"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri ddiskutew is-sitwazzjoni fil-Belarussja u l-kwistjoni tal-migranti li qed jiġu mbuttati lejn il-fruntieri tal-UE f'tentattiv orkestrat biex dawn jidħlu fl-UE illegalment.
Il-Kunsill baqa' magħqud quddiem l-aggressjoni ibrida li għaddejja kontra l-UE.
Qed inqisu l-għażliet kollha possibbli biex inwaqqfu r-reġim milli jolqot lilna u jolqot lill-popolazzjoni tiegħu stess, u qbilna li nwessgħu l-ambitu tas-sanzjonijiet fuq il-Belarussja.
Minn issa 'l quddiem ser inkunu nistgħu nissanzjonaw aktar nies għall-attivitajiet tagħhom fl-organizzazzjoni ta' titjiriet ta' persuni minn diversi pajjiżi lejn il-Belarussja u minn hemm lejn il-fruntieri tal-UE.
Qbilna wkoll li nadottaw il-ħames pakkett ta' sanzjonijiet, li ser jiġi ffinalizzat fil-jiem li ġejjin.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Ir-Rappreżentant Għoli mbagħad informa lill-ministri dwar dak li qed jagħmel biex iwassal il-messaġġ u jikkonvinċi lil Minsk ma tibqax tuża l-migrazzjoni għal għanijiet politiċi.
Ir-Rappreżentant Għoli ssottolinja li r-responsabbiltà hija kollha tal-Belarussja talli b'mod artifiċjali ħolqot fluss ta' migranti, u spjega li l-UE ser taħdem ma' organizzazzjonijiet internazzjonali bħan-Nazzjonijiet Uniti sabiex tiżgura li tingħata l-għajnuna umanitarja lil dawk fil-bżonn.
Id-djalogu jerġa' jiġi stabbilit meta r-reġim ta' Lukashenko jwaqqaf dawn il-vjolazzjonijiet u jibda jirrispetta d-drittijiet tal-bniedem tal-poplu fil-Belarussja.
Il-ministri għall-affarijiet barranin kellhom diskussjoni dwar kif jistgħu b'mod konkret isaħħu l-involviment tal-UE mal-Balkani tal-Punent lil hinn mit-tkabbir. B'mod partikolari ffukaw fuq kif is-sħab mill-Balkani tal-Punent jistgħu jkunu involuti fid-diskussjonijiet dwar il-politika barranija tal-UE, u kif tissaħħaħ il-kooperazzjoni dwar iċ-ċibersigurtà, it-theddid ibridu u każijiet oħra bħall-użu ta' data spazjali.
Il-Kunsill kellu wkoll diskussjoni dwar il-Bożnija-Ħerzegovina.
Ir-Rappreżentant Għoli saħaq fuq l-impenn tal-UE għall-perspettiva Ewropea tal-Bożnija-Ħerzegovina bħala pajjiż wieħed, magħqud u sovran, u għall-ħtieġa li l-mexxejja tal-Bożnija-Ħerzegovina jissoktaw id-djalogu, jerġgħu lura għall-istituzzjonijiet tal-istat fil-kapaċità sħiħa tagħhom u jerġgħu jibdew jaħdmu fuq riformi ewlenin.
Dwar id-Djalogu bejn Belgrad u Pristina, il-ministri tennew l-aspettattiva tagħhom li l-Kosovo u s-Serbja jirrispettaw u jimplimentaw il-ftehimiet preċedenti kollha kompletament, u li b'mod kostruttiv jieħdu l-impenn biex jagħmlu progress rapidu dwar in-normalizzazzjoni komprensiva tar-relazzjonijiet bejniethom.
Is-Saħel
Il-Kunsill Affarijiet Barranin kellu skambju ta' fehmiet dwar is-sitwazzjoni fis-Saħel, fejn ġie enfasizzat l-impenn tal-UE fir-reġjun.
Il-ministri qablu li l-UE għandha tkompli twettaq l-implimentazzjoni tal-Istrateġija għas-Saħel u l-pjan direzzjonali tal-Koalizzjoni tas-Saħel, biex tilqa' għas-sitwazzjoni diffiċli fir-reġjun.
Il-Kunsill iddiskuta wkoll is-sitwazzjoni li sejra għall-agħar fil-Mali, fejn l-elezzjonijiet skedati għal Frar ġew posposti b'mod illeġittimu mill-mexxejja tat-tranżizzjoni.
