"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għat-telekomunikazzjoni, 14 ta' Ottubru 2021
Riżultati ewlenin
Att dwar l-Intelliġenza Artifiċjali
Il-ministri għat-telekomunikazzjoni kellhom l-ewwel dibattitu ta' orjentazzjoni fil-fond tagħhom rigward l-Att dwar l-Intelliġenza Artifiċjali propost, biex jipprovdu gwida politika għal aktar ħidma fuq din il-proposta kumplessa.
Id-diskussjoni ffukat fuq it-tfassil regolatorju tal-Att u l-isfidi involuti fl-implimentazzjoni effettiva tiegħu.
Il-ministri llum esprimew l-appoġġ ċar tagħhom għal liġi komprensiva waħda dwar l-intelliġenza artifiċjali, li sservi bħala mudell madwar id-dinja, bl-istess mod bħar-regolament ġenerali dwar il-protezzjoni tad-data, il-GDPR, fil-qasam tal-protezzjoni tad-data personali. Għad hemm ħidma sostanzjali xi ssir, peress li rridu niżguraw li l-Att dwar l-Intelliġenza Artifiċjali jilħaq iż-żewġ għanijiet tiegħu li jiżgura s-sikurezza u r-rispett għad-drittijiet fundamentali u jistimula l-iżvilupp u l-użu tat-teknoloġija bbażata fuq l-IA fis-setturi kollha. Il-presidenza Slovena ser tkompli l-ħidma intensiva fuq din il-proposta, li hija tqis bħala prijorità ewlenija fil-qasam diġitali.
Boštjan Koritnik, Ministru għall-Amministrazzjoni Pubblika tas-Slovenja u president tal-laqgħa
Matul id-diskussjoni, il-ministri enfasizzaw il-benefiċċji soċjali u ekonomiċi konsiderevoli li l-intelliġenza artifiċjali tista' ġġib magħha f'firxa wiesgħa ta' setturi, iżda enfasizzaw ukoll il-ħtieġa li tiġi protetta l-privatezza u jiġu żgurati s-sikurezza u s-sigurtà, sabiex tinbena l-fiduċja meħtieġa f'dawn it-teknoloġiji ġodda.
Il-ministri rrakkomandaw b'mod qawwi li titkompla l-ħidma lejn l-istabbiliment ta' qafas regolatorju orizzontali u ċċentrat fuq il-bniedem għall-IA, kif propost mill-Kummissjoni, biex jiġu żgurati ċ-ċertezza legali u l-konsistenza għall-iżviluppaturi u l-utenti. Xi delegazzjonijiet semmew il-ħtieġa li tiġi żgurata konsistenza mar-regoli relatati stabbiliti f'leġiżlazzjoni oħra.
Filwaqt li tindirizza r-riskji u tiżgura li s-sistemi tal-IA jirrispettaw il-valuri tal-UE, il-liġi l-ġdida trid tibqa' valida fil-futur u trawwem l-innovazzjoni. Biex jinkiseb dan, id-dispożizzjonijiet tagħha għandhom ikunu flessibbli biżżejjed biex jadattaw għat-teknoloġiji li qed jevolvu malajr.
Id-delegazzjonijiet laqgħu l-approċċ ibbażat fuq ir-riskju tal-proposta, iżda indikaw li ħafna kwistjonijiet jeħtieġu aktar diskussjoni, b'mod partikolari rigward il-kamp ta' applikazzjoni tal-Att, l-aspetti tal-infurzar tal-liġi u d-definizzjonijiet ta' termini ewlenin. Spjegazzjoni ċara dwar dawn kienet meqjusa essenzjali għaċ-ċertezza legali u l-implimentazzjoni bla xkiel tal-Att.
Ambjenti ta' esperimentazzjoni regolatorja u faċilitajiet ta' esperimentazzjoni tqiesu bħala għodod utli għal regolamentazzjoni u implimentazzjoni aktar intelliġenti. L-istandardizzazzjoni u d-disponibbiltà ta' data ta' kwalità għolja għandhom jiġu promossi, u diversi ministri semmew ir-rwol importanti tal-proposti attwali u futuri dwar id-data f'dan ir-rigward.
Għadd ta' ministri semmew l-importanza ta' infurzar u superviżjoni effettivi, speċjalment is-sorveljanza mill-bniedem. L-istruttura ta' governanza għandha tkun sempliċi, u l-piż amministrattiv u finanzjarju għall-operaturi, b'mod partikolari l-SMEs u n-negozji ġodda, għandu jinżamm kemm jista' jkun baxx. Għandu jiġi offrut appoġġ speċjali lill-SMEs biex jiġi żgurat li dawn ikunu jistgħu jikkonformaw faċilment mar-regoli l-ġodda.
Id-diskussjonijiet dwar il-proposta ser ikomplu fil-grupp ta' ħidma tal-Kunsill dwar it-telekomunikazzjoni. Il-presidenza għandha l-għan li tippreżenta proposta ta' kompromess f'Novembru.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-ministri llum esprimew l-appoġġ ċar tagħhom għal liġi komprensiva waħda dwar l-intelliġenza artifiċjali, li sservi bħala mudell madwar id-dinja, bl-istess mod bħar-regolament ġenerali dwar il-protezzjoni tad-data, il-GDPR, fil-qasam tal-protezzjoni tad-data personali. Għad hemm ħidma sostanzjali xi ssir, peress li rridu niżguraw li l-Att dwar l-Intelliġenza Artifiċjali jilħaq iż-żewġ għanijiet tiegħu li jiżgura s-sikurezza u r-rispett għad-drittijiet fundamentali u jistimula l-iżvilupp u l-użu tat-teknoloġija bbażata fuq l-IA fis-setturi kollha. Il-presidenza Slovena ser tkompli l-ħidma intensiva fuq din il-proposta, li hija tqis bħala prijorità ewlenija fil-qasam diġitali.
