"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill kellu skambju ta' fehmiet rigward id-diplomazija dwar il-klima u l-enerġija, b'enfasi fuq il-promozzjoni tad-dimensjoni esterna tal-Patt Ekoloġiku Ewropew.
Illum l-Afrika tirrappreżenta biss 2 % tal-emissjonijiet globali, minħabba l-livell baxx ta' konsum tal-enerġija per capita. Dan il-konsum ser ikollu jiżdied. Jekk irridu li l-Afrikani - li n-numru tagħhom qiegħed dejjem jiżdied - ikollhom l-istess livell ta' kwalità tal-ħajja, ser ikollhom iżidu l-konsum tal-enerġija tagħhom u, fl-istess ħin, ma jżidux l-emissjonijiet tas-CO2. Dan ser jeħtieġ sforz enormi u ser ikollna ningħaqdu flimkien mas-sħab Afrikani tagħna. Il-klima ser tkun parti ewlenija mis-sħubija tagħna mal-Afrika.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Matul id-diskussjoni l-ministri ssottolinjaw il-ħtieġa li jkun hemm involviment mal-Afrika u l-importanza ewlenija tal-2021 fit-triq lejn riżultat pożittiv tal-COP26, il-Konferenza tan-Nazzjonijiet Uniti dwar it-Tibdil fil-Klima tal-2021. Ir-Rappreżentant Għoli enfasizza li l-aċċellerazzjoni tal-azzjoni klimatika u l-ġestjoni tat-tranżizzjoni tal-enerġija huma u ser jibqgħu fil-qalba tal-politika estera u ta' sigurtà tal-UE. Il-Kunsill adotta konklużjonijiet dwar dan is-suġġett.
Il-Kunsill kellu diskussjoni mal-Ministru għall-Affarijiet Barranin tal-Ġappun, Toshimitsu Motegi. Huma ddiskutew l-approċċi tagħhom fir-rigward tar-reġjun Indo-Paċifiku, u qablu li involviment akbar tal-UE fir-reġjun, kif ukoll kooperazzjoni msaħħa mal-Ġappun u sħab oħra tal-istess fehma dwar kwistjonijiet ta' interess u ta' tħassib komuni jkunu ta' benefiċċju. F'dan il-kuntest, il-Ġappun u l-UE esprimew l-interess komuni tagħhom biex tiżdied il-kooperazzjoni f'oqsma bħall-konnettività, is-sigurtà marittima, l-ambjent u t-tibdil fil-klima, il-kummerċ u l-investiment, kwistjonijiet diġitali, u l-promozzjoni tal-multilateraliżmu u ż-żamma tal-ordni internazzjonali bbażat fuq ir-regoli. Ir-Rappreżentant Għoli Josep Borrell ikkonferma l-interess tal-UE li tiżviluppa l-approċċ proprju tagħha fir-rigward tar-reġjun Indo-Paċifiku, filwaqt li esprima apprezzament għall-Istrateġija tal-Ġappun għal Reġjun Indo-Paċifiku Ħieles u Miftuħ.
Ir-Rappreżentant Għoli Borrell għarraf lill-ministri dwar ir-Russja u l-avvenimenti marbutin mad-detenzjoni ta' Alexey Navalny. Il-Kunsill ikkundanna d-detenzjonijiet tal-massa u l-brutalità tal-pulizija matul tmiem il-ġimgħa u appella lir-Russja biex teħles immedjatament lis-Sur Navalny u lil dawk kollha li ġew detenuti. F'dan il-kuntest ir-Rappreżentant Għoli informa lill-Kunsill dwar iż-żjara tiegħu li jmiss f'Moska.
Il-ministri mbagħad ġew infurmati dwar l-istrateġija tal-UE għall-kondiviżjoni tal-vaċċini kontra l-COVID-19 mas-sħab tal-UE.
Ninsab konvint bis-sħiħ li distribuzzjoni ġusta tal-vaċċini madwar id-dinja hija parti mis-soluzzjoni, mhux biss għal raġunijiet ta' solidarjetà globali iżda wkoll għas-sigurtà tas-saħħa tagħna stess. M'aħniex ser inkunu sikuri, qabel ma' kulħadd ikun sikur.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill indirizza wkoll ir-relazzjonijiet mal-Istati Uniti, u l-ħidma li l-UE biħsiebha tagħmel mal-amministrazzjoni l-ġdida tal-Istati Uniti dwar kwistjonijiet globali ewlenin – mit-tibdil fil-klima għall-Iran u mill-PAKK għall-kooperazzjoni f'fora multilaterali.
Il-ministri mbagħad iddiskutew l-aspetti kollha tar-relazzjonijiet mat-Turkija kif identifikati fil-Konklużjonijiet tal-Kunsill ta' Diċembru, inkluż is-sanzjonijiet, u affermaw mill-ġdid l-importanza li jkun hemm involviment mat-Turkija sabiex isir progress fil-perkorsi għal djalogu u kooperazzjoni u sabiex dawn jiġu kkonsolidati.
Il-każ ta' Giulio Regeni tqajjem ukoll. Ir-Rappreżentant Għoli enfasizza li din kienet kwistjoni serja għall-UE kollha, u kompla jappella lill-Eġittu biex jikkoopera bis-sħiħ mal-awtoritajiet Taljani, għall-fini tal-akkontabbiltà u biex issir ġustizzja.
Il-Kunsill iddiskuta fil-qosor is-sitwazzjoni tal-migranti fil-Bożnija-Ħerzegovina, u s-sitwazzjoni fil-Qarn tal-Afrika u r-reġjun ta' Tigray.
Affarijiet oħra
Il-Kunsill adotta konklużjonijiet dwar il-Venezwela u l-każ pilota għall-kunċett ta' Preżenzi Marittimi Koordinati fil-Golf tal-Guinea.
Matul ikla informali, il-ministri ddiskutew il-kooperazzjoni bejn l-UE u r-Renju Unit fi kwistjonijiet ta' politika estera, ta' sigurtà u ta' difiża komuni. Ir-Rappreżentant Għoli enfasizza li l-UE tinsab lesta li tinvolvi ruħha mar-Renju Unit dwar kwistjonijiet globali ewlenin – kemm fir-rigward tat-tibdil fil-klima kif ukoll billi taħdem flimkien fuq ir-rispons globali għall-pandemija tal-coronavirus.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Illum l-Afrika tirrappreżenta biss 2 % tal-emissjonijiet globali, minħabba l-livell baxx ta' konsum tal-enerġija per capita. Dan il-konsum ser ikollu jiżdied. Jekk irridu li l-Afrikani - li n-numru tagħhom qiegħed dejjem jiżdied - ikollhom l-istess livell ta' kwalità tal-ħajja, ser ikollhom iżidu l-konsum tal-enerġija tagħhom u, fl-istess ħin, ma jżidux l-emissjonijiet tas-CO2. Dan ser jeħtieġ sforz enormi u ser ikollna ningħaqdu flimkien mas-sħab Afrikani tagħna. Il-klima ser tkun parti ewlenija mis-sħubija tagħna mal-Afrika.
