"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin beda b'diskussjoni dwar it-tisħiħ tal-forzi militari tar-Russja fil-fruntiera mal-Ukrajna.
L-Unjoni Ewropea tinsab magħquda u soda fl-appoġġ għas-sovranità u l-integrità territorjali tal-Ukrajna. Il-ministri kienu ċari ħafna llum, li kwalunkwe aggressjoni kontra l-Ukrajna ser iġġib magħha konsegwenzi politiċi u b'kost ekonomiku għoli għar-Russja.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
L-UE qed tikkoordina mill-qrib il-pożizzjoni tagħha ma' sħab tranżatlantiċi u tal-istess fehma, u ser terġa' lura għal dan is-suġġett fil-Kunsill Ewropew tas-16 ta' Diċembru.
Il-ministri mbagħad irrieżaminaw is-sitwazzjoni fil-Belarussja, fid-dawl tal-ħames mewġa ta' sanzjonijiet li ntlaħaq qbil dwarhom reċentement. Kien meqjus li l-miżuri restrittivi imposti b'reazzjoni kontra l-abbuż tal-migranti wasslu għal riżultati. Ir-repressjoni domestika mir-reġim ta' Lukashenko madankollu qed tiggrava u l-għadd ta' priġunieri politiċi żdied għal aktar minn 900. Il-ministri ddikjaraw mill-ġdid li l-UE hija solidali mas-soċjetà Belarussa u ser tkompli tappoġġa lis-soċjetà Belarussa.
Il-Kunsill iddiskuta wkoll il-kwistjoni ta' Varosha u l-impatt tal-azzjonijiet unilaterali meħuda f'Lulju 2021 miċ-Ċiprijotti Torok u t-Turkija bi ksur tar-Riżoluzzjonijiet tal-Kunsill tas-Sigurtà tan-NU. L-istati membri esprimew is-solidarjetà tagħhom ma' Ċipru u l-appoġġ tagħhom għall-proċess ta' negozjati mmexxi min-NU, u għar-Rappreżentant Speċjali l-ġdid tas-Segretarju Ġenerali tan-NU u Kap tal-Forza għaż-Żamma tal-Paċi tan-NU f'Ċipru Colin Stewart.
Ġie maqbul li l-Coreper ser jevalwa ulterjorment l-opzjonijiet fuq il-mejda, li jinkludu l-ħolqien ta' reġim ta' sanzjonijiet speċifiku ffukat fuq persuni u entitajiet involuti direttament fil-ftuħ ta' parti minn Varosha wara Lulju 2021. Il-ministri ddikjaraw mill-ġdid li huwa essenzjali li t-Turkija terġa' tinvolvi ruħha serjament fil-proċess tan-NU u żżomm lura minn kwalunkwe azzjoni li tkompli tiddeterjora s-sitwazzjoni fuq il-post.
L-iskambju ta' fehmiet dwar l-Etjopja enfasizza li l-kunflitt fil-pajjiż kompla jmur għall-agħar u pproduċa kriżi umanitarja devastanti, u b'hekk immina mhux biss l-istabbiltà tal-Etjopja, iżda wkoll tar-reġjun kollu. Il-ministri qablu li soluzzjoni politika biss tista' treġġa' lura d-dinamika negattiva u perikoluża attwalment fis-seħħ, u li l-prijoritajiet tal-UE għandhom jibqgħu li jinkiseb waqfien mill-ġlied u li l-partijiet ipoġġu mal-mejda tan-negozjati.
Relazzjonijiet bejn l-UE u l-Afrika
Il-Kunsill iddiskuta r-relazzjonijiet tal-UE mal-Afrika qabel il-Kunsill Ewropew ta' Diċembru, u bi tħejjija għas-sitt summit bejn l-UE u l-Unjoni Afrikana li għandu jsir fi Brussell fi Frar 2022.
Id-diskussjoni enfasizzat li l-UE tista' tkun aktar konkreta, prattika, viżibbli u operazzjonali fit-trattament mas-sħab Afrikani tagħha.
Oqsma ewlenin għal involviment imsaħħaħ jinkludu r-rispons għall-COVID, id-distribuzzjoni tal-vaċċini, il-paċi, is-sigurtà u l-governanza, l-irkupru ekoloġiku u diġitali permezz ta' inizjattivi taħt il-Portal Globali, u kooperazzjoni aħjar fil-fora multilaterali.
Asja Ċentrali
Il-Kunsill kellu skambju ta' fehmiet dwar l-Asja Ċentrali b'fokus speċifiku fuq it-tisħiħ tal-ambizzjoni tal-UE fir-reġjun.
