Kunsill Trasport, Telekomunikazzjoni u Enerġija, 05/03/2015, 5 ta' Marzu 2015

Riżultati ewlenin

Hemm bżonn urġenti li naslu għal suq intern Ewropew tal-enerġija li jaħdem b'mod sħiħ u jkun interkonness biex tiġi żgurata l-provvista bla waqfien ta' enerġija fl-Ewropa kollha.”  Dana Reizniece-Ozola, Ministru tal-Latvja għall-Ekonomija

Unjoni tal-enerġija

Il-Kunsill kellu skambju ta’ fehmiet dwar l-unjoni tal-enerġija, li indirizza b’mod partikolari kwistjonijiet bħas-sigurtà tal-enerġija, it-tlestija tas-suq intern tal-enerġija, l-effiċjenza fl-enerġija, id-dekarbonizzazzjoni tal-ekonomija u l-kompetittività.

L-elementi ewlenin tad-dibattitu ser jintbagħtu lill-President tal-Kunsill Ewropew bħala kontribut għall-Kunsill Ewropew ta’ Marzu.

Il-Ministru tal-Latvja għall-Ekonomija, is-Sinjura Dana Reizniece-Ozola, qalet:

"Neħtieġu titjib inġenerali u b'saħħtu tal-politika biex jiġu indirizzati l-isfidi li qed tħabbat wiċċha magħhom l-UE fir-rigward tas-sigurtà tal-enerġija, il-kompetittività u t-triq tagħha lejn ekonomija b'livell baxx ta' emissjonijiet ta' karbonju. It-tħassib taċ-ċittadini tal-UE dwar is-sigurtà tal-enerġija fi żminijiet ġeopolitiċi diffiċli, l-impjiegi, il-mobilità sostenibbli jew il-kontijiet tal-enerġija tagħhom iridu jkunu fil-qalba ta’ dan ir-rispons ta’ politika".

L-infrastruttura tal-enerġija

Il-Kunsill kellu wkoll dibattitu ta’ orjentazzjoni dwar l-iżviluppi u l-prijoritajiet għall-infrastruttura tal-enerġija, bħala mezz biex naslu għal suq intern Ewropew tal-enerġija li jaħdem b'mod sħiħ u jkun interkonness.

Il-Ministri indirizzaw b’mod partikolari l-kooperazzjoni reġjonali, il-finanzjament tal-infrastruttura tal-enerġija u miżuri biex jintemm l-iżolament fil-qasam tal-enerġija sabiex tintlaħaq il-mira ta’ 10 % tal-interkonnessjonijiet tal-elettriku eżistenti sal-2020.

L-eżitu tad-dibattitu ser iservi ta' kontribut mill-Kunsill tal-Enerġija għar-rapport ta’ sintesi tal-Presidenza dwar l-istrateġija Ewropa 2020.

Il-Ministru tal-Latvja għall-Ekonomija, is-Sinjura Dana Reizniece-Ozola, qalet: "Huwa bżonn urġenti li naslu għal suq intern Ewropew tal-enerġija li jkun jaħdem b'mod sħiħ u jkun interkonness biex tiġi żgurata l-provvista bla waqfien tal-enerġija fl-Ewropa kollha. Kooperazzjoni reġjonali akbar tista' tikkontribwixxi b'mod sostanzjali biex jintemm l-iżolament u tintlaħaq il-mira ta' interkonnessjoni elettrika ta' 10% sal-2020".

Il-Kunsill adotta wkoll mingħajr dibattitu regolament dwar il-monitoraġġ, ir-rappurtar u l-verifika ta' emissjonijiet ta' diossidu tal-karbonju mit-trasport bil-baħar.