Kunsill Affarijiet Barranin, 21 ta' Settembru 2020

Riżultati ewlenin

Belarussja

Il-Kunsill kellu skambju ta' fehmiet dwar il-Belarussja, li matulu tenna li l-UE ma rrikonoxxietx l-eżitu tal-elezzjonijiet ta' Awwissu, peress li la kienu ħielsa u lanqas ġusti.

Il-ministri nnotaw id-determinazzjoni u l-perseveranza tal-poplu tal-Belarussja minkejja r-repressjoni, esprimew solidarjetà qawwija miegħu fl-aspirazzjonijiet demokratiċi tiegħu u appellaw għal elezzjonijiet ġodda, ħielsa u ġusti taħt is-superviżjoni tal-OSKE.

Aħna nibqgħu sodi fl-appoġġ tagħna biex il-poplu tal-Belarussja jagħżel lill-mexxej tiegħu u l-futur ta' pajjiżu b'mod ħieles u demokratiku. Aħna m'għandniex aġenda moħbija, mhux qed infittxu li ninterferixxu fl-affarijiet interni tal-pajjiż. Nitolbu biss djalogu nazzjonali dwar kif għandha tissolva l-kriżi attwali u li jkun hemm elezzjonijiet ħielsa u ġusti.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri appoġġaw bis-sħiħ is-sovranità u l-indipendenza tal-Belarussja u appellaw lis-sħab internazzjonali kollha biex ma jinterferixxux fl-affarijiet interni tagħha.

Il-kwistjoni tas-sanzjonijiet ġiet diskussa wkoll u l-ministri tennew ir-rieda politika li jiġu adottati miżuri restrittivi ġodda malajr kemm jista' jkun.

Fl-aħħar nett, il-Kunsill irrieżamina wkoll b'mod ġenerali r-relazzjonijiet tal-UE mal-Belarussja u, f'dan il-kuntest, iddiskuta appoġġ finanzjarju addizzjonali li jista' jingħata lis-soċjetà ċivili u lill-media indipendenti.

Libja

Il-Kunsill imbagħad iddiskuta l-aħħar żviluppi fil-Libja wara t-tħabbiriet li saru fil-21 ta' Awwissu 2020 mill-President tal-Kunsill tal-Presidenza, Fayez al-Serraj, u l-Ispeaker tal-Kamra tar-Rappreżentanti, Aguila Saleh, dwar x'jista' jsir biex tingħeleb il-kriżi Libjana.

Il-ministri identifikaw bħala prijoritajiet ewlenin: l-ilħuq ta' ftehim għalwaqfien permanenti u sostenibbli mill-ġlied fil-qafas tal-proċess immexxi min-NU, it-tneħħija tal-imblokk taż-żejt fil-Libja kollha, u t-tkomplija tad-djalogu politiku.

Il-ministri kellhom ukoll l-opportunità li jitkellmu dwar ir-riżultati tal-Operazzjoni Irini li tnediet reċentement fl-implimentazzjoni tal-embargo tan-NU fuq l-armi.

Barra minn hekk, il-Kunsill adotta sanzjonijiet ġodda mmirati lejn żewġ persuni u tliet entitajiet li jipperikolaw il-paċi u s-sigurtà tal-Libja, jiksru l-embargo fuq l-armi jew iwettqu abbużi tad-drittijiet tal-bniedem.

Unjoni Ewropea-Unjoni Afrikana

Il-Kunsill imbagħad kellu skambju ta' fehmiet dwar ir-relazzjonijiet tal-UE mal-kontropartijiet tagħha tal-Unjoni Afrikana, u ddiskuta modi kif jissaħħu r-relazzjonijiet mal-Afrika fuq perjodu medju u fit-tul kemm mil-lat politiku kif ukoll minn dak ekonomiku.

Il-ministri qablu li jiżviluppaw prijoritajiet strateġiċi konġunti sabiex iwittu t-triq għall-kooperazzjoni fl-għaxar snin li ġejjin, u li jiffokaw fuq riżultati tanġibbli, fl-ispirtu tal-approċċ "Tim Ewropa".

F'dan il-kuntest, il-Kunsill ġie aġġornat ukoll dwar is-sitwazzjoni attwali tan-negozjati ta' wara Cotonou.

Ġrajjiet Kurrenti

Taħt ġrajjiet kurrenti, il-ministri ngħataw informazzjoni dwar il-Venezwela u r-riżultati tal-aħħar laqgħa tal-Grupp ta' Kuntatt Internazzjonali. Il-ministri qablu li l-komunità internazzjonali kellha bżonn timmobilizza l-isforzi kollha biex tgħin lill-poplu tal-Venezwela jsib soluzzjoni paċifika u demokratika għall-kriżi li għaddejja bħalissa, u tindirizza l-ħtiġijiet urġenti tal-popolazzjoni.

Fir-rigward tar-Russja, ir-Rappreżentant Għoli tkellem dwar l-avvelenament tas-Sur Navalny u l-ħtieġa li jkun hemm investigazzjoni internazzjonali urġenti bi trasparenza sħiħa u f'kooperazzjoni sħiħa mal-Organizzazzjoni għall-Projbizzjoni ta' Armi Kimiċi.

Il-ministri rrikonoxxew is-sitwazzjoni diffiċli fil-Libanu u enfasizzaw is-solidarjetà tagħhom mal-poplu, filwaqt li ssottolinjaw il-ħtieġa ta' formazzjoni rapida ta' gvern ġdid.

Fir-rigward taċ-Ċina, il-ministri ngħataw informazzjoni mir-Rappreżentant Għoli dwar il-vidjokonferenza bejn il-Mexxejja tal-UE u taċ-Ċina tal-14 ta' Settembru, b'enfasi fuq is-sitwazzjoni attwali fin-negozjati għal Ftehim Komprensiv dwar l-Investimenti u s-sitwazzjoni dwar id-drittijiet tal-bniedem.

Fl-aħħar nett, fir-rigward tat-Turkija, il-ministri tkellmu fil-qosor dwar is-sitwazzjoni fil-Lvant tal-Mediterran qabel il-Kunsill Ewropew li jmiss. Filwaqt li rrikonoxxew xi passi pożittivi reċenti, huma appellaw lit-Turkija biex tieħu aktar passi biex tnaqqas it-tensjoni.