Evitar tat‑taxxa korporattiva: il-Kunsill jilħaq qbil dwar il-pożizzjoni tiegħu dwar id-diskrepanzi ibridi

Fil-21 ta' Frar 2017, il-Kunsill qabel dwar il-pożizzjoni tiegħu dwar regoli maħsuba biex jeliminaw id-'diskrepanzi ibridi' mas-sistemi tat-taxxa ta' pajjiżi terzi.

L-abbozz ta' direttiva huwa l-aktar reċenti minn għadd ta' miżuri mfassla biex jipprevjenu l-evitar tat-taxxa minn kumpaniji kbar.

Din tfittex li tipprevjenihom milli jisfruttaw id-differenzi bejn żewġ ġurisdizzjonijiet tat-taxxa jew aktar sabiex tnaqqas l-obbligazzjoni ta' taxxa inġenerali tagħhom. Dawn l-arranġamenti jistgħu jwasslu għal erożjoni sostanzjali tal-bażijiet taxxabbli ta' kontribwenti tat-taxxa korporattiva fl-UE.

Id-direttiva ser tikkontribwixxi għall-implimentazzjoni tar-rakkomandazzjonijiet tal-OECD tal-2015 li jindirizzaw l-erożjoni tal-bażi tat-taxxa u t-trasferiment tal-profitt korporattiv.

"L-UE tinsab fuq quddiem tal-ġlieda kontra l-evitar tat-taxxa. Irridu niżguraw l-implimentazzjoni koerenti fil-liġi tal-UE tal-pjan ta' azzjoni dwar il-BEPS tal-OECD."

Edward Scicluna, Ministru għall-Finanzi ta' Malta, u President tal-Kunsill.

Il-proposta tindirizza diskrepanzi ibridi fir-rigward ta' pajjiżi mhux tal-UE, minħabba li d-differenzi ġewwa l-UE huma diġà koperti mid-'direttiva kontra l-evitar tat-taxxa' adottata f'Lulju 2016. Din tikkomplementa u temenda dik id-direttiva f'dan is-sens.

Il-Kunsill laħaq kompromess dwar il-kwistjonijiet li ġejjin:

• għal kapital regolatorju ibridu, ġiet stabbilita konċessjoni mir-regoli għas-settur bankarju. Il-konċessjoni ser tkun limitata fiż-żmien, u l-Kummissjoni ser tintalab tippreżenta rapport li jivvaluta l-konsegwenzi;
• għal operaturi tas-suq finanzjarju, jiġi segwit approċċ delimitat f'konformità ma' dak segwit mill-OECD;
• fir-rigward tal-implimentazzjoni, hija prevista skeda itwal ta' żmien minn dik stabbilita għad-direttiva ta' Lulju 2016. L-implimentazzjoni hija stabbilita għall-1 ta' Jannar 2020 (sena wara), u l-1 ta' Jannar 2022 fir-rigward ta' dispożizzjoni speċifika.

Il-passi li jmiss

Id-direttiva hija waħda fost pakkett ta' proposti dwar it-tassazzjoni korporattiva ppreżentat mill-Kummissjoni f'Ottubru 2016.

Intlaħaq qbil f'laqgħa tal-Kunsill Affarijiet Ekonomiċi u Finanzjarji. Il-Kunsill ser jadotta d-direttiva ladarba l-Parlament Ewropew ikun ta l-opinjoni tiegħu.

L-istati membri ser ikollhom sal-31 ta' Diċembru 2019 biex jittrasponu d-direttiva fil-liġijiet u r-regolamenti nazzjonali.

Id-direttiva teħtieġ unanimità fil-Kunsill, wara konsultazzjoni mal-Parlament. (Bażi legali: l-artikolu 115 tat-Trattat dwar il-Funzjonament tal-Unjoni Ewropea).

• Abbozz ta' direttiva ta' Frar 2017 dwar diskrepanzi ibridi ma' pajjiżi terzi