Patt ta' stabbiltà u tkabbir: il-Kunsill iniedi proċeduri ta' defiċit eċċessiv kontra seba' stati membri

Illum il-Kunsill adotta deċiżjonijiet li jistabbilixxu l-eżistenza ta' defiċits eċċessivi għall-Belġju, Franza, l-Italja, Malta, il-Polonja, is-Slovakkja u l-Ungerija. Barra minn hekk, il-Kunsill stabbilixxa li r-Rumanija, li ilha taħt il-proċedura ta' defiċit eċċessiv mill-2020, ma ħaditx azzjoni effettiva biex tikkoreġi d-defiċit tagħha u għalhekk il-proċedura għandha tibqa' miftuħa.

Il-proċedura ta' defiċit eċċessiv ibbażata fuq id-defiċit għandha l-għan li tiżgura li l-istati membri kollha jirritornaw lejn jew iżommu d-dixxiplina fil-baġits tal-gvernijiet tagħhom, u jevitaw li jkollhom defiċits eċċessivi. Fl-aħħar mill-aħħar, l-għan huwa li jinżamm dejn baxx tal-gvern jew li d-dejn għoli jitnaqqas għal livelli sostenibbli.

L-istati membri jridu jikkonformaw mad-dixxiplina baġitarja abbażi tal-kriterji u l-valuri ta' referenza stabbiliti fit-Trattati tal-UE: id-defiċit tagħhom ma għandux jaqbeż it-3% tal-prodott domestiku gross (PDG) tagħhom u d-dejn tagħhom ma għandux jaqbeż is-60% tal-PDG tagħhom. L-istati membri kollha għandhom jirrispettaw dawn il-valuri ta' referenza tat-Trattat.

Jekk ikun hemm defiċit eċċessiv fi stat membru, l-għan tal-proċedura ta' defiċit eċċessiv huwa li tħeġġeġ il-korrezzjoni tiegħu billi tpoġġi lill-istati membri taħt skrutinju msaħħaħ u tipprovdilhom rakkomandazzjonijiet biex jieħdu azzjoni effettiva biex jikkoreġu d-defiċit.

Passi li jmiss

Lejn l-aħħar tas-sena, il-Kunsill ser jiġi mistieden jadotta, fuq rakkomandazzjoni mill-Kummissjoni, rakkomandazzjonijiet indirizzati lill-istati membri biex jieħdu azzjoni effettiva biex jikkoreġu d-defiċit tagħhom f'perjodu ta' żmien partikolari. Ir-rakkomandazzjonijiet jista' jkun fihom perkors baġitarju korrettiv, espress f'termini numeriċi, u skadenza.

Il-Kummissjoni mistennija tippreżenta rakkomandazzjonijiet għar-rakkomandazzjonijiet tal-Kunsill madwar Novembru, fl-istess ħin li biħsiebha tippreżenta l-pakkett tal-Ħarifa tas-Semestru Ewropew.

Din is-sena, eċċezzjonalment, iż-żmien tar-rakkomandazzjonijiet lill-istati membri fi proċedura ta' defiċit eċċessiv biex jieħdu azzjoni effettiva ser jiġi allinjat mad-dispożizzjonijiet tal-qafas ta' governanza ekonomika riformat tal-UE. Skont ir-regoli l-ġodda, fis-seħħ mit-30 ta' April, l-istati membri ser iħejju pjanijiet strutturali fiskali fuq terminu medju fil-ħarifa, li jistabbilixxu l-perkorsi tan-nefqa tagħhom u r-riformi u l-investimenti prijoritarji tagħhom għall-4 sa 7 snin li ġejjin.

L-objettiv huwa li r-rakkomandazzjonijiet tal-Kunsill skont il-proċeduri ta' defiċit eċċessiv jiġu allinjati ma' dawk taħt il-pjanijiet fiskali strutturali ta' terminu medju.

