Comhairle na nGnóthaí Eacnamaíocha agus Airgeadais, 08/11/2016, 8 Samhain 2016

Na príomhthorthaí

Liosta an Aontais de na dlínsí nach bhfuil ag comhoibriú

Tháinig an Chomhairle ar chomhaontú maidir leis na critéir agus an próiseas chun liosta de chuid an Aontais de na dlínsí nach bhfuil ag comhoibriú maidir le cúrsaí cánach a bhunú.

Táthar leis an scagadh ar na dlínsí nach bhfuil ag comhoibriú a chur i gcrích faoi mhí Mheán Fómhair 2017, ionas go bhféadfaidh an Chomhairle an liosta a fhormhuiniú faoi dheireadh 2017. Tá sé beartaithe gur próiseas leanúnach agus rialta a bheidh ann.

Is éard atá sa tionscnamh freagairt ar phacáiste de thograí ón gCoimisiún chun seachaint cánach corparáide a chosc, agus is freagairt é chomh maith ar ar tháinig chun solais le Páipéir Panama i mí Aibreáin 2016.

“Is éard atá i gcomhaontú an lae inniu idir na Ballstáit go léir cuid bhunriachtanach de straitéis chomhpháirteach an Aontais chun dúshláin dhomhanda, amhail creimeadh an bhoinn agus aistriú brabúis, a chomhrac. Is cruthúnas é go bhfuil ag éirí linn sna hiarrachtaí atá á ndéanamh againn chun bheith ar thús cadhnaíochta sa réimse seo. Céim ríthábhachtach chun tosaigh í seo sa phróiseas a bheidh ar siúl i rith 2017. Tosófar ar idirphlé leis na tíortha sin nach gcomhlíonfaidh na critéir atá bunaithe againn, agus ní chuirfear ar an liosta dubh mar a thugtar air ach na dlínsí sin a dhiúltóidh comhoibriú agus na critéir a chomhlíonadh in am trátha. Is é an sprioc phríomha atá againn dreasú a dhéanamh seachas pionós a fhorchur.

Peter Kažimír, aire airgeadais na Slóvaice agus Uachtarán na Comhairle.

Cáin chorparáide a athchóiriú

Phléigh an Chomhairle pacáiste de thograí atá dírithe ar athchóiriú a dhéanamh ar an tslí ina ngearrtar cáin ar chuideachtaí san Aontas.

Áirítear sa phacáiste tograí nua le haghaidh comhbhonn comhdhlúite don cháin chorparáideach. Tá leabhar rialacha aonair á mholadh ag an gCoimisiún chun brabúis inchánacha cuideachtaí a ríomh ar fud an Aontais, le forálacha chun deireadh a chur le deiseanna an cháin chorparáide a sheachaint. Áirítear sa phacáiste freisin córas nua chun díospóidí maidir le cánachas dúbailte a réiteach, agus bearta chun deireadh a chur le neamhréireanna hibrideacha idir córais chánach na mBallstát agus córais chánach tríú tíortha.

Tá tús curtha leis an obair ar na tograí ar an leibhéal teicniúil, agus béim á leagan ar dtús ar an togra a bhaineann le neamhréireanna hibrideacha.

Imghabháil cánach agus sciúradh airgid

Tháinig an Chomhairle ar chomhaontú maidir le togra le haghaidh rochtain a thabhairt d’údaráis chánach ar fhaisnéis atá i seilbh na n-údarás atá freagrach as sciúradh airgid a chosc.

Leis an Treoir sin, cuirfear de cheangal ar na Ballstáit rochtain a thabhairt ar fhaisnéis faoi úinéireacht thairbhiúil cuideachtaí. Beidh feidhm aici amhail ón 1 Eanáir 2018.

Tá an togra ar cheann de roinnt beart áirithe a leag an Coimisiún amach i mí Iúil 2016, i ndiaidh ar ar tháinig chun solais le Páipéir Panama i mí Aibreáin 2016.

Glacfaidh an Chomhairle an treoir a luaithe a thabharfaidh Parlaimint na hEorpa a tuairim uaithi.