Qbilna li nistabbilixxu qafas apposta għal miżuri restrittivi fil-Mali, b'appoġġ għad-deċiżjoni meħuda mill-ECOWAS. Il-ħidma ser tkompli u nittamaw li tiġi ffinalizzata malajr. Dan ser jippermettilna nadottaw sanzjonijiet kontra dawk li qed ifixklu t-tranżizzjoni.
Tkellimna wkoll dwar l-involviment possibbli tal-grupp Wagner, u kien hemm kunsens biex jittieħdu wkoll miżuri restrittivi kontra dan il-grupp.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Fil-gruppi ta' ħidma rilevanti qed issir valutazzjoni tal-proposti speċifiċi biex jiġu ddeżinjati individwi u entitajiet taħt ir-reġimi ta' sanzjonijiet tal-UE, liema proposti ser jitqiesu għal adozzjoni possibbli bil-ħsieb tal-Kunsill tal-Affarijiet Barranin li jmiss.
Ġrajjiet Kurrenti
Il-ministri ġew infurmati dwar il-passi unilaterali meħuda mit-Turkija biex tibdel l-istatus quo ta' Varosha, bi ksur tar-riżoluzzjonijiet tal-Kunsill tas-Sigurtà tan-NU. Il-Kunsill esprima s-solidarjetà qawwija tiegħu ma' Ċipru u r-rieda li jibdel din is-solidarjetà fi proposti konkreti dwar kif għandha tiġi indirizzata s-sitwazzjoni. Dalwaqt ser jiġi ppreżentat dokument ta' għażliet lill-ambaxxaturi tal-UE mlaqqgħin fil-COREPER, bil-ħsieb li titħejja l-bażi għal diskussjoni fil-Kunsill Affarijiet Barranin ta' Diċembru.
L-Etjopja ġiet diskussa wkoll, bis-sitwazzjoni f'Tigray taħt il-lenti, fejn wara sena mill-bidu tal-konflitt, is-sitwazzjoni baqgħet sejra għall-agħar u ħolqot kriżi umanitarja devastanti. Ir-Rappreżentant Għoli reġa' ddikjara li ma hemm l-ebda soluzzjoni militari għall-kunflitt, u għandu jsir kull sforz biex iċ-ċittadini Etjopjani ma jkollhomx jgħixu l-istraġi ta' gwerra ċivili sħiħa. L-UE tappoġġa bis-sħiħ l-isforzi tar-reġjun u tal-Unjoni Afrikana li offrew mejda għat-taħditiet.
Il-Kunsill imbagħad iddiskuta s-Sudan. Ir-ritorn immedjat għall-proċess ta' tranżizzjoni lejn id-demokrazija mmexxi miċ-ċivili tibqa' l-unika triq għall-ħelsien, il-paċi u l-ġustizzja għas-Sudaniżi kollha. Ir-Rappreżentant Għoli saħaq fuq il-ħtieġa ta' djalogu bejn il-partijiet kollha, u laqa' l-isforzi kollha ta' medjazzjoni u appella lill-militar biex jirrispetta d-drittijiet tal-bniedem u d-dritt umanitarju internazzjonali.
F'sessjoni konġunta, il-ministri għall-affarijiet barranin u d-difiża kellhom skambju ta' fehmiet dwar l-ewwel abbozz tal-Boxxla Strateġika tal-UE, li għandha tipprovdi gwida politika u strateġika ċara dwar l-approċċ tal-UE għas-sigurtà u d-difiża fil-ħames snin sa għaxra li ġejjin.
Il-Belarussja għandha twaqqaf l-istrumentalizzazzjoni tal-migranti
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Qed inqisu l-għażliet kollha possibbli biex inwaqqfu r-reġim milli jolqot lilna u jolqot lill-popolazzjoni tiegħu stess, u qbilna li nwessgħu l-ambitu tas-sanzjonijiet fuq il-Belarussja. Minn issa 'l quddiem ser inkunu nistgħu nissanzjonaw aktar nies għall-attivitajiet tagħhom fl-organizzazzjoni ta' titjiriet ta' persuni minn diversi pajjiżi lejn il-Belarussja u minn hemm lejn il-fruntieri tal-UE. Qbilna wkoll li nadottaw il-ħames pakkett ta' sanzjonijiet, li ser jiġi ffinalizzat fil-jiem li ġejjin.