Kunsill Trasport, Telekomunikazzjoni u Enerġija, 09/12/2014, 9 ta' Diċembru 2014

Il-Kunsill jiddiskuti l-azzjoni ta' segwitu għall-qafas ta' politika għall-klima u l-enerġija għall-2030

F'laqgħa fi Brussell fid-9 ta' Diċembru, il-ministri għall-enerġija tal-UE ddiskutew is-segwitu għall-qafas ta' politika għall-klima u l-enerġija għall-2030 wara l-laqgħa tal-Kunsill Ewropew f'Ottubru. Huma adottaw konklużjonijiet dwar it-tlestija tas-suq intern tal-enerġija tal-UE.

Qafas ta' politika għall-2030

Il-Kunsill organizza dibattitu ta' orjentazzjoni dwar il-qafas ta' politika għall-klima u l-enerġija għall-2030, bħala segwitu għal-laqgħa tal-Kunsill Ewropew f'Ottubru 2014. Id-dibattitu ffoka fuq il-proċess il-ġdid ta' governanza. Dan il-proċess ser jirfed l-implimentazzjoni tal-qafas u jgħin biex ikun żgurat li l-UE tilħaq l-għanijiet tagħha għall-politika tal-enerġija.

B'mod ġenerali, il-ministri jqisu li l-proċess il-ġdid ser jikkontribwixxi għall-konsistenza tal-politiki tal-UE dwar il-klima u l-enerġija. Madanakollu, fil-fehma tagħhom għandu jinżamm kemm jista' jkun flessibbli.

Il-Kunsill iddiskuta wkoll l-indikaturi tal-enerġija għall-monitoraġġ tal-politiki dwar il-klima u l-enerġija. Mid-dibattitu ħareġ ċar li jeħtieġ issir aktar ħidma biex jiġi żviluppat approċċ komuni dwar dan.

Il-Presidenza Latvjana li jmiss tal-Kunsill qed tħejji biex isiru aktar diskussjonijiet dwar il-qafas ta' politika għall-2030. 

Suq intern tal-enerġija

Il-Kunsill adotta konklużjonijiet dwar it-tlestija tas-suq intern tal-enerġija. Il-konklużjonijiet jidentifikaw azzjonijiet prijoritarji biex jgħinu fit-tlestija tas-suq intern tal-enerġija. B'mod partikolari, jikkonċentraw fuq:

• l-adozzjoni u l-implimentazzjoni tal-kodiċijiet tan-netwerk
• l-implimentazzjoni ta' proġetti ta' interess komuni
• kooperazzjoni fil-livell tal-UE bejn l-amministrazzjonijiet nazzjonali, l-awtoritajiet regolatorji nazzjonali u l-operaturi tan-netwerk
• integrazzjoni tas-suq reġjonali, interkonnessjonijiet u kooperazzjoni transkonfinali
• sensibilizzazzjoni u involviment tal-konsumaturi

Suġġetti oħra fuq l-aġenda

Il-ministri ddiskutew l-aspetti tar-reviżjoni ta' nofs it-term tal-istrateġija Ewropa 2020 li jirrigwardaw l-enerġija, inkluż prijoritajiet possibbli ġodda.

Il-Kunsill adotta wkoll, mingħajr dibattitu, il-pożizzjoni tiegħu fl-ewwel qari dwar l-abbozz ta' direttiva dwar it-tibdil indirett fl-użu tal-art (ILUC). Id-direttiva, li temenda d-direttiva dwar il-kwalità tal-karburanti u dik dwar l-enerġija rinnovabbli, għandha l-għan tibda tranżizzjoni għal bijokarburanti li tikseb tnaqqis sostanzjali ta' gassijiet serra.

Il-presidenza tal-Kunsill u l-Kummissjoni għarrfu wkoll lill-ministri dwar l-iżviluppi reċenti fil-qasam tar-relazzjonijiet esterni dwar l-enerġija.