Kuntest

Abbażi tad-data rrappurtata u kkonfermata għas-sena 2023, l-istati membri kollha li issa huma soġġetti għal proċedura ta' defiċit eċċessiv kellhom, fl-2023, defiċit tal-amministrazzjoni pubblika li qabeż il-valur referenzjarju tat-Trattat:

• Italja (-7.4%)
• Ungerija (-6.7%)
• Rumanija (-6.6%)
• Franza (-5.5%)
• Polonja (-5.1%)
• Malta (-4.9%)
• Slovakkja (-4.9%)
• Il-Belġju (-4.4%)

Wara waqfa ta' erba' snin minħabba l-attivazzjoni tal-klawżola liberatorja ġenerali bejn l-2020 u l-2023 wara l-pandemija tal-COVID-19, fid-19 ta' Ġunju l-Kummissjoni ħejjiet rapport skont l-Artikolu 126(3) tat-Trattat dwar il-Funzjonament tal-UE (TFUE). Ir-rapport identifika 12-il stat membru li kellhom defiċit tal-gvern li jaqbeż il-valur referenzjarju tat-Trattat ta' 3% jew li kienu f'riskju li jaqbżu l-valur referenzjarju tat-Trattat, fl-2023.

Ir-rapport ippropona l-ftuħ ta' proċedura ta' defiċit eċċessiv ibbażata fuq id-defiċit għal seba' stati membri. Il-Kumitat Ekonomiku u Finanzjarju ta l-opinjoni tiegħu fil-ġimagħtejn ta' wara.

Fit-8 ta' Lulju 2024, il-Kummissjoni pproponiet lill-Kunsill deċiżjonijiet li jistabbilixxu l-eżistenza ta' defiċits eċċessivi għal seba' stati membri u deċiżjoni li tiddikjara li r-Rumanija, li ilha taħt il-proċedura ta' defiċit eċċessiv mill-2019, ma ħaditx azzjoni effettiva biex tikkoreġi s-sitwazzjoni.

Il-Kunsill, fil-laqgħa tiegħu tas-16 ta' Lulju 2024, kellu skambju ta' fehmiet dwar il-proposti. Fl-24 ta' Lulju, il-Kumitat tar-Rappreżentanti Permanenti ddeċieda li jniedi proċedura bil-miktub għall-adozzjoni formali tad-deċiżjonijiet, li tlestiet b'suċċess. L-adozzjoni tal-lum tfisser li l-proċeduri ta' defiċit eċċessiv issa tnedew formalment.

• Deċiżjoni tal-Kunsill dwar l-eżistenza ta' defiċit eċċessiv fil-Belġju
• Deċiżjoni tal-Kunsill dwar l-eżistenza ta' defiċit eċċessiv fi Franza
• Deċiżjoni tal-Kunsill dwar l-eżistenza ta' defiċit eċċessiv fl-Ungerija
• Deċiżjoni tal-Kunsill dwar l-eżistenza ta' defiċit eċċessiv fl-Italja

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Deċiżjoni tal-Kunsill dwar l-eżistenza ta' defiċit eċċessiv f'Malta
• Deċiżjoni tal-Kunsill dwar l-eżistenza ta' defiċit eċċessiv fil-Polonja
• Deċiżjoni tal-Kunsill dwar l-eżistenza ta' defiċit eċċessiv fis-Slovakkja
• Deċiżjoni tal-Kunsill li tistabbilixxi li ebda azzjoni effettiva ma ttieħdet mir-Rumanija b'reazzjoni għar-Rakkomandazzjoni tal-Kunsill tat-18 ta' Ġunju 2021

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Eżitu tal-proċedura bil-miktub

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Proċedura ta' defiċit eċċessiv (informazzjoni ġenerali)
• Spjegazzjoni tas-Semestru Ewropew (informazzjoni ġenerali)
• Qafas ta' governanza ekonomika (informazzjoni ġenerali)