Kunsill Agrikoltura u Sajd, 11/05/2017, 11 ta' Mejju 2017

Riżultati ewlenin

“Sal-lum, is-sajjieda Ewropej kellhom jirrispettaw aktar minn 30 regolament differenti, li jikkostitwixxu qafas leġislattiv partikolarment kumpless u tqil. Aħna rridu nagħmlulhom ħajjithom aktar faċli, niggarantixxu ċertezza legali u nikkonċentraw fuq l-innovazzjoni. Regoli aħjar u aktar ċari ser jgħinu fil-ħarsien tal-ibħra tagħna u tas-sostenibbiltà tar-riżorsi tas-sajd tagħna. U fuq kollox, il-pożizzjoni tal-Kunsill tagħti s-setgħa lill-komunità tas-sajd billi tagħtiha leħen aktar dirett fil-proċess ta' teħid ta’ deċiżjonijiet.”

Roderick Galdes, is-Segretarju Parlamentari Malti għall-Agrikoltura u l-president tal-Kunsill

Miżuri tekniċi

Il-Kunsill qabel dwar il-pożizzjoni tiegħu fuq proposta għal regoli ġodda dwar il-konservazzjoni tar-riżorsi tas-sajd u l-protezzjoni ta' ekosistemi tal-baħar, spiss imsejħa “miżuri tekniċi”.

Il-pożizzjoni tal-Kunsill għandha l-għan li timmodernizza r-regoli eżistenti dwar kif, fejn u meta jistgħu jistadu s-sajjieda. Dawn ikopru l-qbid u l-ħatt tar-riżorsi tas-sajd, l-ispeċifikazzjonijiet u t-tħaddim tat-tagħmir tas-sajd, u miżuri biex jitnaqqas l-impatt fuq speċi jew żoni sensittivi.

• Konservazzjoni tar-riżorsi tas-sajd permezz ta’ miżuri tekniċi: qbil dwar il-pożizzjoni ta' negozjar tal-Kunsill
• Text of the Council general approach on the proposal for the conservation of fishery resources and the protection of marine ecosystems through technical measures

Id-deni Afrikan tal-ħnieżer f’pajjiżi terzi

Il-Kunsill ġie aġġornat dwar id-deni Afrikan tal-ħnieżer u kellu l-opportunità li jiddiskuti l-qerda tiegħu, b’mod partikolari b’rabta mar-rwol tal-pajjiżi ġirien tal-UE bħall-Ukrajna, il-Belarussja u l-Moldova. Id-delegazzjonijiet saħqu dwar l-importanza ta’ approċċ multidixxiplinari u koordinat internazzjonalment biex tiġi miġġielda l-marda, u l-Kummissjoni kkonfermat l-appoġġ tagħha għal dawk l-istati membri kkonċernati.

Suġġetti oħra fuq l-aġenda

Il-ministri ġew infurmati dwar id-dikjarazzjoni ta’ MedFish4Ever adottata fil-konferenza ministerjali dwar is-sajd Mediterranju li saret f’Malta fid-29-30 ta’ Marzu, u dwar il-Konferenza tan-Nazzjonijiet Uniti dwar l-Oċean li ġejja, li ser issir fi New York fil-5-9 ta’ Ġunju.