Kunsill Trasport, Telekomunikazzjoni u Enerġija, 27/11/2014, 27 ta' Novembru 2014

Proposta ta' kontinent konness li qed tiġi diskussa fil-Kunsill

Meta ltaqgħu fi Brussell fis-27 ta’ Novembru, il-ministri għat-telekomunikazzjoni ddiskutew proposta li temenda l-qafas regolatorju tat-telekomunikazzjoni tal-UE. Il-Kunsill adotta wkoll konklużjonijiet dwar il-governanza tal-internet. 

Kontinent konness

Il-Kunsill iddiskuta s-sitwazzjoni attwali dwar l-hekk imsejħa proposta 'kontinent konness', b'enfasi fuq żewġ kwistjonijiet prinċipali: ir-roaming u n-newtralità tal-internet.

Dwar ir-roaming, bosta stati membri esprimew il-ħtieġa li jkollhom aktar żmien biex janalizzaw liema jkun l-aħjar approċċ biex jiġu evitati effetti mhux intenzjonati tar-roaming. B’mod partikolari, iridu li tiġi evitata sitwazzjoni fejn il-prezzijiet domestiċi jiżdiedu biex jagħmlu tajjeb għal kwalunkwe telf li l-operaturi jistgħu jġarrbu fuq servizzi tar-roaming.

Dwar in-newtralità tal-internet, il-biċċa l-kbira tal-istati membri qalu li hu importanti li jkollhom aċċess miftuħ u mhux diskriminatorju għall-Internet, iżda li huwa daqstant importanti li jiġi evitat xkiel għall-innovazzjoni u l-investiment.

Governanza tal-Internet

Il-Kunsill adotta konklużjonijiet dwar il-governanza tal-internet, fejn iddeskriva fil-qosor ir-rwol tal-Ewropa fit-tfassil tal-futur tal-governanza tal-Internet. B’mod partikolari, huma jenfasizzaw l-appoġġ tal-UE għal mudell ta’ ħafna partijiet ikkonċernati għall-governanza tal-internet. Huma jinnotaw ukoll il-ħtieġa li jiġi indirizzat l-impatt ta’ konflitti possibbli ta’ ġurisdizzjoni dwar il-protezzjoni tad-data u indikazzjonijiet ġeografiċi. Dwar din il-kwistjoni, il-konklużjonijiet jaffermaw mill-ġdid il-ġibda tal-UE għall-istess drittijiet fundamentali online bħal dawk offline.

Suġġetti oħra fuq l-aġenda

Il-ministri ddiskutew ukoll għadd ta’ kwistjonijiet oħra, inkluż:

• il-ħidma li għaddejja dwar proposta biex titjieb l-aċċessibbiltà tas-siti web tas-settur pubbliku
• l-istat attwali tal-ħidma dwar il-proposta ta' sigurtà tan-netwerk u tal-informazzjoni
• l-aspetti ta' telekomunikazzjoni tar-reviżjoni ta’ nofs it-term tal-Ewropa 2020
• il-prinċipji ta’ reġistrazzjoni tad-dominju tal-ogħla livell .eu

Il-Presidenza Latvjana li jmiss ippreżentat ukoll il-programm ta’ ħidma tagħha għal kwistjonijiet ta’ telekomunikazzjoni.