"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Difiża), 16 ta' Novembru 2021
Riżultati ewlenin
Boxxla Strateġika
Fil-15 ta' Novembru, il-ministri għall-affarijiet barranin tal-UE f'laqgħa konġunta mal-ministri għad-difiża tal-UE kellhom skambju ta' fehmiet dwar l-ewwel abbozz tal-Boxxla Strateġika tal-UE, li għandha tipprovdi gwida politika u strateġika ċara dwar l-approċċ tal-UE għas-sigurtà u d-difiża fil-ħames snin sa għaxra li ġejjin, u ssaħħaħ ir-rwol tal-UE bħala fornitur tas-sigurtà globali.
Filwaqt li tibni fuq analiżi tat-theddid komprensiva, il-Boxxla Strateġika tistabbilixxi miżuri konkreti u l-iskedi ta' żmien għall-azzjoni marbuta magħhom, li jkopru firxa wiesgħa ta' każijiet mill-Politika ta' Sigurtà u ta' Difiża Komuni, għat-theddid ċibernetiku u ibridu, id-diżinformazzjoni, l-iżvilupp tal-kapaċitajiet u sħubijiet.
B'mod konkret, il-Boxxla turina għaliex għandna bżonn Unjoni aktar b'saħħitha, lesta li tkun kapaċi tipproteġi liċ-ċittadini, il-valuri u l-interessi tal-Ewropej. Ser issaħħaħ ir-responsabbiltà jew l-awtonomija strateġika tal-UE, u l-kapaċità tagħha li naħdmu mas-sħab biex inħarsu l-valuri u l-interessi tagħha.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Kien hemm appoġġ wiesa' għad-dokument. Il-ministri esprimew ir-rieda tagħhom li jaħdmu fuqu bil-ħsieb tal-adozzjoni tal-Boxxla finali f'Marzu 2022.
Ir-Rappreżentant Għoli enfasizza li l-istati membri kienu appoġġaw l-approċċ dwar il-kapaċitajiet ta' difiża, li jindirizza l-isfidi ibridi u jinvolvi lis-sħab. Il-ministri ssottolinjaw li l-approċċ tal-UE kellu jikkomplementa lin-NATO u jkun ta' benefiċċju għaliha, filwaqt li tiġi evitata d-duplikazzjoni miż-żewġ naħat u tiġi żgurata l-koerenza.
Ġrajjiet Kurrenti
Fis-16 ta' Novembru, il-ministri għad-difiża tal-UE ġew infurmati mir-Rappreżentant Għoli, Josep Borrell, dwar il-ġrajjiet kurrenti fejn eżaminaw għadd ta' żviluppi reċenti.
L-ewwel nett il-Kunsill ġie aġġornat dwar l-operazzjoniEUFOR Althea, wara t-tiġdid reċenti tal-mandat mill-Kunsill tas-Sigurtà tan-NU. Dan l-aħħar, il-Kunsill adotta miżura skont il-Faċilità Ewropea għall-Paċi li permezz tagħha l-UE ser twassal 68 vettura medika u tat-trasport u 150 tagħmir għall-individwazzjoni tal-metall biex tgħin lill-Bożnija-Ħerzegovina tkunħielsa għal kollox mill-mini sal-2027.
Il-ministri ġew infurmati wkoll dwar il-passi li ser jittieħdu biex jintuża l-kunċett tal-Preżenzi Marittimi Koordinati lil hinn mill-Golf tal-Guinea. Żona marittima speċifika ġdida ta' interess tista' tiġi stabbilita fl-Indo-Paċifiku mis-sena d-dieħla.
Il-Kunsill imbagħad tkellem dwar il-progress magħmul fil-qasam tal-Mobbiltà Militari, fejn ittieħdu passi konkreti dwar kwistjonijiet regolatorji u dwar l-infrastruttura, u ddiskuta l-Belarussja. Dwar din tal-aħħar, ir-Rappreżentant Għoli enfasizza li din ma kinitx kriżi ta' migrazzjoni u li l-UE ser tirreaġixxi bl-għodda kollha li għandha għad-dispożizzjoni tagħha.
Missjonijiet ta' taħriġ tal-UE
Il-Kunsill kellu skambju ta' fehmiet dwar l-erba' Missjonijiet ta' Taħriġ tal-UE fil-Mali, is-Somalja, ir-Repubblika Ċentru-Afrikana, u l-Mozambique, u modi possibbli biex ikunu aktar effettivi.
PESCO
Il-Kunsill adotta deċiżjoni li taġġorna l-lista ta' proġetti li għandhom jitwettqu taħt il-kooperazzjoni strutturata permanenti tal-UE (PESCO). B'riżultat ta' dan, 14-il proġett ġdid ser jiżdiedu mal-lista ta' 46 proġett eżistenti li ġew żviluppati taħt il-PESCO minn Diċembru 2017.
Matul ikla ta' ħidma informali, il-ministri kellhom skambju ta' fehmiet mas-Segretarju Ġenerali tan-NATO Jens Stoltenberg dwar oqsma ġodda għall-kooperazzjoni bejn l-UE u n-NATO, bħar-reżiljenza, il-klima u d-difiża, u t-teknoloġiji emerġenti u fixkiela. Ġie miftiehem li fix-xhur li ġejjin issir ħidma fuq Dikjarazzjoni Konġunta ġdida dwar il-kooperazzjoni bejn l-UE u n-NATO.
Bord ta' Tmexxija tal-Aġenzija Ewropea għad-Difiża
Il-bord ta' tmexxija ministerjali tal-Aġenzija Ewropea għad-Difiża (EDA) iltaqa' qabel il-laqgħa tal-Kunsill biex japprova l-baġit ġenerali tal-Aġenzija għall-2022, baġit ta' €38 miljun, u jiddiskuti l-mandat tal-aġenzija biex tinnegozja arranġament amministrattiv mad-Dipartiment tad-Difiża tal-Istati Uniti, u kif jissaħħaħ ir-rwol tal-EDA fit-trawwim tal-innovazzjoni fil-qasam tad-difiża.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
B'mod konkret, il-Boxxla turina għaliex għandna bżonn Unjoni aktar b'saħħitha, lesta li tkun kapaċi tipproteġi liċ-ċittadini, il-valuri u l-interessi tal-Ewropej. Ser issaħħaħ ir-responsabbiltà jew l-awtonomija strateġika tal-UE, u l-kapaċità tagħha li naħdmu mas-sħab biex inħarsu l-valuri u l-interessi tagħha.