Kunsill Affarijiet Ġenerali, 16/09/2019, 16 ta' Settembru 2019

Riżultati ewlenin

It-tisħiħ tal-istat tad-dritt fl-UE

Il-Kunsill kellu dibattitu ta' orjentazzjoni dwar it-tisħiħ tar-rispett għall-istat tad-dritt fl-UE.

Abbażi ta' dokument ta' informazzjoni tal-presidenza, il-ministri ddiskutew kif il-Kunsill jista' jikkontribwixxi għall-għan ġenerali tat-tisħiħ tal-istat tad-dritt fl-UE, u x'miżuri speċifiċi jistgħu jintużaw.

Id-dibattitu sar fi sfond tar-rieżami li jmiss tad-djalogu annwali tal-Kunsill dwar l-istat tad-dritt, li huwa skedat li jsir fil-laqgħa tal-Kunsill Affarijiet Ġenerali ta' Novembru. Huwa bena fuq diskussjonijiet dwar mekkaniżmu ta' evalwazzjoni bejn il-pari, kif ukoll il-komunikazzjoni tal-Kummissjoni tas-17 ta' Lulju li fiha l-Kummissjoni pproponiet, fost affarijiet oħra, li jiġi stabbilit Ċiklu ta' Rieżami tal-Istat tad-Dritt li jkopri l-istati membri kollha tal-UE.

Matul id-dibattitu, għadd ta' ministri esprimew l-appoġġ tagħhom għall-iżvilupp ta' mekkaniżmu preventiv għall-monitoraġġ tas-sitwazzjoni tal-istat tad-dritt fl-istati membri kollha tal-UE. Diversi parteċipanti enfasizzaw li kwalunkwe mekkaniżmu bħal dan jeħtieġ li jkun inklużiv u oġġettiv, filwaqt li jiżgura li l-istati membri kollha jiġu ttrattati b'mod indaqs. Barra minn hekk, kien importanti li tiġi rispettata d-diviżjoni ta' kompetenzi skont it-trattati u tiġi evitata d-duplikazzjoni għal kwalunkwe mekkaniżmu magħżul.

Il-presidenza issa ser tibgħat kwestjonarju lill-istati membri kollha. Ir-riżultati ta' dan il-kwestjonarju ser jinformaw l-evalwazzjoni tad-djalogu tal-Kunsill dwar l-istat tad-dritt fil-laqgħa tal-kunsill Affarijiet Ġenerali ta' Novembru.

• It-tisħiħ tar-rispett għall-istat tad-dritt fl-Unjoni - dokument ta' diskussjoni tal-presidenza
• Komunikazzjoni tal-Kummissjoni dwar it-tisħiħ tal-istat tad-dritt fl-Unjoni - Pjan ta' azzjoni

Il-laqgħa tal-lum tal-Kunsill tat l-opportunità lill-kollegi kollha tiegħi minn madwar l-UE li jiskambjaw ideat dwar il-promozzjoni u s-salvagwardja tal-istat tad-dritt. Huwa importanti li nittrattaw l-aspetti kollha tad-dibattitu fi spirtu kostruttiv. Ir-rieżami pjanat tad-djalogu annwali tal-Kunsill dwar l-istat tad-dritt joffrilna opportunità f'waqtha li nesploraw, f'termini prattiċi ħafna, x'jistgħu jagħmlu flimkien l-istati membri biex jikkontribwixxu għal dawn l-isforzi. Tytti Tuppurainen, Ministru għall-Affarijiet Ewropej tal-Finlandja

Kunsill Ewropew ta' Ottubru

Il-ministri bdew it-tħejjijiet għal-laqgħa tal-Kunsill Ewropew tas-17 u t-18 ta' Ottubru billi eżaminaw abbozz ta' aġenda annotata.

Fil-laqgħa tagħhom ta' Ottubru, il-mexxejja huma mistennija li jkollhom diskussjoni sostantiva dwar il-qafas finanzjarju pluriennali (QFP) li jmiss abbażi tal-ħidma tal-presidenza. Il-mexxejja ser jiddiskutu wkoll is-segwitu tal-Aġenda Strateġika 2019-2024 għall-Unjoni.

Skont l-iskeda ta' żmien tal-Parlament Ewropew, il-Kunsill Ewropew jista' jadotta d-deċiżjonijiet dwar il-ħatra tal-President tal-BĊE l-ġdid u l-Kummissjoni Ewropea l-ġdida.

Fid-dawl tal-avvenimenti, il-Kunsill Ewropew jista' wkoll jindirizza kwistjonijiet speċifiċi ta' politika barranija.

Il-qafas finanzjarju pluriennali li jmiss

Il-Kunsill ħa kont tal-ħidma fuq il-QFP għall-2021-2027.

Il-presidenza bagħtet kwestjonarju lid-delegazzjonijiet kollha matul is-sajf u wettqet laqgħat bilaterali fil-bidu ta' Settembru biex jiġu identifikati l-prijoritajiet u t-tħassib ewlieni tal-istati membri. Abbażi ta' dan, ser tabbozza dokument bħala kontribut tal-presidenza fit-tħejjijiet għall-iskambju ta' fehmiet fil-Kunsill Ewropew ta' Ottubru.

Wara gwida mill-mexxejja, il-presidenza tippjana li tippreżenta Kaxxa ta' Negozjar riveduta biċ-ċifri qabel tmien is-sena, sabiex tħejji għall-istadji li jmiss tan-negozjati.

B'mod parallel, il-ħidma ser tkompli fuq id-diversi proposti settorjali biex isir aktar progress fuq mandati tal-Kunsill jew jiġu konklużi ''fehimiet komuni'' addizzjonali mal-Parlament Ewropew.

Ir-rispett għall-valuri tal-UE fl-Ungerija

Il-Kunsill kellu seduta skont il-proċedura tal-Artikolu 7(1) TUE dwar l-Ungerija.

Is-seduta kopriet il-kwistjonijiet kollha li qamu fil-proposta motivata tal-Parlament Ewropew. Hija ppermettiet lill-ministri li jkollhom skambju aktar fil-fond mal-Ungerija dwar it-tħassib ewlieni identifikat mill-Parlament.

Il-presidenza għalqet is-seduta billi ppreżentat konklużjonijiet proċedurali. Skont il-modalitajiet standard għas-seduti, l-ebda valutazzjoni dwar is-sustanza tal-kwistjonijiet ma tiġi inkluża f'dan l-istadju.

Punti oħra

Taħt affarijiet oħrajn, il-presidenza informat lill-ministri dwar ir-riżultati ewlenin li ħarġu mill-Konferenza dwar id-Demokrazija, l-Istat tad-Dritt u d-Drittijiet Fundamentali ospitata mill-presidenza Finlandiża f'Helsinki fl-10 u l-11 ta' Settembru.

Il-Kummissjoni aġġornat lill-ministri dwar l-iżviluppi rigward l-istat tad-dritt fil-Polonja wara l-laqgħa tal-Kunsill Affarijiet Ġenerali ta' Lulju.