Kunsill Trasport, Telekomunikazzjoni u Enerġija, 03/12/2014, 3 ta' Diċembru 2014

Approċċ ġenerali għall-pakkett tal-Ajru Uniku Ewropew II+ li ntlaħaq qbil dwaru fil-Kunsill

Imlaqqgħin fi Brussell fit-3 ta' Diċembru, il-ministri għat-trasport tal-UE adottaw approċċ ġenerali għaż-żewġ proposti fil-pakkett Ajru Uniku Ewropew II+. Huma ddiskutew ukoll ir-raba' pakkett ferrovjarju u adottaw approċċ ġenerali dwar it-tħassir ta' regolament relatat li m'għadux jintuża.

Ajru Uniku Ewropew II+

Iż-żewġ proposti tal-pakkett tal-Ajru Uniku Ewropew II+ għandhom l-għan li  jħaffu l-implimentazzjoni  tal-Ajru Uniku Ewropew u li  jemendaw ir-regoli għall-Aġenzija Ewropea tas-Sikurezza tal-Avjazzjoni.

L-abbozz ta' regolament dwar l-implimentazzjoni tal-Ajru Uniku Ewropew huwa proposta 'riformulata', li tiġbor flimkien l-erba' regolamenti eżistenti dwar l-Ajru Uniku Ewropew taħt att leġislattiv wieħed u tirrevedihom.

Fit-test li laħaq qbil dwaru l-Kunsill, l-Ajru Uniku Ewropew ser ikun fih  netwerk pan-Ewropew koerenti ta' rotot. L-ispazju tal-ajru Ewropew, il-ġestjoni tan-netwerk u s-sistemi ta' ġestjoni tat-traffiku fl-ajru progressivament ser isiru aktar integrati.

L-emendi proposti tal-EASA huma maħsuba biex jikkonformaw l-kamp ta' applikazzjoni attwali tar-regolament tal-EASA mal-leġislazzjoni dwar l-Ajru Uniku Ewropew u biex jinkludi l-kunċetti ta' interoperabbiltà tal-Ajru Uniku Ewropew. 

Ir-raba' pakkett ferrovjarju

Il-Kunsill adotta approċċ ġenerali dwar proposta biex tħassar ir-regolament dwar in-normalizzazzjoni ta' kontijiet ta' impriżi ferrovjarji. Ir-regolament m'għadux validu u lanqas mhu kumpatibbli mal-leġislazzjoni tal-UE.

Il-ministri ħarsu wkoll lejn il-progress fuq żewġ proposti oħra biex itejbu s-servizzi ferrovjarji tal-UE taħt il-pilastru tal-governanza u l-ftuħ tas-suq  tar-raba' pakkett ferrovjarju.

Suġġetti oħra fuq l-aġenda

Il-Kunsill adotta wkoll  konklużjonijiet dwar l-infrastruttura tat-trasport  u n-netwerk trans-Ewropew (TENT). Il-konklużjonijiet ser jikkontribwixxu għall-eżami intermedju tal-istrateġija għat-tkabbir Ewropa 2020.

Il-ministri ddiskutew ukoll għadd ta' kwistjonijiet oħrajn, fosthom:

• il-Konvenzjoni Internazzjonali dwar Standards ta' Taħriġ, Ċertifikazzjoni u Għassa għall-Persunal tal-Bastimenti tas-Sajd
• il-konferenza annwali tal-EASA dwar is-sikurezza, b'mod partikolari dwar is-suġġett ta' inġenji tal-ajru mingħajr pilota
• l-impatt tal-embargo Russu  fuq is-settur Litwan tat-trasport tal-merkanzija bit-triq

Il-Presidenza Latvjana li jmiss tal-Kunsill ippreżentat ukoll ix-xogħol tagħha fuq kwistjonijiet ta' trasport.