Kunsill Agrikoltura u Sajd, 21 ta' Settembru 2020

Riżultati ewlenin

Il-ministri ltaqgħu fi Brussell u għamlu progress fid-diskussjonijiet dwar il-pakkett ta' riforma tal-politika agrikola komuni (PAK) ta' wara l-2020 bil-ħsieb li jiġi adottat l-approċċ ġenerali tal-Kunsill f'Ottubru 2020. Huma ddiskutew ukoll kwistjonijiet agrikoli relatati mal-kummerċ b'enfasi partikolari fuq in-negozjati reċenti u futuri ta' ftehimiet ta' kummerċ ħieles ma' pajjiżi terzi.

Illum għamilna progress tajjeb fid-diskussjonijiet tagħna dwar ir-riforma tal-PAK u ninsab fiduċjuż li fil-laqgħa tagħna li jmiss ser inkunu nistgħu nadottaw l-approċċ ġenerali tal-Kunsill. Kien hemm kunsens wiesa' u appoġġ li dan nistgħu niksbuh f'Ottubru. Għadna rridu niddiskutu ċerti kwistjonijiet iżda kont kuntent li qed nara xi rieda għal kompromess. Ħaġa waħda tibqa' l-istess: l-attenzjoni tagħna lill-bdiewa Ewropej biex jibqgħu kompetittivi matul it-tranżizzjoni lejn prattiki aktar ekoloġiċi. Jeħtieġ li ma nħallu l-ebda dubju li l-ambizzjonijiet ekoloġiċi tagħna huma reali u jistgħu jintlaħqu mill-bdiewa Ewropej.

Julia Klöckner, Ministru Federali tal-Ġermanja għall-Ikel u l-Agrikoltura

Matul is-sessjoni ta' filgħodu, il-ministri kellhom skambju ta' fehmiet dwar tliet elementi tar-riforma tal-PAK: l-arkitettura ekoloġika, l-inkorporazzjoni tal-konklużjonijiet tal-Kunsill Ewropew dwar il-QFP fis-sistema futura tal-pagamenti diretti, u l-mudell ta' implimentazzjoni l-ġdid. Filwaqt li l-ministri kellhom fehmiet diverġenti dwar xi kwistjonijiet, huma kienu sodi fir-rigward tal-għan li jintlaħaq qbil dwar l-approċċ ġenerali tal-Kunsill f'Ottubru. Ħafna ministri rrikonoxxew li s-suġġerimenti mressqa mill-Presidenza huma pass fid-direzzjoni t-tajba. Dawn kienu jinkludu l-introduzzjoni ta' sehem minimu uniformi fl-UE kollha ta' żoni mhux produttivi u approċċ aktar flessibbli u volontarju dwar il-limiti massimi tal-pagamenti diretti. Is-suġġeriment li jiġu introdotti ekoskemi obbligatorji b'fażi pilota ta' sentejn intlaqa' parzjalment. Fir-rigward tal-mudell ta' implimentazzjoni l-ġdid, il-ministri rrikonoxxew il-progress li sar s'issa iżda qiesu wkoll li għad hemm bżonn ta' aktar diskussjonijiet dwar kwistjonijiet speċifiċi: il-proċess ta' approvazzjoni tal-pjanijiet strateġiċi nazzjonali u, b'mod aktar ġenerali, il-ħtieġa għal politika simplifikata.

Kwistjonijiet agrikoli relatati mal-kummerċ

Abbażi ta' preżentazzjoni mill-Kummissjoni Ewropea, il-ministri ddiskutew l-aħħar żviluppi fin-negozjati li għaddejjin tal-ftehimiet ta' kummerċ ħieles tal-UE u s-sħubiji ma' pajjiżi terzi. Il-ministri semgħu mill-Kummissjoni Ewropea dwar iż-żieda fl-esportazzjonijiet tal-UE ta' prodotti agroalimentari matul l-ewwel xhur tal-2020 bis-saħħa tal-applikazzjoni ta' ftehimiet konklużi reċentement. Ħafna ministri esprimew ukoll l-appoġġ qawwi tagħhom għall-isforzi tal-Kummissjoni Ewropea biex tikkonkludi ftehimiet kummerċjali miftuħa, ġusti u sostenibbli ma' pajjiżi terzi, speċjalment matul il-pandemija tal-Covid-19.

Kwistjonijiet oħra

Il-ministri ttrattaw ukoll il-kwistjonijiet li ġejjin:

• Franza ppreżentat dikjarazzjoni dwar il-ħtieġa li jiġu żviluppati proteini tal-pjanti fl-Ewropa biex titnaqqas id-dipendenza qawwija fuq l-importazzjonijiet;
• Spanja tenniet l-appelli biex jinżamm il-baġit attwali għall-programm iddedikat lir-reġjuni ultraperiferiċi fil-QFP li jmiss;
• Ir-Repubblika Ċeka u l-Italja ppreżentaw sett ta' prinċipji mixtieqa relatati mat-tikkettar tan-nutrizzjoni fuq quddiem tal-pakkett;
• Ir-Repubblika Ċeka talbet lill-Kummissjoni Ewropea biex tissottometti proposta biex tiġi pprojbita l-produzzjoni tal-bajd minn tiġieġ tal-bajd f'gaġeġ fl-UE sal-2030.
• Il-Ġermanja ppreżentat is-sitwazzjoni attwali tad-deni Afrikan tal-ħnieżer fil-Ġermanja u l-miżuri li ttieħdu;
• Ir-Repubblika Ċeka ppreżentat nota dwar is-sitwazzjoni fis-settur tat-trobbija tal-ħnieżer fejn talbet lill-Kummissjoni Ewropea tipprovdi analiżi dettaljata.