Sostenibbiltà korporattiva

Diliġenza dovuta

Ir-regoli tal-UE dwar id-diliġenza dovuta tas-sostenibbiltà korporattiva jirrikjedu lill-kumpaniji l-kbar tal-UE u ta' pajjiżi terzi attivi fl-UE jieħdu miżuri biex jipprevjenu, jidentifikaw u jtaffu kwalunkwe impatt negattiv fuq id-drittijiet tal-bniedem jew l-ambjent, ikkawżat minn:

• l-operazzjonijiet tagħhom stess
• l-operazzjonijiet tas-sussidjarji tagħhom
• l-operazzjonijiet imwettqa mis-sħab kummerċjali tagħhom

Il-penali u r-responsabbiltà ċivili ser japplikaw għal kwalunkwe ksur ta' dawn l-obbligi.

Objettivi

Dawn ir-regoli l-ġodda jfissru:

• produzzjoni aktar sostenibbli ta' oġġetti u servizzi
• kundizzjonijiet aħjar għall-ħaddiema
• investiment aktar sostenibbli
• trasparenza akbar dwar kif isiru l-prodotti

Produzzjoni sostenibbli

Investiment sostenibbli

Kundizzjonijiet tax-xogħol aħjar

Trasparenza

Rappurtar

Skont ir-regoli tal-UE dwar ir-rapportar korporattiv dwar is-sostenibbiltà, il-kumpaniji l-kbar koperti minn dawk ir-regoli jeħtieġ li jirrapportaw dwar erba' oqsma.

Kwistjonijiet ambjentali

Miżuri kontra l-korruzzjoni

Drittijiet tal-bniedem

Kwistjonijiet marbuta mad-diversità

Il-kumpaniji huma meħtieġa jippubblikaw informazzjoni dettaljata dwar kif in-negozju tagħhom jaffettwa s-soċjetà u l-ekonomija u viċi versa ("materjalità doppja").

Ir-regoli l-ġodda, li daħlu fis-seħħ fil-5 ta' Jannar 2024, għandhom l-għan li:

• jgħammru lill-investituri biex jieħdu deċiżjonijiet li jkunu ta' benefiċċju kemm għan-nies kif ukoll għall-ambjent
• iżidu l-obbligu ta' rendikont tal-kumpaniji
• jiffaċilitaw it-tranżizzjoni lejn ekonomija sostenibbli

Standards Ewropej tar-rappurtar dwar is-sostenibbiltà

Il-kumpaniji ser ikunu meħtieġa jirrappurtaw f'konformità mal-istandards Ewropej tar-rappurtar dwar is-sostenibbiltà (ESRS).

Dawk l-istandards komuni jiżguraw li l-kumpaniji madwar l-UE jirrappurtaw informazzjoni komparabbli u jgħinuhom jikkomunikaw il-prestazzjoni tagħhom mil-lat ta' sostenibbiltà b'mod aktar effiċjenti.

Tnaqqis tal-piż regolatorju

Fi Frar 2025, sabiex tilħaq l-objettiv tagħha ta' tnaqqis ta' mill-inqas 25% fil-piżijiet amministrattivi u ta' mill-inqas 35% għall-SMEs, il-Kummissjoni Ewropea pproponiet emendi għad-direttivi dwar id-diliġenza dovuta tas-sostenibbiltà korporattiva u dwar is-sostenibbiltà korporattiva fl-ewwel pakkett "omnibus" tagħha.

Fl-24 ta' Frar 2026, il-Kunsill ta l-approvazzjoni finali tiegħu biex jiġu ssimplifikati r-rekwiżiti ta' rapportar u ta' diliġenza dovuta dwar is-sostenibbiltà, bil-ħsieb li tingħata spinta lill-kompetittività tal-UE.

• Il-Kunsill japprova s-simplifikazzjoni tar-rekwiżiti ta' rapportar dwar is-sostenibbiltà u ta' diliġenza dovuta biex tingħata spinta lill-kompetittività tal-UE (stqarrija għall-istampa, 24 ta' Frar 2026)

Rappurtar aktar faċli

Il-kamp ta' applikazzjoni tad-direttiva dwar ir-rapportar korporattiv dwar is-sostenibbiltà huwa ristrett biex ikopri biss kumpaniji b'aktar minn 1 000 impjegat u fatturat nett ta' aktar minn €450 miljun.

Fir-rigward ta' impriżi ta' pajjiżi terzi, ir-rekwiżiti aġġornati ser japplikaw biss għal kumpaniji b'fatturat nett ta' aktar minn €450 miljun għall-impriża omm fl-UE u ta' aktar minn €200 miljun fatturat iġġenerat għas-sussidjarja jew għall-fergħa.

Il-miżuri ta' simplifikazzjoni li saru fid-direttiva:

• inaqqsu l-għadd ta' impriżi soġġetti għal rekwiżiti ta' rapportar dwar is-sostenibbiltà u jippermettu lill-kumpaniji li jaqgħu barra mill-kamp ta' applikazzjoni l-ġdid li jissottomettu rapporti volontarji
• jirrevedu u jissimplifikaw l-ESRS
• jillimitaw l-ammont ta' informazzjoni li tista' tintalab minn sħab kummerċjali iżgħar fil-katina tal-valur tal-kumpanija li tirrapporta
• jipposponu r-rekwiżiti ta' rapportar għall-kumpaniji l-kbar
• jipprevedu eżenzjoni ta' tranżizzjoni għall-kumpaniji li kellhom jibdew jirrapportaw mis-sena finanzjarja 2024 (l-hekk imsejħa kumpaniji "tal-ewwel mewġa"), li teżentahom għall-2025 u l-2026.
• jinkludu eżenzjoni għal ċerti kumpaniji azzjonarji finanzjarji tal-UE u mhux tal-UE mir-rapportar konsolidat