"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill kellu diskussjoni komprensiva u strateġika dwar ir-relazzjonijiet bejn l-UE u r-Russja.
Matul id-dibattitu ħarġet valutazzjoni kondiviża li r-Russja kienet miexja lejn stat awtoritarju u 'l bogħod mill-Ewropa. Il-ministri ddikjaraw mill-ġdid l-unità ta' intenzjoni tagħhom, u ddiskutew kif jistgħu jiżviluppaw ir-relazzjonijiet mar-Russja fil-qafas tal-ħames prinċipji gwida u ffokaw fuq: it-treġġigħ lura tal-ksur tad-dritt internazzjonali u tad-drittijiet tal-bniedem, l-ilqugħ kontra d-diżinformazzjoni u l-attakki ċibernetiċi, iżda wkoll l-involviment fi kwistjonijiet ta' interess għall-UE.
Fid-dawl tal-aħħar żviluppi, il-ministri qablu li jipproċedu bil-ħidma dwar miżuri restrittivi futuri b'rispons għal ksur serju tad-drittijiet tal-bniedem.
Bi tweġiba għall-avvenimenti madwar is-sitwazzjoni tas-Sur Navalny, ilħaqna qbil politiku biex jiġu imposti miżuri restrittivi kontra dawk responsabbli għall-arrest, il-kundanna u l-persekuzzjoni tiegħu. Għall-ewwel darba ser nagħmlu użu mir-Reġim Globali tal-UE b'rabta mad-Drittijiet tal-Bniedem għal dan il-għan.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-ministri qablu wkoll li jżidu l-appoġġ għal dawk kollha involuti fil-pajjiż fid-difiża tal-libertajiet politiċi u ċivili.
Filmat tal-punti ewlenin tal-Kunsill Affarijiet Barranin li sar fi Brussell fit-22 ta' Frar 2021
Vidjokonferenza mas-Segretarju tal-Istat tal-Istati Uniti Antony Blinken
Il-Kunsill kellu skambju ta' fehmiet, permezz ta' vidjokonferenza, mas-Segretarju tal-Istat il-ġdid tal-Istati Uniti Antony Blinken dwar l-aġenda sostantiva għall-kooperazzjoni bejn l-UE u l-Istati Uniti dwar kwistjonijiet ewlenin ta' politika globali, barranija u ta' sigurtà.
Din kienet l-ewwel interazzjoni ta' livell għoli bejn l-UE u l-amministrazzjoni l-ġdida tal-Istati Uniti, xahar minn meta ħadet il-kariga. Id-diskussjoni wriet l-intenzjoni tal-partijiet mhux biss li japprofondixxu s-sħubija bejn l-UE u l-Istati Uniti, iżda wkoll l-intenzjoni tagħhom li jiffurmaw tmexxija globali konġunta fil-ġlieda kontra l-pandemija u l-indirizzar tal-irkupru, il-mitigazzjoni tat-tibdil fil-klima u l-iżgurar tal-promozzjoni tal-valuri demokratiċi.
Id-diskussjoni ttrattat l-opportunitajiet u l-isfidi internazzjonali bħar-relazzjonijiet maċ-Ċina u r-Russja, l-Iran u s-sigurtà u d-difiża.
Hong Kong
Il-Kunsill ġie infurmat dwar is-sitwazzjoni li qed tiddeterjora u qabel dwar sett ta' azzjonijiet fuq perjodu qasir ta' żmien u fit-tul, flimkien mal-pakkett ta' rispons inizjali adottat f'Lulju li għadda.
Miżuri immedjati jinkludu aktar appoġġ għas-soċjetà ċivili, żieda fil-koordinazzjoni ma' sħab tal-istess fehma, u komunikazzjoni mal-awtoritajiet rilevanti.
Il-Kunsill indirizza wkoll l-impatt tas-sitwazzjoni li qed tiddeterjora f'Hong Kong fuq ir-relazzjonijiet usa' maċ-Ċina.
Ġrajjiet Kurrenti
Ir-Rappreżentant Għoli Borrell informa lill-ministri dwar il-Myanmar u r-rispons tal-UE għall-kolp ta' stat militari tal-1 ta' Frar, u l-Kunsill adotta konklużjonijiet dwar din il-kwistjoni.
Il-ministri laħqu qbil politiku biex japplikaw sanzjonijiet, immirati lejn il-militar responsabbli għall-kolp ta' stat u l-interessi ekonomiċi tagħhom. Ġie deċiż ukoll li jitwaqqaf l-appoġġ finanzjarju dirett kollu mill-għajnuna tal-UE għall-iżvilupp għall-programmi ta' riforma tal-gvern tal-pajjiż. Fl-istess ħin, ġie maqbul li l-UE tkompli tappoġġa lis-soċjetà ċivili, u tipprovdi servizzi bażiċi lill-poplu tal-Myanmar.
Il-ministri kellhom skambju ta' fehmiet dwar ir-rapport tal-ministru għall-Affarijiet Barranin tal-Finlandja, li żar is-Sudan u l-Etjopja bejn is-7 u l-10 ta' Frar f'isem ir-Rappreżentant Għoli. Il-ministri qablu li hemm bżonn urġenti ta' aċċess umanitarju sħiħ u immedjat għat-Tigray. Huma qablu wkoll li kien meħtieġ li jiġu investigati allegazzjonijiet ta' ksur tad-drittijiet tal-bniedem, u tal-vjolenza etnika u d-diskriminazzjoni, u jiġi ggarantit ir-rispett tad-dritt umanitarju internazzjonali.
Il-Kunsill iddiskuta wkoll is-sitwazzjoni mal-Iran, u l-iżviluppi reċenti inkwetanti fil-qasam nukleari. Il-ħtieġa li titreġġa' lura l-implimentazzjoni sħiħa tal-PAKK, kemm fir-rigward tal-impenji nukleari kif ukoll fir-rigward tat-tneħħija tas-sanzjonijiet, ġiet enfasizzata b'mod konsistenti.
Fl-aħħar nett, ir-Rappreżentant Għoli qajjem il-kwistjoni ta' deterjorament ulterjuri tas-sitwazzjoni fil-Belarussja u r-repressjoni li għaddejja kontra d-difensuri tad-drittijiet tal-bniedem, is-soċjetà ċivili u l-ġurnalisti. Huwa qal li l-UE ser tikkunsidra l-adozzjoni ta' aktar sanzjonijiet, u li ser tappoġġa lill-poplu Belarussu fit-talba leġittima tiegħu għad-demokrazija, billi tappoġġa lis-soċjetà ċivili u billi tikkastiga dawk li jċaħħduhom mid-drittijiet fundamentali.
Oħrajn
Il-Kunsill adotta konklużjonijiet dwar irkupru wara l-COVID-19 ibbażat fuq id-drittijiet tal-bniedem, u l-prijoritajiet tal-UE fil-fora tan-NU dwar id-drittijiet tal-bniedem fl-2021.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Bi tweġiba għall-avvenimenti madwar is-sitwazzjoni tas-Sur Navalny, ilħaqna qbil politiku biex jiġu imposti miżuri restrittivi kontra dawk responsabbli għall-arrest, il-kundanna u l-persekuzzjoni tiegħu. Għall-ewwel darba ser nagħmlu użu mir-Reġim Globali tal-UE b'rabta mad-Drittijiet tal-Bniedem għal dan il-għan.
