"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 11 ta' Novembru 2021
Riżultati ewlenin
Relazzjonijiet kummerċjali bejn l-UE u l-Istati Uniti
Il-Kunsill evalwa l-aħħar żviluppi u ddiskuta kif jinżamm u jissaħħaħ il-momentum pożittiv attwali fir-relazzjonijiet kummerċjali bilaterali bejn l-UE u l-Istati Uniti, b'enfasi partikolari fuq it-tħabbira (li saret fil-31 ta' Ottubru) dwar il-kummerċ tal-azzar u tal-aluminju u l-prospetti għal impenn futur, b'mod partikolari fir-rigward tal-Kunsill tal-Kummerċ u t-Teknoloġija bejn l-UE u l-Istati Uniti (TTC).
L-UE u l-Istati Uniti huma d-destinazzjoni ta' investiment dirett barrani l-aktar importanti ta' xulxin, b'investimenti reċiproċi ta' aktar minn 60% tal-investimenti diretti barranin globali kollha. Jeħtieġ li nkomplu bl-isforzi biex nippreservaw u nsaħħu aktar is-sħubija kummerċjali transatlantika tagħna għall-benefiċċju taċ-ċittadini kollha fuq iż-żewġ naħat. Id-deċiżjoni reċenti tal-Istati Uniti li tneħħi t-tariffi tat-Taqsima 232 fuq l-azzar u l-aluminju fuq l-importazzjonijiet tal-UE sa livell konformi mal-livelli storiċi tal-kummerċ hija pass fid-direzzjoni t-tajba, iżda għadha mhijiex id-destinazzjoni finali.
Zdravko Počivalšek, Ministru għall-Iżvilupp Ekonomiku u t-Teknoloġija tas-Slovenja
Fis-Summit ta' Ġunju, il-mexxejja tal-UE u tal-Istati Uniti kkonfermaw ix-xewqa tagħhom li jaħdmu mill-qrib bħala sħab u alleati meta jaħbtu ma' sfidi komuni, biex jegħlbu n-nuqqas ta' qbil, u biex jiffukaw fuq aġenda pożittiva. Il-kooperazzjoni mal-amministrazzjoni ta' Biden hija intensiva u diġà qed tagħti riżultati fosthom l-istabbiliment tal-Kunsill tal-Kummerċ u t-Teknoloġija, il-waqfien mill-ġlied fit-tilwima Airbus/Boeing, it-tmiem tal-investigazzjonijiet tat-"Taqsima 301" tal-Istati Uniti dwar it-taxxi fuq is-servizzi diġitali ta' xi stati membri, u l-aktar reċenti, it-tħabbir tat-tneħħija tat-tariffi tal-Istati Uniti fuq l-azzar u l-aluminju tal-UE sal-livelli kummerċjali preċedenti u l-ftehim biex jinbdew negozjati dwar Arranġament Globali dwar l-Azzar u l-Aluminju Sostenibbli.
F'dan il-kuntest, il-ministri esprimew l-impenn tagħhom li jmexxu 'l quddiem aġenda trans-Atlantika pożittiva u li tħares 'il quddiem, u ħeġġew lill-Kummissjoni biex tkompli bl-impenn intensiv tagħha mal-amministrazzjoni ta' Biden. Huma laqgħu wkoll il-passi pożittivi reċenti u indikaw li l-ħidma fuq it-tilwim li għaddej għandha tkompli sakemm dawn jiġu solvuti b'mod definittiv. Fl-istess ħin, huwa importanti li jiġi evitat li jitfaċċaw tilwimiet u/jew irritanti ġodda.
Wara t-tħabbira tal-Istati Uniti tas-sostituzzjoni unilaterali tat-tariffi tat-"Taqsima 232" bi kwoti tariffarji, abbażi tal-importazzjonijiet storiċi tal-azzar u l-aluminju mill-UE, mistennija li tittieħed deċiżjoni dwar is-sospensjoni unilaterali tat-tariffi tal-UE tal-ibbilanċjar mill-ġdid – li ġew imposti fuq il-prodotti tal-Istati Uniti b'rispons għat-tariffi tat-"Taqsima 232" – fil-qafas tal-komitoloġija.
