"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Vidjokonferenza informali tal-ministri għall-impjiegi u l-politika soċjali, 15 ta' Marzu 2021
Riżultati ewlenin
Illum il-ministri għall-impjiegi u l-politika soċjali ddiskutew firxa wiesgħa ta' fajls, partikolarment il-politika għall-impjiegi u dik soċjali fis-Semestru Ewropew, il-Pjan ta' Azzjoni tal-Pilastru Ewropew tad-Drittijiet Soċjali u l-politika u inizjattivi għall-ugwaljanza u n-nondiskriminazzjoni.
Il-politika għall-impjiegi u dik soċjali fis-Semestru Ewropew fil-kuntest tal-pjanijiet għall-irkupru u r-reżiljenza
Il-ministri qasmu l-fehmiet tagħhom dwar il-politika għall-impjiegi u dik soċjali fis-Semestru Ewropew 2021 fil-kuntest tal-pjanijiet għall-irkupru u r-reżiljenza (PRR). Il-ministri qablu fil-biċċa l-kbira li l-impjiegi u l-protezzjoni soċjali kif ukoll il-ġlieda kontra l-faqar iridu jkunu temi ewlenin fil-PRR tal-istati membri. Miżuri ta' integrazzjoni fis-suq tax-xogħol għal nies li tilfu xogħolhom matul il-pandemija kienu impenn appoġġat minn ħafna ministri.
Il-ministri kkonċentraw partikolarment fuq il-ħtieġa li tingħata spinta lit-taħriġ mill-ġdid u t-titjib tal-ħiliet tal-ħaddiema tal-Ewropa sabiex ikunu jistgħu jibqgħu kompetittivi u biex tiżdied ir-reżiljenza tagħhom għall-isfidi preżenti u futuri. Ħafna ministri enfasizzaw ukoll il-prijorità ċara tagħhom li jindirizzaw il-qgħad fost iż-żgħażagħ u jgħinu liż-żgħażagħ Ewropej jidħlu fis-suq tax-xogħol.
Is-Summit Soċjali li ġej f'Porto ser ikun pass importanti biex il-mudell soċjali tal-Ewropa jmur għal-livell li jmiss. Dan huwa mument kruċjali mhux biss għall-presidenza tagħna iżda għall-UE kollha kemm hi.
Ana Mendes Godinho, Ministru għax-Xogħol, is-Solidarjetà u s-Sigurtà Soċjali tal-Portugall
Pjan ta' Azzjoni tal-Pilastru Ewropew tad-Drittijiet Soċjali
Il-ministri ddiskutew il-Pjan ta' Azzjoni tal-Pilastru Ewropew tad-Drittijiet Soċjali li ġie ppubblikat dan l-aħħar, fejn urew l-appoġġ tagħhom għall-għanijiet tal-pjan li jibni Ewropa aktar soċjali u inklużiva. Id-delegazzjonijiet qiesu l-miri kwalitattivi u kwantitattivi fil-livell tal-UE stabbiliti fil-pjan bħala ambizzjużi ħafna, iżda realistiċi, u ħadu impenn li jaħdmu għal dawn l-għanijiet. Il-ministri laqgħu wkoll ir-reviżjoni proposta tat-tabella ta' valutazzjoni soċjali bħala bażi għall-monitoraġġ tal-implimentazzjoni tal-prinċipji tal-Pilastru fil-qafas tal-proċess tas-Semestru Ewropew.
L-appoġġ għal inizjattivi bħall-garanzija għat-tfal u l-pjattaforma Ewropea għall-ġlieda kontra l-problema ta' persuni bla dar kien qawwi, peress li l-ministri enfasizzaw l-importanza li jiġu indirizzati l-faqar fost it-tfal u l-problema ta' persuni bla dar fl-UE.
Il-ministri ddeskrivew ukoll il-politika attiva tagħhom għas-suq tax-xogħol, li diġà ġiet implimentata jew ippjanata fi ħdan il-pjanijiet tagħhom għall-irkupru u r-reżiljenza, sabiex jiġi appoġġat irkupru sod u li jħares lejn il-futur, u titħejja t-tranżizzjoni diġitali u ekoloġika u jitqiesu wkoll il-bidliet demografiċi tas-soċjetajiet tagħna. It-taħriġ mill-ġdid u t-titjib tal-ħiliet tal-ħaddiema ġew enfasizzati bħala prijorità importanti minn ħafna delegazzjonijiet.
Il-ministri kellhom dibattitu ta' orjentazzjoni dwar modi kif tissaħħaħ l-ugwaljanza, in-nondiskriminazzjoni u d-diversità bħala prijorità politika fl-UE. Bosta ministri għarfu l-fatt li ħafna ċittadini għadhom jesperjenzaw diskriminazzjoni fl-UE u enfasizzaw il-ħtieġa li nkomplu naħdmu fuq il-protezzjoni taċ-ċittadini kollha kontra kull tip ta' diskriminazzjoni. Il-pandemija tal-COVID-19 laqtet lin-nisa u gruppi vulnerabbli oħra sproporzjonament u aggravat id-diskriminazzjoni.
