Vidjokonferenza tal-ministri għall-ekonomija u l-finanzi, 9 ta' Ġunju 2020

Riżultati ewlenin

Pjan ta' rkupru għall-Ewropa

Il-ministri kellhom skambju ta' fehmiet mal-Kummissjoni dwar l-irkupru tal-Ewropa wara l-kriżi tal-COVID-19, b'enfasi fuq il-ħtiġijiet ta' tiswija, irkupru u reżiljenza. Huma ddiskutew ukoll l-istruttura bażika tal-pjan ta' rkupru għall-Ewropa.

Il-Pjan ta' Rkupru ppreżentat fis-27 ta' Mejju identifika ħtiġijiet ta' investiment sinifikanti fl-UE li l-Kummissjoni tipproponi li jiġu indirizzati b'sensiela ta' miżuri mmirati għall-ingranaġġ ta' madwar €3.1 triljun.

Il-ministri enfasizzaw l-importanza li jintużaw il-fondi biex jiġi żgurat irkupru sostenibbli u jinkisbu objettivi ta' politika komuni bħal transizzjoni ekoloġika u diġitali. Huma ddiskutew ir-relazzjoni tas-Semestru Ewropew mal-Pjan ta' Rkupru, kif ukoll il-valutazzjoni tal-ħtiġijiet ta' investiment u ta' riforma nazzjonali: enfasizzaw il-ħtieġa li jiġi żgurat l-impatt massimu, jitnaqqas il-piż amministrattiv u jiġu evitati d-duplikazzjonijiet. Il-ministri indirizzaw ukoll kwistjonijiet relatati mad-daqs ġenerali tal-istrument ta' rkupru, in-natura u l-kriterji ta' allokazzjoni tal-fondi jew il-qafas ta' governanza.

Il-Kummissjoni, il-Bank Ċentrali Ewropew (BĊE) u l-Bank Ewropew tal-Investiment (BEI) taw ħarsa ġenerali tal-implimentazzjoni tal-miżuri li ttieħdu s'issa.

Semestru Ewropew

Il-ministri għall-finanzi ħadu kont tat-tħejjijiet tar-rakkomandazzjonijiet speċifiċi għall-pajjiż għall-eżerċizzju tas-Semestru Ewropew ta' din is-sena.

Ir-rakkomandazzjonijiet jipprovdu gwida ta' politika mfassla apposta għal kull Stat Membru tal-UE dwar kif tista' tingħata spinta lill-impjiegi u t-tkabbir, filwaqt li jinżammu finanzi pubbliċi sodi.

Minħabba d-deterjorament qawwi tas-sitwazzjoni ekonomika fl-istati membri kollha minħabba l-pandemija tal-COVID-19 u l-attivazzjoni tal-miżuri ta' flessibbiltà fil-Patt ta' Stabbiltà u Tkabbir f'Marzu 2020, ir-rakkomandazzjonijiet ta' din is-sena jiffokaw fuq ħames oqsma ta' prijorità ġenerali:

• l-investiment fis-sistemi tal-kura tas-saħħa,
• il-preservazzjoni tal-impjiegi u l-indirizzar tal-impatt soċjali tal-kriżi,
• ir-riċerka u l-iżvilupp,
• l-iżgurar ta' provvedimenti ta' likwidità u l-istabbiltà tas-settur finanzjarju, u
• il-preservazzjoni tas-suq uniku u ċ-ċirkolazzjoni ta' oġġetti u servizzi.

Il-Kunsill ser jadotta formalment ir-rakkomandazzjonijiet hekk kif il-Kunsill Ewropew japprovahom, x'aktarx f'Lulju.