Barra minn hekk, in-negozjaturi tal-UE u tal-Istati Uniti qablu li jissospendu l-kawżi rispettivi tagħhom għas-soluzzjoni tat-tilwim fid-WTO, u li jibdew negozjati dwar Arranġament Globali dwar l-Azzar u l-Aluminju Sostenibbli, kif ukoll dwar diversi elementi li jikkonċernaw il-kooperazzjoni li għaddejja (rimedji kummerċjali, kooperazzjoni doganali, monitoraġġ tal-flussi bilaterali tal-azzar u tal-aluminju, u l-kooperazzjoni dwar il-kapaċità eċċessiva mhux tas-suq).
Għalkemm l-arranġament dwar l-azzar u l-aluminju huwa biss soluzzjoni temporanja, huwa titjib għall-produtturi u l-esportaturi tal-azzar u tal-aluminju tal-UE li jaċċessaw is-suq tal-Istati Uniti, u l-UE u l-Istati Uniti issa jistgħu jiffukaw fuq aġenda trans-Atlantika aktar pożittiva li tħares aktar 'il quddiem. L-UE tkompli tikkunsidra li t-tariffi tat-"Taqsima 232" tal-Istati Uniti kontra l-UE u l-esportazzjonijiet tal-azzar u tal-aluminju tagħha huma inkompatibbli mar-regoli tad-WTO, u għalhekk tkompli tappella lill-Istati Uniti għall-eliminazzjoni sħiħa tagħhom.
Il-ministri kellhom skambju informali mar-Rappreżentant tal-Kummerċ tal-Istati Uniti (USTR) Katherine Tai. Il-kwistjonijiet topiċi li ġew diskussi matul il-vidjokonferenza inkludew l-impenn fuq l-aġenda pożittiva, speċjalment it-TTC bejn l-UE u l-Istati Uniti, is-sitwazzjoni qabel it-12-il Konferenza Ministerjali tad-WTO u l-ħtieġa li jiġi solvut it-tilwim li għaddej b'mod definittiv.
Riforma tad-WTO u tħejjijiet għat-12-il-Konferenza Ministerjali tad-WTO
Il-Kunsill iddiskuta l-aħħar żviluppi dwar il-proċess ta' riforma tad-WTO u t-tħejjijiet għat-12-il Konferenza Ministerjali tal-Organizzazzjoni Dinjija tal-Kummerċ (MC12) li għandha ssir f'Ġinevra mit-30 ta' Novembru sat-3 ta' Diċembru.
Il-ministri esprimew appoġġ ġenerali għal-linja ta' azzjoni ssuġġerita mill-Kummissjoni għall-MC12, b'mod partikolari rigward l-eżiti possibbli, bħal:
il-kummerċ u s-saħħa, inkluż komponent tal-proprjetà intellettwali;
it-tnedija ta' grupp ta' ħidma dwar it-titjib istituzzjonali tad-WTO li jagħmel proposti għall-Konferenza Ministerjali li jmiss dwar ir-riforma tat-tliet funzjonijiet ewlenin tad-WTO;
il-konklużjoni tan-negozjati dwar is-sussidji tas-sajd;
il-konklużjoni tar-regolamentazzjoni domestika fin-negozjati dwar is-servizzi;
it-trasparenza, kif ukoll eżiti possibbli oħra bħall-Kondizzjonijiet Ekwivalenti ta' Kompetizzjoni;
programmi ta' ħidma dwar l-agrikoltura.
L-UE ser tkompli taħdem biex jintlaħaq ftehim mill-MC12 u tappella lil Membri oħra tad-WTO biex ikunu ugwalment kostruttivi. Il-konferenza ministerjali f'Diċembru ser tkun importanti biex jiġi kkonfermat mill-ġdid ir-rwol ċentrali tad-WTO fis-sistema kummerċjali multilaterali.
