Kunsill Trasport, Telekomunikazzjoni u Enerġija, 26/11/2015, 26 ta' Novembru 2015

Riżultati ewlenin

Il-Kunsill laħaq approċċ ġenerali dwar il-proposta għal regolament li jistabbilixxi qafas għat-tikkettar dwar l-effiċjenza fl-enerġija.

L-objettiv ewlieni tal-proposta huwa li jiġu promossi l-innovazzjoni u l-produzzjoni ta’ prodotti dejjem aktar effiċjenti fl-użu tal-enerġija. Din tippermetti lill-konsumaturi jagħmlu għażliet informati dwar il-konsum tal-enerġija fix-xiri tagħhom, u b'hekk tikkontribwixxi għall-moderazzjoni ġenerali tad-domanda għall-enerġija fil-livell tal-Unjoni.

Nilqa’ bi pjaċir il-konklużjonijiet adottati mill-Kunsill dwar sistema ta’ governanza tal-Unjoni tal-Enerġija. Dan huwa pass 'il quddiem importanti. Dawn il-konklużjonijiet joħolqu l-opportunità għall-UE u l-istati membri biex jimxu mill-approċċ tekniku eżistenti għall-politika tal-enerġija għal Unjoni tal-Enerġija aktar integrata u politika. Dan ser jiżgura li flimkien noħolqu benefiċċji kemm għan-negozji kif ukoll għall-konsumaturi Il-ministru Schneider, Ministru għall-Ekonomija u l-Kummerċ Barrani tal-Lussemburgu

Il-Kunsill adotta konklużjonijiet dwar il-governanza tal-Unjoni tal-Enerġija, li ser jipprovdu gwida lill-Kummissjoni fl-istabbiliment ta' Unjoni tal-Enerġija fix-xhur u s-snin li ġejjin, b’mod partikolari rigward l-istrument ta’ governanza.

Is-sistema ta’ governanza ser timmonitorja l-progress kollettiv tal-UE biex jintlaħqu l-miri tal-UE dwar l-enerġija u l-klima u l-objettivi ta' politika ġenerali fil-ħames dimensjonijiet. Hija ser tipprovdi wkoll ħarsa ġenerali konsistenti u trasparenti dwar l-istat tal-Unjoni tal-Enerġija.

Il-Kunsill kellu dibattitu ta’ orjentazzjoni, f’sessjoni pubblika, dwar disinn ġdid tas-suq tal-enerġija u dwar patt ġdid għall-konsumaturi tal-enerġija, bħala parti mis-segwitu għal dawn iż-żewġ komunikazzjonijiet relatati tal-Kummissjoni. Il-proposti leġislattivi dwar iż-żewġ kwistjonijiet huma mistennija għat-tieni nofs tal-2016.

L-enfasi tad-dibattitu kien fuq ir-rwol, ir-responsabbiltajiet u s-setgħat tal-Operaturi tas-Sistema ta’ Distribuzzjoni (DSO) u r-riforma tas-swieq tal-enerġija bl-imnut.

F’dan il-kuntest, il-ministri ħadu nota tal-ewwel rapport annwali tal-Kummissjoni dwar l-istat tal-Unjoni tal-Enerġija, ippreżentat mill-Kummissarju Šefčovič. Ir-rapport jipprovdi analiżi tas-sitwazzjoni tal-enerġija kemm fil-livell tal-UE kif ukoll fil-livell nazzjonali, abbażi ta' żjarat tal-Kummissarju f'kull stat membru u jinkludi skedi informattivi għal kull pajjiż, kif ukoll rakkomandazzjonijiet mill-Kummissjoni.

Waqt ikla ta’ ħidma, il-ministri kellhom skambju ta’ fehmiet dwar il-konferenza li ġejja dwar it-tibdil fil-klima f’Pariġi (COP21), wara li ngħataw informazzjoni mill-Kummissarju Arias Cañete dwar l-istat attwali tat-tħejjijiet.