"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Enerġija), 2 ta' Diċembru 2021
Riżultati ewlenin
Illum, il-ministri għall-enerġija tal-UE ltaqgħu biex ikollhom skambju ta' fehmiet dwar iż-żieda fil-prezzijiet tal-enerġija u jevalwaw il-progress li ntlaħaq bil-proposti tal-pakkett "Lesti għall-mira ta' 55%".
Il-proposti tal-pakkett "Lesti għall-mira ta' 55%" kienu prijorità ewlenija għall-presidenza Slovena, li għamlet l-almu tagħha biex isir kemm jista' jkun progress filwaqt li tiġi żgurata l-koerenza tal-pakkett. Iż-żieda fil-prezzijiet tal-enerġija qed turi l-importanza ta' Ewropa newtrali għall-klima u indipendenti mill-enerġija. Il-prijorità tagħna hija li nimxu 'l quddiem bit-tranżizzjoni tal-enerġija ekoloġika lejn aktar enerġiji rinnovabbli li jiċċirkolaw fil-grilji u sistemi tal-enerġija interkonnessi bis-sħiħ.
Jernej Vrtovec, Ministru għall-Infrastruttura tas-Slovenja
Prezzijiet tal-enerġija
Wara tnaqqis fil-prezzijiet tal-enerġija globali u tal-UE lejn l-aħħar tal-2019 u l-2020, kien hemm żieda qawwija mis-sajf tal-2021 'l hawn.
Il-ministri għall-enerġija tal-UE kellhom skambju ta' fehmiet dwar l-impatt ta' prezzijiet għoljin tal-enerġija u miżuri possibbli ta' mitigazzjoni fil-livell nazzjonali u tal-UE.
Il-ministri qasmu l-esperjenza tagħhom dwar l-azzjonijiet meħuda fix-xhur reċenti u l-esperjenza tagħhom bl-implimentazzjoni tal-miżuri proposti fis-sett ta' għodod tal-Kummissjoni. Id-diskussjonijiet iffukaw fuq l-impatt tal-miżuri biex il-prezzijiet tal-enerġija jinżammu taħt kontroll u jiġu protetti l-konsumaturi.
L-Aġenzija tal-Unjoni Ewropea għall-Kooperazzjoni tar-Regolaturi tal-Enerġija (ACER) ippreżentat lill-ministri r-rapport preliminari tagħha dwar il-prezzijiet għoljin tal-enerġija fl-Ewropa u d-disinn attwali tas-suq tal-elettriku bl-ingrossa, ippubblikat fil-15 ta' Novembru. Rapport finali huwa mistenni f'April 2022.
L-istati membri laqgħu l-analiżi preliminari bħala l-bażi għal diskussjoni ta' politika bbażata fuq l-evidenza. Il-ministri esprimew xi fehmiet preliminari dwar ir-rapport u l-oqsma proposti fejn tista' tiżdied analiżi aktar fil-fond bil-ħsieb tal-valutazzjoni finali sa April 2022.
Il-ministri kellhom dibattitu ta' orjentazzjoni dwar il-pakkett "Lesti għall-mira ta' 55%", b'mod partikolari dwar iż-żewġ fajls li jikkonċernaw l-enerġija: id-direttivi dwar l-enerġija rinnovabbli u l-effiċjenza fl-enerġija.
Il-ministri laqgħu l-progress miksub dwar il-fajls u evalwaw il-kwistjonijiet pendenti ewlenin dwar il-pakkett kollu kemm hu u dwar iż-żewġ fajls relatati mal-enerġija b'mod partikolari.
Sabiex tiġi stabbilita direzzjoni għal aktar ħidma, il-ministri ddiskutew il-bilanċ bejn il-ħtieġa li jiġi appoġġat il-potenzjal tas-sorsi rinnovabbli bħala sors kosteffiċjenti tal-enerġija u li jiġu rikonoxxuti ċ-ċirkostanzi nazzjonali u l-punti ta' tluq differenti.
Il-ministri ddiskutew iż-żieda fl-isforzi tal-effiċjenza fl-enerġija meħtieġa mill-istati membri u l-kontribut tagħhom lejn mira ta' effiċjenza fl-enerġija fl-UE kollha. Il-ministri ddiskutew ukoll il-ħtieġa possibbli għal flessibbiltajiet li jirriflettu ċ-ċirkostanzi nazzjonali u kif dawn il-flessibbiltajiet jistgħu jintużaw għall-bini tas-settur pubbliku.