Il-ministri appoġġaw b'mod ġenerali azzjoni fil-livell tal-UE biex timxi 'l quddiem l-ugwaljanza u enfasizzaw l-importanza li l-politika għall-ugwaljanza tiġi integrata f'inizjattivi orizzontali rilevanti. Huma rreferew ukoll għal strateġiji u inizjattivi ta' politika nazzjonali li għandhom l-għan li jipproteġu gruppi differenti suxxettibbli għad-diskriminazzjoni, fost l-oħrajn abbażi tal-ġeneru, l-età, l-orjentazzjoni sesswali, ir-reliġjon jew it-twemmin, l-oriġini etnika jew razzjali u d-diżabbiltà. Għadd ta' ministri enfasizzaw partikolarment l-importanza tal-isforzi biex tiġi promossa l-ugwaljanza bejn il-ġeneri, biex jiġi miġġieled ir-razziżmu, inkluż id-diskriminazzjoni kontra r-Rom u biex jitħarsu d-drittijiet tal-komunità LGBTIQ.
Huwa ta' serħan il-moħħ li naraw li aħna lkoll impenjati favur unjoni ta' valuri u soċjetà sikura, fejn kulħadd jista' jisfrutta il-potenzjal tiegħu. Hemm firxa wiesgħa ta' strateġiji nazzjonali kkonċentrati fuq l-indirizzar tad-diskriminazzjoni u minkejja l-punti ta' tluq differenti fl-istati membri, ninsab kunfidenti li nistgħu neliminaw l-ostakli flimkien.
Mariana Vieira da Silva, Ministru tal-Istat għall-Presidenza tal-Kunsill tal-Ministri tal-Portugall
Affarijiet oħra
Pjattaforma Ewropea għall-ġlieda kontra l-problema ta' persuni mingħajr dar
Il-Kummissjoni għarrfet lill-ministri dwar il-pjattaforma Ewropea ppjanata għall-ġlieda kontra l-problema ta' persuni bla dar u l-presidenza qasmet il-pjanijiet tagħha li tospita konferenza ta' livell għoli dwar il-problema ta' persuni bla dar f'Lisbona fil-21 ta' Ġunju.
Green paper dwar it-tixjiħ
Il-Kummissjoni għarrfet lill-ministri dwar il-green paper dwar it-tixjiħ li ħarġet dan l-aħħar, li tikkonċentra fuq l-indirizzar tal-isfidi demografiċi fl-Ewropa.
Integrazzjoni tat-tixjiħ
Il-presidenza għarrfet lill-ministri dwar l-adozzjoni bi proċedura bil-miktub tal-konklużjonijiet tal-Kunsill dwar l-integrazzjoni tat-tixjiħ. Il-konklużjonijiet jistiednu lill-istati membri biex jelaboraw Qafas Strateġiku nazzjonali għall-Integrazzjoni tat-Tixjiħ kif ukoll inizjattivi oħra li jippermettu lill-anzjani madwar l-UE jgawdu d-drittijiet fundamentali tagħhom u jilħqu l-potenzjal sħiħ tagħhom.
Il-presidenza għarrfet lill-ministri dwar is-Summit Soċjali Tripartitiku li ser isir fl-24 ta' Marzu 2021, eżatt qabel il-Kunsill Ewropew ta' Marzu.
Programmi ta' ħidma għall-2021 tal-Kumitat tal-Impjiegi EMCO u l-KPS
Il-Presidenti tal-Kumitat tal-Impjiegi (EMCO) u tal-Kumitat tal-Protezzjoni Soċjali (KPS), li huma kumitati konsultattivi tal-politika għall-ministri fil-Kunsill EPSCO, għarrfu lill-ministri dwar il-programmi ta' ħidma tagħhom għall-2021 li fil-biċċa l-kbira ser jikkonċentraw fuq il-Pjan ta' Azzjoni tal-Pilastru Ewropew tad-Drittijiet Soċjali.
Rakkomandazzjoni dwar l-ugwaljanza, l-inklużjoni u l-parteċipazzjoni tar-Rom
Il-presidenza għarrfet lill-ministri dwar l-adozzjoni, bi proċedura bil-miktub, tar-Rakkomandazzjoni tal-Kunsill dwar l-ugwaljanza, l-inklużjoni u l-parteċipazzjoni tar-Rom. Ir-rakkomandazzjoni żżid l-impenn tal-istati membri li jiġġieldu b'mod effettiv d-diskriminazzjoni kontra persuni Rom u biex jippromwovu l-inklużjoni tagħhom fl-oqsma ewlenin tal-edukazzjoni, ix-xogħol, is-saħħa u d-djar.
Pjan ta' Azzjoni tal-UE għall-Ġlieda kontra r-Razziżmu 2020-2025
Il-Kummissjoni għarrfet lill-ministri dwar il-Pjan ta' Azzjoni tal-UE għall-Ġlieda kontra r-Razziżmu, inizjalment ippreżentat f'Settembru 2020.
Miżuri vinkolanti ta' trasparenza fil-pagi
Il-Kummissjoni ppreżentat lill-ministri l-aħħar proposta tagħha għal direttiva biex tissaħħaħ l-applikazzjoni tal-prinċipju ta' paga ugwali għal xogħol ugwali jew xogħol ta' valur ugwali bejn l-irġiel u n-nisa permezz ta' trasparenza fil-pagi u mekkaniżmi ta' infurzar.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Is-Summit Soċjali li ġej f'Porto ser ikun pass importanti biex il-mudell soċjali tal-Ewropa jmur għal-livell li jmiss. Dan huwa mument kruċjali mhux biss għall-presidenza tagħna iżda għall-UE kollha kemm hi.
