"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Enerġija), 11 ta' Ġunju 2021
Riżultati ewlenin
Il-ministri tal-UE għall-enerġija ltaqgħu fil-Lussemburgu biex jiddiskutu r-regolament TEN-E, l-istrateġija għall-idroġenu u l-istrateġija mewġa ta' rinnovazzjoni.
Regolament TEN-E
Il-ministri qablu dwar approċċ ġenerali għar-reviżjoni proposta tar-regolament dwar in-Networks Trans-Ewropej tal-enerġija (TEN-E). L-approċċ ġenerali għandu l-għan li jimmodernizza, jiddekarbonizza u jinterkonnettja l-infrastruttura tal-enerġija transkonfinali tal-UE biex jgħin lill-UE tilħaq l-objettiv tagħha tan-newtralità klimatika għall-2050. Fl-istess ħin, għandu l-għan li jkompli jiżgura l-integrazzjoni tas-suq, il-kompetittività u s-sigurtà tal-provvista.
Biex inkunu newtrali għall-klima sal-2050, neħtieġu infrastrutturi tal-enerġija moderni u interkonnessi li huma adattati għal teknoloġiji tal-enerġija nadifa. Għandna bżonn naraw aktar grilji intelliġenti u aktar enerġija rinnovabbli fil-grilji tagħna. Il-ftehim li ntlaħaq illum jinvesti f'futur ekoloġiku u newtrali għall-klima li jiggarantixxi l-effiċjenza, il-kompetittività u s-sigurtà tal-provvista, filwaqt li ħadd ma jitħalla jibqa' lura.
João Pedro Matos Fernandes, Ministru għall-Ambjent u l-Azzjoni dwar il-Klima tal-Portugall
L-approċċ ġenerali ser iservi bħala l-bażi għall-pożizzjoni tal-Kunsill fin-negozjati tat-trilogu politiku mal-Parlament Ewropew.
Il-ministri approvaw konklużjonijiet tal-Kunsill dwar mewġa ta' rinnovazzjoni li ssewwi l-ekonomija issa, u toħloq bini ekoloġiku għall-futur.
Is-settur tal-bini huwa wieħed mill-akbar konsumaturi tal-enerġija fl-Ewropa u huwa responsabbli għal aktar minn terz tal-emissjonijiet ta' gassijiet serra tal-UE. L-istrateġija mewġa ta' rinnovazzjoni għandha l-għan li tintensifika l-isforzi ta' rinnovazzjoni madwar l-UE, sabiex tagħti l-kontribut meħtieġ mis-settur tal-bini għall-objettiv tan-newtralità klimatika fl-UE sal-2050 u biex twassal għal tranżizzjoni ekoloġika ġusta u ekwa. Il-konklużjonijiet tal-Kunsill jenfasizzaw l-aspetti tal-inklużjoni soċjali, l-irkupru ekonomiku u t-tranżizzjoni ekoloġika.
L-istrateġija tippromwovi rinnovazzjonijiet li jnaqqsu l-użu tal-enerġija, irażżnu l-emissjonijiet tal-gassijiet serra u jżidu l-iffrankar tal-ispejjeż.
Il-konklużjonijiet tal-Kunsill japprovaw l-għan tal-istrateġija li mill-inqas tirdoppja r-rati ta' rinnovazzjoni relatati mal-enerġija fl-UE sal-2030, filwaqt li tindirizza l-faqar enerġetiku, toħloq impjiegi ġodda u tippromwovi l-ekonomija ċirkolari.
Il-ministru kellhom skambju ta' fehmiet dwar l-evoluzzjoni tal-Istrateġija għall-Idroġenu fl-Ewropa. L-istrateġija għandha l-għan li toħloq ambjent li jippermetti li jiżdiedu l-provvista u d-domanda għall-idroġenu bħala element ewlieni fit-tranżizzjoni lejn enerġija nadifa.
Il-ministri ddiskutew kif l-istati membri jistgħu jikkooperaw biex joħolqu kondizzjonijiet xierqa biex irawmu s-suq għall-idroġenu u jħaffu r-regolamentazzjoni dwar it-teknoloġiji tal-użu finali biex tiżdied l-adozzjoni tal-idroġenu, b'mod partikolari fis-setturi li diffiċli jiġu dekarbonizzati. Il-ministri ddiskutew ukoll il-prijoritajiet ta' finanzjament għall-idroġenu u kif l-appoġġ għall-esportazzjonijiet jista' jissaħħaħ.
Il-Kummissjoni ppreżentat "Strateġija għall-Idroġenu għal Ewropa Newtrali għall-Klima" f'Lulju 2020. F'Diċembru 2020, il-Kunsill approva konklużjonijiet li jirrikonoxxu r-rwol importanti li l-idroġenu, speċjalment minn sorsi rinnovabbli, għandu biex jintlaħqu l-objettivi ta' dekarbonizzazzjoni tal-UE, u appella lill-Kummissjoni biex tkompli telabora u tħaddem l-istrateġija.
Mewġa ta' rinnovazzjoni: noħolqu bini ekoloġiku għall-ġejjieni (Infografika)
Kwistjonijiet oħrajn
Il-Kummissjoni infurmat lill-ministri dwar l-iżviluppi reċenti fil-qasam tar-relazzjonijiet esterni fil-qasam tal-enerġija, inkluż id-diplomazija dwar l-enerġija, l-inizjattiva "żero netti" tal-Aġenzija Internazzjonali tal-Enerġija, IRENA, it-Trattat dwar il-Karta tal-Enerġija u l-Kunsill tal-Enerġija UE-Stati Uniti li jmiss.
Id-delegazzjoni Litwana ġibdet l-attenzjoni tal-ministri lejn azzjoni urġenti fir-rigward tar-rakkomandazzjonijiet ta' sikurezza fl-impjant tal-enerġija nukleari ta' Ostrovets fil-Belarussja. Id-delegazzjoni Ċeka stiednet lill-ministri biex jirriflettu dwar it-tassonomija tal-UE għal attivitajiet ekonomiċi sostenibbli u passi ulterjuri possibbli f'dan ir-rigward.
Fl-aħħar nett, id-delegazzjoni Slovena qasmet mal-ministri l-programm ta' ħidma għall-presidenza tagħha li jmiss.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Biex inkunu newtrali għall-klima sal-2050, neħtieġu infrastrutturi tal-enerġija moderni u interkonnessi li huma adattati għal teknoloġiji tal-enerġija nadifa. Għandna bżonn naraw aktar grilji intelliġenti u aktar enerġija rinnovabbli fil-grilji tagħna. Il-ftehim li ntlaħaq illum jinvesti f'futur ekoloġiku u newtrali għall-klima li jiggarantixxi l-effiċjenza, il-kompetittività u s-sigurtà tal-provvista, filwaqt li ħadd ma jitħalla jibqa' lura.