Lesti għall-mira ta' 55%: kif l-UE ser issarraf il-miri klimatiċi f'liġi (Infografika)
Kummerċ
Il-ministri llum approvaw ukoll, bħala punt mingħajr diskussjoni, Inizjattiva ta' Dikjarazzjoni Konġunta tad-WTO dwar ir-Regolamentazzjoni Domestika tas-Servizzi.
Dan huwa l-ewwel riżultat tad-WTO fil-qasam tal-kummerċ fis-servizzi għal aktar minn 20 sena. Filwaqt li din hija inizjattiva plurilaterali, l-impenji l-ġodda ser ikunu ta' benefiċċju għall-Membri l-oħra kollha tad-WTO permezz tal-prinċipju tal-Aktar Nazzjon Favorit.
Prattiki regolatorji tajbin huma kruċjali għall-funzjonament tajjeb tal-ekonomija tal-lum. L-UE hija konvinta li regoli ċari dwar it-trasparenza u l-awtorizzazzjoni ser jiffaċilitaw il-kummerċ fis-servizzi b'mod sinifikanti, speċjalment għall-intrapriżi mikro, żgħar u ta' daqs medju li m'għandhomx l-istess riżorsi u esperjenza biex ilaħħqu ma' proċessi kumplessi bħal atturi akbar.
L-implimentazzjoni tal-impenji l-ġodda ser tnaqqas l-ispejjeż tal-kummerċ għall-fornituri tas-servizzi. Skont studju reċenti tal-OECD u tad-WTO, l-ammont ta' spejjeż li jistgħu jiġu ffrankati huwa stmat għal USD 150 biljun fis-sena.
Agrikoltura
Il-ministri adottaw formalment il-politika agrikola komuni l-ġdida, li ser tidħol fis-seħħ mill-2023 sal-2027. Il-leġiżlazzjoni twitti t-triq għal PAK aktar ġusta, aktar ekoloġika u aktar ibbażata fuq il-prestazzjoni li tfittex li tiżgura futur sostenibbli għall-bdiewa Ewropej, tipprovdi appoġġ aktar immirat għal azjendi agrikoli iżgħar, u tippermetti flessibbiltà akbar għall-istati membri fl-adattament tal-miżuri għall-kondizzjonijiet lokali.
Taħt affarijiet oħra, il-Kummissjoni infurmat lill-ministri dwar l-iżviluppi fil-qasam tar-relazzjonijiet esterni fil-qasam tal-enerġija u ppreżentat rapport dwar l-istat tal-Unjoni tal-Enerġija. Il-presidenza infurmat lill-ministri dwar il-progress li sar mal-Parlament Ewropew fin-negozjati dwar ir-reviżjoni tar-regolament dwar in-networks trans-Ewropej għall-enerġija (TEN-E). Id-Danimarka qasmet informazzjoni dwar il-koeżistenza bejn l-enerġija rinnovabbli u l-bijodiversità. Il-Litwanja qasmet informazzjoni dwar l-importanza li tiġi żgurata s-sikurezza nukleari fl-impjant tal-enerġija nukleari Ostrovets tal-Belarussja f'konformità mal-livelli ta' sikurezza rikonoxxuti tal-UE. Il-Belġju qasam informazzjoni dwar l-impatt tar-regola eżistenti ta' 70 fil-mija applikabbli għall-interkonnessjonijiet fuq proġetti ibridi offshore. Franza ppreżentat il-programm ta' ħidma għall-Presidenza tagħha li jmiss.
Il-Kunsill adotta wkoll mingħajr diskussjoni il-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-proposti tal-pakkett "Lesti għall-mira ta' 55%" kienu prijorità ewlenija għall-presidenza Slovena, li għamlet l-almu tagħha biex isir kemm jista' jkun progress filwaqt li tiġi żgurata l-koerenza tal-pakkett. Iż-żieda fil-prezzijiet tal-enerġija qed turi l-importanza ta' Ewropa newtrali għall-klima u indipendenti mill-enerġija. Il-prijorità tagħna hija li nimxu 'l quddiem bit-tranżizzjoni tal-enerġija ekoloġika lejn aktar enerġiji rinnovabbli li jiċċirkolaw fil-grilji u sistemi tal-enerġija interkonnessi bis-sħiħ.
