Kunsill Trasport, Telekomunikazzjoni u Enerġija, 13/03/2015, 13 ta' Marzu 2015

Riżultati prinċipali

Liberalizzazzjoni u governanza tas-suq ferrovjarju

Il-Kunsill kellu dibattitu pubbliku ta’ orjentazzjoni dwar żewġ proposti għat-titjib tas-servizzi ferrovjarji fl-UE (ir-raba’ pakkett ferrovjarju). Il-proposti għandhom l-għan li jilliberalizzaw is-servizzi tal-passiġġieri u jsaħħu l-governanza tal-infrastruttura ferrovjarja. "Id-dibattitu produttiv tal-lum se jgħinna nimxu ‘l quddiem sabiex titrawwem il-prestazzjoni u l-kompetittività tas-settur ferrovjarju Ewropew. L-għan tagħna huwa li jintlaħaq approċċ ġenerali dwar iż-żewġ proposti sa tmiem il-presidenza tagħna", qal Anrijs Matīss, il-Ministru għat-Trasport tal-Latvja, li ppresieda l-laqgħa.

Id-dibattitu produttiv tal-lum se jgħinna nimxu ‘l quddiem sabiex titrawwem il-prestazzjoni u l-kompetittività tas-settur ferrovjarju Ewropew. Anrijs Matīss, il-Ministru għat-Trasport tal-Latvja

Il-politika tat-trasport u t-tkabbir u l-impjiegi

Il-ministri ddiskutew ukoll modi kif il-politika tat-trasport tista’ tagħti spinta lill-kompetittività, it-tkabbir u l-impjiegi. Il-ministri kkunsidraw, fost affarijiet oħra, kif in-netwerk tat-trasport tal-UE jista’ jsir aktar effettiv fil-kuntest ta’ kompetizzjoni globali dejjem tiżdied. "L-industrija tat-trasport tal-UE timpjega direttament iktar minn 10 miljun persuna u tammonta għal madwar 9% tal-PDG. Aktar mobbiltà interna u rabtiet esterni aktar effettivi jiġġeneraw it-tkabbir, l-impjiegi u l-investiment", qal il-Ministru Matīss. Il-fehmiet tal-ministri se jinġabru f'rapport konġunt ta’ sinteżi, li se jiġi ppreżentat lill-Kunsill Ewropew ta’ Marzu bħala parti mill-proċess annwali tas-Semestru Ewropew.

Il-laqgħa li jmiss tal-ministri tat-trasport tal-ASEM

Taħt affarijiet oħra, il-presidenza aġġornat lill-ministri dwar it-tielet laqgħa tal-ministri tat-trasport tal-ASEM dwar l-iżvilupp tal-konnessjonijiet tat-trasport bejn l-Ewropa u l-Asja. Il-laqgħa se ssir f’Riga fid-29 u t-30 ta’ April.

Avjazzjoni

Il-presidenza aġġornat ukoll lill-ministri dwar l-eżitu tal-konferenza dwar Sistemi ta’ Inġenji tal-Ajru Ppilotati mill-Bogħod (RPAS jew drones) f’Riga fil-5 u s-6 ta’ Marzu 2015. "Hemm suq emerġenti tal-RPAS. Jeħtieġ li noħolqu klima ta’ investiment favorevoli u regoli ċari biex tkompli tiġi żviluppata l-industrija tad-drones fl-Ewropa sabiex iżżomm il-pożizzjoni tagħha li tinsab fuq quddiem nett", qal il-Ministru Matīss. Kwistjonijiet tal-avjazzjoni - b’mod partikolari r-rwol tal-avjazzjoni bħala mutur ewlieni għat-tkabbir ekonomiku - kienu wkoll is-suġġett tal-ikla ta' ħidma tal-ministri. Id-dibattitu se jikkontribwixxi għat-tħejjija li jmiss tal-pakkett tal-avjazzjoni tal-Kummissjoni.

• Ir-raba' pakkett ferrovjarju
• Semestru Ewropew (informazzjoni ġenerali)

• Eżitu tal-laqgħa tal-Kunsill