"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Telekomunikazzjoni), 3 ta' Diċembru 2021
Riżultati ewlenin
Regoli dwar iċ-ċibersigurtà fl-UE kollha
Il-Kunsill laħaq qbil fuq il-pożizzjoni tiegħu (approċċ ġenerali) dwar miżuri proposti għal livell għoli komuni ta' ċibersigurtà fl-UE kollha.
Il-proposta għandha l-għan li tkompli ttejjeb ir-reżiljenza u l-kapaċitajiet ta' rispons għall-inċidenti kemm tas-settur pubbliku kif ukoll dak privat u tal-UE kollha kemm hi. Ladarba tiġi adottata, id-direttiva l-ġdida, imsejħa "NIS2" ser tissostitwixxi r-regoli attwali dwar is-sigurtà tan-networks u tas-sistemi tal-informazzjoni (id-direttiva NIS).
Id-Direttiva NIS il-ġdida ser ikollha rwol kruċjali fit-tisħiħ taċ-ċibersigurtà fid-dinja dejjem aktar diġitalizzata tagħna, fejn it-theddid ċibernetiku jista' jkollu implikazzjonijiet bla preċedent fuq is-soċjetà, l-ekonomija u d-demokrazija. Din ser turi wkoll li l-Unjoni Ewropea tinsab fuq quddiem fil-leġiżlazzjoni dwar iċ-ċibersigurtà.
Boštjan Koritnik, Ministru għall-Amministrazzjoni Pubblika tas-Slovenja
Il-Kunsill ħa kont tal-progress dwar l-Att dwar l-Intelliġenza Artifiċjali propost. L-abbozz ta' regolament għandu l-għan li jippromwovi l-iżvilupp u l-użu fis-suq uniku kollu ta' intelliġenza artifiċjali (IA) sikura u legali li tirrispetta d-drittijiet fundamentali.
L-Att dwar l-Intelliġenza Artifiċjali kien wieħed mill-prijoritajiet tal-presidenza Slovena mill-bidu nett u ħdimna b'mod intensiv fuq din il-proposta rivoluzzjonarja u kumplessa. Immirajna li nagħmlu kemm jista' jkun progress, u ninsab kuntent li pproduċejna b'suċċess l-ewwel proposta ta' kompromess parzjali. Is-suġġett kopert mill-proposta tagħna, inkluż il-kamp ta' applikazzjoni, id-definizzjonijiet u r-rekwiżiti għal applikazzjonijiet tal-IA b'riskju għoli, huwa partikolarment importanti, peress li għandu impatt profond fuq it-test kollu. Fid-dawl tar-reazzjonijiet inizjali, nixtieq ngħid li qed nimxu fid-direzzjoni t-tajba, u issa ser ikun f'idejn il-presidenza li jmiss li tmexxi din il-biċċa xogħol kbira 'l quddiem.
Boštjan Koritnik, Ministru għall-Amministrazzjoni Pubblika tas-Slovenja
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kunsill kellu dibattitu ta' orjentazzjoni dwar id-drittijiet u l-prinċipji diġitali.
Id-dibattitu ser jiggwida lill-Kummisjsoni fl-abbozzar finali tal-proposta tagħha għal dikjarazzjoni interistituzzjonali dwar dan is-suġġett, kif imħabbar fil-komunikazzjoni tal-Kummissjoni "Il-Kumpass Diġitali tal-2030: l-approċċ Ewropew għad-Deċennju Diġitali". Il-prinċipji diġitali ser ikollhom l-għan li jinfurmaw aħjar lin-nies involuti fl-ambjent diġitali, filwaqt li fl-istess ħin jipprovdu referenza għal dawk li jfasslu l-politika u l-operaturi diġitali.
Id-diskussjoni tal-lum uriet li dikjarazzjoni Ewropea dwar id-drittijiet u l-prinċipji diġitali jista' jkollha valur ċar fl-istabbiliment ta' triq 'il quddiem għad-deċennju diġitali tal-UE. Dan għandu jkun ukoll l-ewwel pass fl-istabbiliment ta' punt ta' riferiment globali flimkien ma' dawk is-sħab li jħaddnu l-valuri demokratiċi tal-UE.
Mark Boris Andrijanič, Ministru responsabbli għat-Trasformazzjoni Diġitali tas-Slovenja
Matul id-diskussjoni, il-ministri esprimew l-appoġġ qawwi tagħhom għal dikjarazzjoni interistituzzjonali solenni dwar id-drittijiet u l-prinċipji diġitali, li tagħmilha ċara li l-istess drittijiet fundamentali huma ugwalment validi online daqs kemm huma offline.
Skont il-ministri, id-dikjarazzjoni għandha tirrifletti l-valuri ewlenin Ewropej inkluż it-trasformazzjoni diġitali ffukata fuq il-bniedem, inklużiva u sostenibbli, l-istat tad-dritt, u l-prinċipju li ħadd ma jitħalla jibqa' lura.
Il-prinċipji potenzjali li għandhom jiġu minquxa fid-dikjarazzjoni jistgħu jinkludu l-promozzjoni tal-aċċess għal konnettività affidabbli u affordabbli u ambjent online miftuħ, ġust, sikur u affidabbli. Ħafna ministri enfasizzaw l-importanza li jiżdiedu l-litteriżmu diġitali, is-sensibilizzazzjoni u l-għoti tas-setgħa, u l-ħtieġa li jiġu protetti t-tfal.
