Skip to content

Kif l-UE tiġġieled kontra l-kriminalità ambjentali

Il-kriminalità ambjentali hija waħda mill-aktar attivitajiet kriminali organizzati li jrendu profitt fid-dinja u għandha impatt kbir mhux biss fuq l-ambjent iżda wkoll fuq is-saħħa tal-bniedem. Tħalli ħafna qligħ iżda diffiċli biex tinqabad, issir prosekuzzjoni u jingħata kastig għaliha. Dawn il-fatturi jagħmluha attraenti ħafna għall-gruppi tal-kriminalità organizzata.

L-UE ħadet azzjoni biex tiġġieled in-networks kriminali involuti fil-forom kollha ta' kriminalità ambjentali, inkluż bl-introduzzjoni ta' regoli dwar il-ġestjoni tal-iskart u dwar il-kummerċ fl-organiżmi selvaġġi u l-pjanti. L-UE qed taħdem ukoll fuq it-tisħiħ tar-regoli eżistenti dwar il-protezzjoni tal-ambjent permezz tad-dritt kriminali.

L-awtoritajiet doganali u tal-infurzar tal-liġi fil-pajjiżi kollha tal-UE, l-istituzzjonijiet, l-aġenziji u l-korpi tal-UE, kif ukoll pajjiżi u organizzazzjonijiet sħab, jaħdmu flimkien biex jikkumbattu din il-forma ta' kriminalità permezz ta' investigazzjonijiet, sekwestri u operazzjonijiet oħra tal-pulizija.

F'din l-infografika tista' ssib x'inhi l-kriminalità ambjentali u r-riżultati tal-isforzi tal-UE kontra l-kriminalità ambjentali fil-qafas tal-EMPACT, l-inizjattiva ewlenija tal-UE fil-ġlieda tagħha kontra l-kriminalità internazzjonali organizzata u serja.

Infografika li tiddeskrivi r-reati ambjentali ewlenin u r-riżultati tal-operazzjonijiet tal-pulizija 2018-2021. Illustrazzjonijiet jirrappreżentaw tipi differenti ta' reati kriminali inkluż it-traffikar ta' speċi selvaġġi, injam u skart. Mappa tirrappreżenta l-aktar rotot komuni minn u lejn l-Unjoni Ewropea.

Il-ġlieda tal-UE kontra l-kriminalità ambjentali

Kriminalità ambjentali:

  • hija t-tielet l-akbar attività kriminali fid-dinja wara t-traffikar tad-drogi u l-falsifikazzjoni
  • tikber b'rata ta' 5%-7% fis-sena
  • tiġġenera $110-281 biljun ta' telf kull sena

X'inhi l-kriminalità ambjentali?

  • ġbir, trasport, irkupru jew rimi mhux xieraq tal-iskart
  • emissjoni jew skariku illegali ta' sustanzi fl-atmosfera, fl-ilma jew fil-ħamrija
  • qtil, qerda jew pussess ta' speċijiet protetti ta' annimali jew pjanti selvaġġi jew il-kummerċ tagħhom
  • kummerċ illegali ta' sustanzi li jnaqqsu l-ożonu

X'inhuma l-konsegwenzi tal-kriminalità ambjentali?

  • livelli ogħla ta' tniġġis
  • degradazzjoni ta' speċi selvaġġi
  • tnaqqis tal-bijodiversità
  • tħarbit tal-bilanċ ekoloġiku
  • riskji għas-saħħa tal-bniedem

Rotot ta' traffikar tal-iskart, injam u fawna selvaġġa

  • għasafar: mill-Asja u l-Amerka Latina lejn l-Ewropa (destinazzjoni UE)
  • rettili: mill-Asja, l-Afrika u l-Amerka Latina lejn l-Ewropa (destinazzjoni UE)
  • qrun ta' rinoċeronti: mill-Afrika jgħaddu mill-Ewropa lejn l-Asja (tranżitu UE)
  • avorju: mill-Afrika jgħaddu mill-Ewropa lejn l-Asja (tranżitu UE)
  • sallura: mill-Ewropa lejn l-Asja (oriġini UE)
  • injam: mill-Asja lejn l-Ewropa (destinazzjoni finali UE)
  • skart: mill-Ewropa lejn l-Asja u l-Afrika (oriġini UE)

Riżultati tal-operazzjonijiet tal-pulizija tal-UE 2018-2021

Sekwestri

167 452 tunnellata ta' skart - 15%-30% tal-vjeġġi tal-iskart huma maħsuba li huma illegali, u jammontaw għal €9.5 biljun fi dħul annwali mis-suq illeċitu tal-iskart fl-UE.

1 174 tunnellata ta' skart elettroniku - Tunnellata smartphones fiha 100 darba aktar deheb minn tunnellata mineral tad-deheb mhux maħdum. Skart elettroniku traffikat mill-Ewropa jiġi riċiklat manwalment u jerħi tossini qawwija.

32 007 m3 ta' injam - Qtugħ illegali tas-siġar għall-injam jipproduċi 15-30% tal-kummerċ dinji tal-injam. L-injam jintuża fil-kostruzzjoni u għal prodotti tal-injam.

355 rettilu, li jiswa €800 000 - Eluf ta' speċijiet ta' rettili madwar id-dinja huma mhedda minħabba t-traffikar. Jintużaw l-aktar fl-industrija tal-moda u bħala pets.

4.6 tunnellati ferħ ta' sallura - 350 miljun ferħ ta' sallura Ewropej, li jiswew €3 biljun, jiġu ttraffikati mill-UE kull sena. Dawn jinbiegħu l-aktar fl-Asja għall-ikel.

639 oġġett tal-avorju - Il-kaċċa illegali tal-iljunfanti żżid ir-riskju tal-estinzjoni. L-avorju jinkiseb prinċipalment fl-Afrika u jiġi ttraffikat mill-Ewropa lejn l-Asja.

Il-valur totali tas-sekwestri huwa ta' €8.3 miljun.

Arresti:

829 persuna

Aktar tagħrif:

Suġġetti