l-elettromobbiltà, u d-delegazzjoni Franċiża infurmat fil-qosor dwar l-eżitu tal-laqgħa tal-Ministri għall-Ambjent tal-G7 li saret reċentement. Id-delegazzjoni Finlandiża ppreżentat il-programm ta' ħidma tal-Presidenza li jmiss.