"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 14 ta' Lulju 2025
Riżultati ewlenin
Relazzjonijiet kummerċjali bejn l-UE u l-Istati Uniti
Il-ministri kellhom skambju ta' fehmiet dwar is-sitwazzjoni attwali u l-prospetti għar-relazzjonijiet kummerċjali bejn l-UE u l-Istati Uniti, fid-dawl tal-iżviluppi reċenti.
Il-Kunsill sab li t-tariffi mħabbra ta' 30% huma inaċċettabbli u mhux ġustifikati. Madankollu, il-ministri baqgħu impenjati bis-sħiħ li jaħdmu mal-Istati Uniti fuq eżitu nnegozjat – wieħed li jagħti għajnuna tariffarja u jġib lura l-istabbiltà u l-prevedibbiltà għall-kummerċ transatlantiku. Il-ministri appoġġaw lill-Kummissjoni biex tmexxi dawn in-negozjati f'isem l-UE.
Kontromiżuri tal-UE
Il-ministri appoġġaw b'mod ġenerali l-estensjoni tas-sospensjoni tal-ewwel sett ta' kontromiżuri tal-UE (tariffi addizzjonali fuq l-importazzjonijiet tal-Istati Uniti b'valur ta' madwar EUR 21 biljun) mill-15 ta' Lulju sal-bidu ta' Awwissu, sabiex jingħata aktar lok għan-negozjati. L-aspetti proċedurali ta' din l-estensjoni ser jiġu ttrattati permezz tal-komitoloġija, taħt it-tmexxija tal-Kummissjoni.
B'mod parallel, it-tħejjijiet għal kontromiżuri addizzjonali possibbli ġew intensifikati, u l-Kummissjoni tista' tippreżenta l-proposta/i rilevanti jekk iċ-ċirkostanzi jirrikjedu dan.
Il-laqgħa tal-lum issejħet fid-dawl tal-isfidi attwali fir-relazzjonijiet kummerċjali mal-Istati Uniti. L-UE tinsab magħquda għal ftehim ta' benefiċċju reċiproku u ser inkomplu ninnegozjaw in bona fide. Fl-istess ħin, ninsabu lesti li niddefendu l-interessi tagħna, inkluż kontromiżuri proporzjonati jekk ikun meħtieġ. F'dawn iż-żminijiet ta' inċertezza ġeopolitika u protezzjoniżmu li qed jiżdied, huwa aktar importanti minn qatt qabel li aħna fl-UE ma nerġgħux lura għall-bqija tad-dinja. Irridu naċċelleraw in-negozjati kummerċjali bilaterali li għaddejjin ma' sħab oħra u nagħmlu l-almu tagħna għall-konklużjoni ta' ftehimiet.
Lars Løkke Rasmussen, ministru għall-Affarijiet Barranin tad-Danimarka
Devjazzjoni u diversifikazzjoni tal-kummerċ
Il-ministri ttrattaw ukoll kwistjonijiet relatati mal-konsegwenzi tal-politika kummerċjali l-ġdida tal-Istati Uniti bħad-devjazzjoni tal-kummerċ, li l-Kummissjoni qed timmonitorja mill-qrib. Din il-ħidma qed titwettaq f'kooperazzjoni mill-qrib mal-Istati Membri u l-partijiet ikkonċernati tan-negozju.
L-UE qed taċċellera wkoll l-isforzi biex tiddiversifika r-relazzjonijiet kummerċjali tagħha u tapprofondixxi s-sħubijiet globali. Il-ftehim politiku li ntlaħaq fit-13 ta' Lulju mal-Indoneżja dwar Ftehim ta' Sħubija Ekonomika Komprensiva huwa eżempju b'saħħtu u f'waqtu ta' din l-istrateġija usa'.
Tariffi tal-Istati Uniti
It-tariffi speċifiċi għall-pajjiż tal-Istati Uniti kontra l-UE huma sospiżi sal-1 ta' Awwissu. Madankollu, bħalissa l-Istati Uniti diġà qed japplikaw xi tariffi għall-UE: tariffa ta' “linja bażi” ta' 10%, “Taqsima 232” tariffi addizzjonali ta' 50% fuq l-azzar u l-aluminju, u 25% addizzjonali fuq il-karozzi. Bħala riżultat ta' dawn il-miżuri ta' politika kummerċjali tal-Istati Uniti, bħalissa madwar 70% tal-esportazzjonijiet tal-UE lejn l-Istati Uniti huma affettwati minn diversi tariffi addizzjonali tal-Istati Uniti.
Il-ministri kellhom skambju ta' fehmiet dwar in-negozjati kummerċjali bilaterali li għaddejjin, inkluż ftehimiet diġà nnegozjati u li għadhom pendenti, bħall-Mercosur, il-Messiku, l-Indoneżja u r-reviżjoni tal-Ftehim ta' Assoċjazzjoni mal-Ukrajna, kif ukoll negozjati kummerċjali li għaddejjin mal-Indja, it-Tajlandja, il-Filippini, il-Malażja, l-Awstralja, u l-pajjiżi tal-Kunsill ta' Kooperazzjoni tal-Golf.
Fil-kuntest tat-tensjonijiet kummerċjali attwali u t-tfixkil u l-imprevedibbiltà tar-relazzjoni kummerċjali Transatlantika, il-ministri ssottolinjaw l-importanza li jitħaffu n-negozjati kummerċjali bilaterali li għaddejjinu stennew il-proposti tal-Kummissjoni għall-ftehimiet mal-Mercosur u l-Messiku.
Il-ministri kienu favur il-bini ta' relazzjonijiet kummerċjali bilaterali aktar b'saħħithom ma' firxa usa' ta' sħab f'reġjuni bħall-Amerka Latina, l-Asja, l-Indo-Paċifiku, il-Lvant Nofsani, u l-Afrika kif ukoll mal-Ftehim Komprensiv u Progressiv għas-Sħubija Trans-Paċifika (CPTPP).
Il-ministri laqgħu l-qbil politiku milħuq mal-Indoneżja, li kien pass deċiżiv lejn il-konklużjoni tan-negozjati sa Settembru 2025, u ttamaw li jkun possibbli li jiġi konkluż ftehim ekonomikament sinifikanti mal-Indja qabel tmiem is-sena.
Il-ministri ddiskutew l-aħħar kuntatti maċ-Ċina u l-aspett kummerċjali tar-relazzjoni bilaterali, qabel is-summit bejn l-UE u ċ-Ċina, skedat aktar tard f'Lulju.
Il-Kummissjoni pprovdiet aġġornament dwar il-kuntatti tagħha mal-kontropartijiet Ċiniżi, b'enfasi fuq il-kontrolli tal-esportazzjoni Ċiniżi fuq materjali tal-art rari, l-iżbilanċi fl-aċċess għas-suq (inkluż dawk sanitarji u fitosanitarji, il-kożmetiċi, u l-farmaċewtiċi). Il-Kummissjoni infurmat ukoll lill-ministri dwar il-każ tal-vetturi elettriċi bil-batterija, u t-tweġiba Ċiniża għal dan tal-aħħar permezz ta' każijiet ta' difiża kummerċjali mhux sostanzjati dwar l-importazzjonijiet tal-UE tal-majjal, tal-ħalib u tal-brandy.
Il-ministri enfasizzaw il-ħtieġa għat-tneħħija tar-riskji u għad-diversifikazzjoni tar-relazzjonijiet kummerċjali tal-UE.
Kummerċ bejn l-UE u ċ-Ċina: fatti u ċifri (Infografika)
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