L-UE għandha interess qawwi li tintensifika l-impenn politiku mal-Asja Ċentrali u li taraha tiżviluppa bħala spazju ekonomiku u politiku aktar reżiljenti, prosperu u interkonness aktar mill-qrib. Tali interess f'kooperazzjoni aktar b'saħħitha huwa reċiprokat mis-sħab fir-reġjun. Oqsma possibbli ta' kooperazzjoni msaħħa jinkludu l-promozzjoni tal-irkupru ekoloġiku u sostenibbli wara l-COVID-19, pereżempju permezz ta' proġetti ewlenin tal-Portal Globali, u l-ġestjoni tar-riperkussjonijiet tas-sitwazzjoni fl-Afganistan u sfidi oħra marbuta mas-sigurtà. L-involviment f'oqsma tan-negozju u l-investiment kif ukoll id-drittijiet tal-bniedem, id-demokrazija, l-istat tad-dritt u l-governanza tqies importanti ukoll.
Venezwela
Il-ministri ġew infurmati dwar ir-riżultati tal-elezzjonijiet reġjonali u muniċipali tal-Venezwela li saru fil-21 ta' Novembru 2021 u dwar is-sejbiet ewlenin tal-Missjoni ta' Osservazzjoni Elettorali tal-UE (MOE) ippreżentat mill-Kap Osservatur tal-MOE, Isabel Santos, Membru tal-Parlament Ewropew.
Il-ministri qablu li l-UE ser tkompli tippromwovi tranżizzjoni demokratika fil-Venezwela. L-għan aħħari jibqa' soluzzjoni għall-kriżi mmexxija mill-Venezwelani li twassal għal elezzjonijiet kredibbli, inklużivi u trasparenti fil-livelli kollha.
Konklużjonijiet tal-Kunsill u deċiżjonijiet oħra
Il-Kunsill approva konklużjonijiet dwar il-Patt dwar il-Politika ta' Sigurtà u ta' Difiża Komuni.
Huwa adotta wkoll reġim ġdid ta' sanzjonijiet mmirat lejn persuni u entitajiet li jostakolaw it-tranżizzjoni politika fil-Mali, kif ukoll miżuri restrittivi kontra persuni u entitajiet fir-rigward tal-Grupp Wagner. L-attivitajiet ta' dan il-grupp jirriflettu l-istrateġija tal-gwerra ibrida tar-Russja, jippreżentaw theddida u qed joħolqu instabbiltà f'għadd ta' pajjiżi madwar id-dinja.
Is-sanzjonijiet ser ikopru l-grupp Wagner innifsu, tliet kumpaniji b'rabtiet mal-grupp u tmien operaturi militari responsabbli għal abbużi serji tad-drittijiet tal-bniedem jew attivitajiet destabbilizzanti fl-Ukrajna, is-Sirja, il-Libja, ir-Repubblika Ċentru-Afrikana, is-Sudan u l-Mozambique.
Waqt ikla informali, il-ministri għall-Affarijiet Barranin kellhom skambju ta' fehmiet dwar l-Afganistan mal-Viċi Prim Ministru u Ministru għall-Affarijiet Barranin tal-Qatar, Mohammed bin Abdulrahman Al-Thani.
Il-Qatar għandu rwol strateġiku fit-trattament tas-sitwazzjoni fl-Afganistan billi jiffaċilita l-interazzjonijiet tal-UE mal-awtoritajiet interim tat-Taliban, jiżgura passaġġ sikur għal dawk fil-bżonn, u jiffaċilita l-għoti tal-appoġġ umanitarju. Id-diskussjoni enfasizzat il-fehim kondiviż li xi forma ta' impenn operazzjonali huwa meħtieġ mal-gvern interim tat-Taliban, iżda dan ma jfissirx li jingħata kwalunkwe leġittimità. L-impenn jiddependi mill-progress li sar mit-Taliban skont il-ħames punti ta' riferiment definiti mill-Kunsill f'Settembru 2021.
Il-Kunsill adotta wkoll mingħajr diskussjoni il-punti li dehru fil-lista ta' punti A mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-Unjoni Ewropea tinsab magħquda u soda fl-appoġġ għas-sovranità u l-integrità territorjali tal-Ukrajna. Il-ministri kienu ċari ħafna llum, li kwalunkwe aggressjoni kontra l-Ukrajna ser iġġib magħha konsegwenzi politiċi u b'kost ekonomiku għoli għar-Russja.