"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Enerġija), 26 ta' Ottubru 2021
Riżultati ewlenin
Illum, il-ministri tal-UE għall-enerġija ltaqgħu fil-Lussemburgu biex jaqsmu l-fehmiet dwar iż-żieda fil-prezzijiet tal-enerġija u jiddiskutu miżuri ta’ mitigazzjoni possibbli fil-livell nazzjonali u dak tal-UE.
Prezzijiet tal-enerġija
Wara tnaqqis fil-prezzijiet tal-enerġija globali u tal-UE lejn l-aħħar tal-2019 u l-2020, kien hemm żieda qawwija f'dawn l-aħħar xhur.
B’kont meħud tad-diskussjonijiet politiċi dwar rimedji possibbli li saru f’formazzjonijiet differenti, il-Presidenza tal-Kunsill iddeċidiet li tlaqqa’ Kunsill straordinarju tal-ministri għall-enerġija. L-għan kien li jsir segwitu għad-diskussjonijiet tal-Kunsill Ewropew tal-21u t-22 ta’ Ottubru, li ta mandat lill-Kunsill tal-Enerġija biex ikompli jaħdem fuq din il-kwistjoni importanti, u biex jagħmel l-ewwel diskussjoni formali dwar is-"sett ta’ għodod" tal-Kummissjoni dwar il-prezzijiet tal-enerġija ppreżentat fit-13 ta’ Ottubru.
It-tranżizzjoni ekoloġika mhijiex parti mill-problema. It-tranżizzjoni ekoloġika hija parti mis-soluzzjoni. Irridu niksbu żewġ għanijiet importanti - in-newtralità klimatika u Ewropa indipendenti fl-enerġija. Għalhekk irridu ninvestu f’sorsi ta’ enerġija rinnovabbli u f’teknoloġiji ġodda.
Jernej Vrtovec, Ministru Sloven għall-Infrastruttura
Id-dibattitu ffoka fuq żewġ mistoqsijiet imħejjija mill-presidenza:
Kif tista’ l-azzjoni fil-livell tal-UE tappoġġa u tikkumplimenta l-miżuri immedjati meħuda mill-istati membri biex jittaffa l-impatt taż-żieda fil-prezzijiet tal-enerġija fuq iċ-ċittadini u n-negozji tal-UE?
Fil-fehma tal-istati membri, il-miżuri fuq terminu medju proposti mill-Kummissjoni huma biżżejjed biex jindirizzaw l-isfida tal-fluttwazzjonijiet futuri fil-prezzijiet tal-enerġija? X’miżuri oħra, inkluż l-użu ta’ għodod finanzjarji tal-UE, jistgħu jiġu previsti fil-livell tal-UE u dak tal-istati membri?
Il-ministri laqgħu s-"sett ta’ għodod" tal-Kummissjoni bħala bażi tajba għad-diskussjonijiet u appoġġaw b’mod ġenerali l-analiżi tal-Kummissjoni tal-kawżi taż-żieda fil-prezzijiet tal-enerġija.
Rigward il-miżuri fuq perijodu qasir, il-ministri qablu li għandhom jittieħdu miżuri nazzjonali bħala kwistjoni ta’ urġenza biex jipproteġu l-aktar konsumaturi vulnerabbli. F’dan il-kuntest, is-sett ta’ għodod propost jipprovdi qafas Ewropew utli għall-koordinazzjoni tal-miżuri nazzjonali.
Il-ministri ddiskutew ukoll għażliet possibbli fuq perijodu medju u fit-tul, inkluż ir-riforma tas-suq tal-elettriku bl-ingrossa, skemi volontarji ta’ xiri konġunt għall-gass u soluzzjonijiet fil-livell tal-UE għall-ħżin.
Xi stati membri enfasizzaw li l-politiki dwar il-klima u t-tranżizzjoni lejn enerġija nadifa huma parti mis-soluzzjoni u mhux il-kawża taż-żieda fil-prezzijiet tal-enerġija. Huma insistew li l-investiment fl-enerġiji rinnovabbli, fl-effiċjenza enerġetika u fl-integrazzjoni tas-sistemi tal-enerġija jibqa’ kruċjali biex tiżdied ir-reżiljenza tas-sistemi tal-enerġija tal-UE.
Il-ministri stennew b’interess li jirċievu aktar analiżijiet u valutazzjonijiet imsemmija mill-Kummissjoni, b’mod partikolari l-istudji dwar il-funzjonament tas-swieq tal-gass u tal-elettriku, u s-suq tal-EU ETS.
Rapport preliminari mill-Aġenzija tal-UE għall-Kooperazzjoni tar-Regolaturi tal-Enerġija (ACER) ser jitfa' dawl fuq is-sitwazzjoni fis-suq tal-elettriku. L-ewwel valutazzjoni preliminari mill-Awtorità Ewropea tat-Titoli u s-Swieq (ESMA) f’nofs Novembru ser tagħti lill-istati membri aktar ċarezza dwar l-integrità tas-suq Ewropew tal-karbonju.
L-analiżi tas-suq ser tipprovdi kontribut għal aktar deliberazzjonijiet u azzjoni possibbli ulterjuri.
Diversi ministri appellaw lill-Kummissjoni biex tiċċara r-rwol tal-gass naturali u l-enerġija nukleari fit-tassonomija tal-UE għal finanzjament sostenibbli.
Il-ministri għall-enerġija qablu li jevalwaw il-prezzijiet tal-enerġija u l-progress li sar fl-implimentazzjoni tal-miżuri li jinsabu fis-sett ta’ għodod tal-Kummissjoni f’Diċembru. Il-Kunsill tal-Enerġija ser iħejji l-bażi għal-laqgħa tal-Kunsill Ewropew ta’ Diċembru, fejn il-mexxejja tal-UE ser jerġgħu lura għall-kwistjoni tal-prezzijiet tal-enerġija.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-tranżizzjoni ekoloġika mhijiex parti mill-problema. It-tranżizzjoni ekoloġika hija parti mis-soluzzjoni. Irridu niksbu żewġ għanijiet importanti - in-newtralità klimatika u Ewropa indipendenti fl-enerġija. Għalhekk irridu ninvestu f’sorsi ta’ enerġija rinnovabbli u f’teknoloġiji ġodda.