Diversi ministri indikaw li d-dikjarazzjoni għandha tieħu kont tad-dikjarazzjonijiet u l-ftehimiet internazzjonali eżistenti. Tista' sservi wkoll bħala referenza għal sħab internazzjonali li jaħsbuha bl-istess mod.
Il-Kummissjoni wiegħdet li tiffinalizza l-proposta għad-dikjarazzjoni u tippreżentaha malajr kemm jista' jkun taħt il-presidenza li jmiss.
Il-Kunsill ħa nota tal-progress dwar ir-regolament propost dwar Identità Diġitali Ewropea (eID Ewropea).
Il-proposta għandha l-għan li tistabbilixxi qafas uniku, interoperabbli u sikur għal Identità Diġitali Ewropea li tkun disponibbli għaċ-ċittadini, ir-residenti u n-negozji kollha tal-UE fl-UE. Il-Portafolli ta' Identità Diġitali Ewropej il-ġodda jippermettu lill-Ewropej kollha jaċċessaw servizzi online mingħajr ma jkollhom għalfejn jużaw metodi ta' identifikazzjoni privati jew mingħajr ma jkollhom għalfejn jikkondividu data personali bla bżonn.
Il-ministri vvalutaw il-progress dwar deċiżjoni proposta li tistabbilixxi l-programm ta' politika tal-2030 "Perkors għad-Deċennju Diġitali".
Il-proposta għandha l-għan li tagħmel id-diġitalizzazzjoni l-mutur tat-tkabbir ekonomiku u l-benesseri soċjali fl-Ewropa billi ssaħħaħ it-tmexxija diġitali tal-UE u tagħti s-setgħa liċ-ċittadini u lin-negozji. Hija tistabbilixxi miri diġitali speċifiċi li l-UE kollha kemm hi mistennija tilħaq sa tmiem id-deċennju, kif spjegati għall-ewwel darba fil-Komunikazzjoni dwar il-Kumpass Diġitali.
Il-presidenza infurmat lill-ministri dwar is-sitwazzjoni attwali tad-diskussjonijiet dwar l-atti leġiżlattivi attwali.
Att dwar il-Governanza tad-Data
Il-presidenza laħqet qbil politiku mal-Parlament Ewropew dwar l-Att dwar il-Governanza tad-Data propost fit-30 ta' Novembru 2021. Il-presidenza għandha l-għan li tippreżenta t-test maqbul għall-approvazzjoni mir-rappreżentanti tal-istati membri fil-15 ta' Diċembru.
Ir-regolament rivedut dwar ir-roaming għandu l-għan li jiżgura li r-roaming mobbli mingħajr ħlas addizzjonali jista' jkompli wara li r-regoli attwali dwar ir-roaming jiskadu fit-30 ta' Ġunju 2022. Il-presidenza tittama li tilħaq qbil mal-Parlament Ewropew fil-laqgħa tat-“trilogu” li jmiss li hija skedata għat-8 ta' Diċembru 2021.
Regoli aġġornati dwar il-privatezza għall-komunikazzjoni elettronika (Privatezza Elettronika)
Il-presidenza Slovena kellha t-tieni trilogu mal-Parlament Ewropew dwar il-proposta dwar il-Privatezza Elettronika fit-18 ta' Novembru 2021. Dan wassal għal progress dwar id-dritt tal-utenti finali li jikkontrollaw il-komunikazzjoni elettronika, dwar l-infurzar u r-rimedji, u dwar atti delegati u ta' implimentazzjoni. Il-presidenza ser tkompli l-ħidma mal-Parlament Ewropew fil-livell tekniku sakemm tgħaddi l-fajl lill-presidenza li jmiss.
Barra minn hekk, taħt affarijiet oħra, id-delegazzjoni tal-Lussemburgu infurmat lill-ministri dwar l-eżiti tal-laqgħa ministerjaliD9+ (pajjiżi tal-UE avvanzati diġitalment), li saret fil-Lussemburgu fis-27 ta' Ottubru 2021 u li ffukat fuq it-tranżizzjonijiet diġitali u ekoloġiċi.
Id-delegazzjoni Litwana pprovdiet informazzjoni dwar dokument informali konġunt fuq il-prijoritajiet diġitali tal-UE fil-kuntest tal-elezzjonijiet tal-Unjoni Internazzjonali tat-Telekomunikazzjoni (UIT) fl-2022.
Taħt l-aħħar punt, il-presidenza Franċiża li jmiss ippreżentat il-programm ta' ħidma tagħha għall-ewwel nofs tal-2022.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-Direttiva NIS il-ġdida ser ikollha rwol kruċjali fit-tisħiħ taċ-ċibersigurtà fid-dinja dejjem aktar diġitalizzata tagħna, fejn it-theddid ċibernetiku jista' jkollu implikazzjonijiet bla preċedent fuq is-soċjetà, l-ekonomija u d-demokrazija. Din ser turi wkoll li l-Unjoni Ewropea tinsab fuq quddiem fil-leġiżlazzjoni dwar iċ-ċibersigurtà.
Id-diskussjoni tal-lum uriet li dikjarazzjoni Ewropea dwar id-drittijiet u l-prinċipji diġitali jista' jkollha valur ċar fl-istabbiliment ta' triq 'il quddiem għad-deċennju diġitali tal-UE. Dan għandu jkun ukoll l-ewwel pass fl-istabbiliment ta' punt ta' riferiment globali flimkien ma' dawk is-sħab li jħaddnu l-valuri demokratiċi tal-UE.