Zdravko Počivalšek, Ministru għall-Iżvilupp Ekonomiku u t-Teknoloġija tas-Slovenja
Il-Kunsill Affarijiet Barranin (Kummerċ) ser jerġa' jiltaqa' mid-29 ta' Novembru sat-3 ta' Diċembru f'Ġinevra fil-marġini tal-konferenza ministerjali tad-WTO biex jadotta l-abbozz ta' konklużjonijiet tal-Kunsill u l-abbozz ta' Deċiżjoni tal-Kunsill dwar il-pożizzjoni li għandha tittieħed f'isem l-UE fl-MC12.
Implimentazzjoni u infurzar tal-ftehimiet kummerċjali tal-UE
Il-Kummissjoni ppreżentat taħt affarijiet oħra r-rapport tagħha dwar l-implimentazzjoni u l-infurzar tal-ftehimiet kummerċjali tal-UE u appellat biex titkompla l-ħidma konġunta tajba mal-istati membri.
Fis-27 ta' Ottubru, il-Kummissjoni ppubblikat ir-rapport annwali tagħha dwar l-implimentazzjoni u l-infurzar tal-ftehimiet kummerċjali tal-UE. Ir-rapport joffri stampa tal-evoluzzjoni tal-kummerċ preferenzjali tal-UE fl-2020. Huwa jeżamina 37 ftehim kummerċjali prinċipali ma' 67 sieħeb u jiġbor fil-qosor ir-riżultati tal-attivitajiet ta' implimentazzjoni u infurzar fl-2020 u fl-ewwel nofs tal-2021.
Il-ministri indirizzaw, ukoll taħt affarijiet oħra, ir-rieżami li għaddej tal-implimentazzjoni u l-infurzar tal-kapitoli dwar l-iżvilupp sostenibbli fil-ftehimiet kummerċjali tal-UE. In-Netherlands, appoġġati mill-Belġju u l-Lussemburgu, talbu lill-Kummissjoni tagħti l-ewwel impressjonijiet tagħha tal-eżitu tal-konsultazzjoni tal-partijiet ikkonċernati tal-UE dwar ir-rieżami (li għalqet fil-31 ta' Ottubru) u taġġorna lill-Kunsill dwar il-passi li jmiss fil-proċess.
Il-Pjan ta' Azzjoni ta' 15-il Punti tal-Kummissjoni ta' Frar 2018 iggwida t-titjib tal-implimentazzjoni u l-infurzar tal-kapitoli tal-KŻS fil-ftehimiet kummerċjali tal-UE.
Bħalissa l-Kummissjoni qed twettaq rieżami ta' dan il-Pjan ta' Azzjoni li ser ikopri l-aspetti rilevanti kollha tal-implimentazzjoni u l-infurzar tal-KŻS, inkluż l-ambitu tal-impenji, il-mekkaniżmi ta' monitoraġġ, il-possibbiltà ta' sanzjonijiet għan-nuqqas ta' konformità, kif ukoll l-istruttura istituzzjonali u r-riżorsi meħtieġa.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Waqt l-ikla ta' nofsinhar il-ministri ddiskutew is-sitwazzjoni attwali tan-negozjati bilaterali li għaddejjin dwar il-kummerċ u l-investiment, bħal dawk maċ-Ċilì, New Zealand, u l-Indja, kif ukoll dawk il-ftehimiet fejn ġew konklużi negozjati, bħall-Mercosur u l-Messiku.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-UE u l-Istati Uniti huma d-destinazzjoni ta' investiment dirett barrani l-aktar importanti ta' xulxin, b'investimenti reċiproċi ta' aktar minn 60% tal-investimenti diretti barranin globali kollha. Jeħtieġ li nkomplu bl-isforzi biex nippreservaw u nsaħħu aktar is-sħubija kummerċjali transatlantika tagħna għall-benefiċċju taċ-ċittadini kollha fuq iż-żewġ naħat. Id-deċiżjoni reċenti tal-Istati Uniti li tneħħi t-tariffi tat-Taqsima 232 fuq l-azzar u l-aluminju fuq l-importazzjonijiet tal-UE sa livell konformi mal-livelli storiċi tal-kummerċ hija pass fid-direzzjoni t-tajba, iżda għadha mhijiex id-destinazzjoni finali.