Kunsill Trasport, Telekomunikazzjoni u Enerġija, 5 u 6 ta' Ġunju 2014

Il-Kunsill jilħaq qbil politiku dwar il-pilastru tekniku tar-4 pakkett ferrovjarju

Meta ltaqa' fil-5 u s-6 ta' Ġunju fil-Lussemburgu, il-Kunsill iddiskuta u approva varjetà ta' kwistjonijiet dwar it-trasport u t-telekomunikazzjoni, inklużi ftehimiet politiċi dwar elementi tekniċi tar-4 pakkett ferrovjarju u dwar id-daqsijiet tat-trakkijiet

Ir-4 pakkett ferrovjarju

Il-ministri laħqu qbil politiku dwar 3 biċċiet ta' leġislazzjoni li jagħmlu l-'pilastru tekniku' tar-4 pakkett ferrovjarju. Dan il-pilastru tekniku jinkludi abbozz ta' direttivi dwar l-interoperabilità u s-sikurezza tal-ferroviji Ewropej u abbozz ta' regolament dwar l-Aġenzija Ferrovjarja Ewropea.

It-tlestija tal-pilastru tekniku żżid l-ekonomiji ta' skala għall-impriżi ferrovjarji madwar l-UE, tnaqqas l-ispejjeż amministrattivi u tħaffef il-proċeduri. Għandha wkoll tgħin biex tiġi evitata kwalunkwe diskriminazzjoni fil-ħruġ ta' ċertifikati ta' sigurtà u awtorizzazzjonijiet ta' vetturi.

Jeħtieġ li l-proposti jiġu approvati kemm mill-Parlament Ewropew kif ukoll mill-Kunsill.

Daqsijiet tat-trakkijiet

Il-Kunsill laħaq qbil politiku dwar regoli aġġornati għall-piżijiet u l-qisien massimi ta' vetturi tqal tal-merkanzija, xarabanks u kowċijiet. Id-direttivi ġdida proposta għandha l-għan li taġġorna r-regoli attwali biex tittejjeb l-ajrudinamika, l-effiċjenza fil-karburant u s-sigurtà tal-vetturi fuq it-triq.

B'mod partikolari, il-bidliet taħt il-proposta jippermettu li l-ġwienaħ ta' wara jkunu mwaħħlin mal-vettura u li l-parti ta' quddiem tal-vettura tkun iddisinjata b'mod aktar ajrudinamiku. Id-disinn il-ġdid tal-kabina tat-trakkijiet itejjeb il-kamp viżiv tax-xufiera u s-sigurtà kemm tax-xufiera kif ukoll tal-persuni l-oħrajn li jużaw it-triq. L-użu taż-żona ġdida ta' devjazzjoni tal-forma (deflecting shape) u ta' assorbiment tal-kolliżjoni (crumple zone) proposti jnaqqas ħafna l-impatt tal-kolliżjonijiet fuq quddiem.

It-test maqbul tal-Kunsill jippromwovi wkoll l-użu ta' karburanti nodfa billi jippermetti żieda fil-piż ta' tunnellata għall-vetturi b'karburant alternattiv.

Suġġetti oħra fuq l-aġenda

Fil-5 ta' Ġunju, il-Kunsill ittratta għadd ta' kwistjonijiet oħra dwar it-trasport, fosthom:

• is-sitwazzjoni attwali rigward regolament propost dwar regoli ġodda għall-aċċess tas-suq għas-servizzi portwarji u t-trasparenza finanzjarja tal-portijiet
• il-progress li sar fl-aġġornament propost fir-regoli għad-drittijiet tal-passiġġieri tal-ajru tal-UE
• ir-reviżjoni ta' nofs it-term tal-politika tal-UE dwar it-trasport marittimu sal-2018 u l-prospetti sal-2020

Fis-6 ta' Ġunju, il-Kunsill iffoka fuq kwistjonijiet ta' telekomunikazzjoni. B'mod partikolari, il-ministri ddiskutew:

• il-progress fl-abbozz ta' direttiva dwar is-sigurtà tan-netwerks u tal-informazzjoni, bil-għan li jiġi żgurat livell għoli ta' ċibersigurtà fl-UE
• l-istat attwali tal-proposta biex jiġi emendat il-qafas regolatorju tal-UE dwar it-telekomunikazzjoni, magħruf bħala l-'pakkett tat-telekomunikazzjoni'

Kien hemm ukoll preżentazzjoni tal-programm ta' ħidma tal-Kunsill taħt il-Presidenza Taljana li jmiss.