"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Vidjokonferenza tal-ministri għall-ekonomija u l-finanzi, 19 ta' Mejju 2020
Riżultati ewlenin
Rispons ekonomiku għall-pandemija tal-COVID-19
Il-ministri ddiskutew il-progress li sar rigward il-miżuri ta' rispons tal-UE li ttieħdu biex tiġi indirizzata l-kriżi tal-COVID-19.
Il-ministri laqgħu l-adozzjoni, permezz tal-proċedura bil-miktub, tar-regolament għal appoġġ temporanju biex jittaffew ir-riskji ta' qgħad f'emerġenza (SURE). SURE jista' jipprovdi sa €100 biljun f'self taħt termini favorevoli lill-istati membri biex jgħin fil-finanzjament ta' skemi nazzjonali ta' xogħol b'ħinijiet iqsar u miżuri simili, inkluż għal persuni li jaħdmu għal rashom, kif ukoll jappoġġa xi miżuri relatati mas-saħħa, b'mod partikolari fuq il-post tax-xogħol b'reazzjoni għall-kriżi.
Filwaqt li jsalvaw l-impjiegi u jipproteġu d-dħul taċ-ċittadini tagħna, il-gvernijiet tal-UE ser ikunu jistgħu jimminimizzaw l-impatt soċjali negattiv tal-kriżi tas-saħħa u jippermettu lill-ekonomiji tagħna jirritornaw għan-normal kemm jista' jkun malajr permezz ta' dan il-fond.
Zdravko Maric, Viċi Prim Ministru u Ministru għall-finanzi tal-Kroazja
SURE huwa wieħed mit-tliet xbieki ta' sikurezza, b'valur ta' €540 biljun, għall-impjiegi u l-ħaddiema, għan-negozji u l-istati membri, li l-Grupp tal-Euro laħaq qbil dwaru fid-9 ta' April 2020. Il-mexxejja tal-UE approvaw il-qbil fit-23 ta' April u talbu li l-pakkett ikun operattiv sal-1 ta' Ġunju 2020.
Ix-xibka ta' sikurezza għall-istati membri, l-Appoġġ fil-Kriżi Pandemika tal-MES, saret operattiva fil-15 ta’ Mejju 2020 wara ftehim politiku dwar il-karatteristiċi tal-istrument u termini standardizzati fil-Grupp tal-Euro tat-8 ta' Mejju.
Il-ministri evalwaw ukoll id-diskussjonijiet li għaddejjin bħalissa biex tiġi operazzjonalizzata x-xibka ta' sikurezza għan-negozji permezz tal-fond ta' garanzija pan-Ewropew tal-Bank Ewropew tal-Investiment. Il-Presidenza appellat biex l-istrument jiġi ffinalizzat kemm jista' jkun malajr
Il-Kummissjoni u l-Bank Ċentrali Ewropew ippreżentaw il-valutazzjoni tagħhom tas-sitwazzjoni ekonomika u finanzjarja.
Ġlieda kontra l-ħasil tal-flus u l-finanzjament tat-terroriżmu
Il-ministri kellhom diskussjoni wara preżentazzjoni mill-Kummissjoni Ewropea dwar l-approċċ tagħha biex tissaħħaħ aktar il-ġlieda tal-UE kontra l-ħasil tal-flus u l-finanzjament tat-terroriżmu (AML).
Il-ministri ddiskutew kif jista' jittejjeb aktar il-qafas eżistenti tal-AML, b'mod partikolari:
kif l-aħjar jinkiseb sett armonizzat ta' regoli u liema oqsma u setturi jistħoqqilhom jiġu koperti minn regolament;
kif isir użu aħjar mid-data, mill-analiżi tad-data u mill-kondiviżjoni tad-data;
il-possibbiltà li tiġi stabbilita awtorità ġdida tal-UE ddedikata għall-AML u l-kompetenzi possibbli tagħha;
il-metodoloġija riveduta proposta mill-Kummissjoni għall-identifikazzjoni ta' pajjiżi terzi b'riskju għoli.
Fis-7 ta' Mejju, il-Kummissjoni ppreżentat:
pjan ta' azzjoni għal politika komprensiva tal-UE dwar il-prevenzjoni tal-ħasil tal-flus u l-finanzjament tat-terroriżmu
metodoloġija riveduta għall-elenkar ta' pajjiżi terzi b'riskju għoli li għandhom nuqqasijiet strateġiċi fir-reġimi tagħhom tal-AML
Il-pjan ta' azzjoni tal-Kummissjoni jagħti segwitu għall-konklużjonijiet tal-Kunsill ta' Diċembru 2019, li jistabbilixxu prijoritajiet strateġiċi għal riforma f'dan il-qasam.
Il-metodoloġija riveduta ta' elenkar għandha l-għan li tipproteġi aħjar is-sistema finanzjarja tal-UE mir-riskji tal-ħasil tal-flus. Il-qafas tal-UE dwar il-ġlieda kontra l-ħasil tal-flus u l-finanzjament tat-terroriżmu jistabbilixxi obbligu li jiġu identifikati ġurisdizzjonijiet ta' pajjiżi terzi li għandhom nuqqasijiet strateġiċi fir-reġimi tagħhom ta' kontra l-ħasil tal-flus u l-finanzjament tat-terroriżmu.
Il-ministri laqgħu l-adozzjoni tal-konklużjonijiet tal-Kunsill dwar ir-rapporti tal-pajjiżi tas-Semestru Ewropew 2020 u l-implimentazzjoni tar-rakkomandazzjonijiet speċifiċi għall-pajjiżi tal-2019.
Dawn il-konklużjonijiet huma parti mill-proċess annwali ta’ valutazzjoni tal-proċeduri ta’ żbilanċi makroekonomiċi. Madankollu, din is-sena, huma jirriflettu s-sitwazzjoni eċċezzjonali marbuta mad-deterjorament qawwi tas-sitwazzjoni ekonomika b'riżultat tal-pandemija tal-COVID-19. Il-konklużjonijiet jiffukaw fuq sfidi u vulnerabbiltajiet strutturali li għadhom rilevanti fl-ambjent ekonomiku li qed jinbidel u inċert tal-lum, u li jistgħu jkunu rilevanti għal strateġija ta' rkupru.
Djalogu ekonomiku mal-Balkani tal-Punent u t-Turkija
Fil-marġini tal-vidjokonferenza tal-ministri għall-ekonomija u l-finanzi, l-UE, il-Balkani tal-Punent u t-Turkija kellhom id-djalogu annwali tagħhom dwar il-politika ekonomika. Id-diskussjoni ta' din is-sena ffukat fuq l-impatt ekonomiku tal-pandemija tal-COVID-19 fuq ir-reġjun. Il-parteċipanti adottaw dikjarazzjoni konġunta fi tmiem il-vidjokonferenza.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Filwaqt li jsalvaw l-impjiegi u jipproteġu d-dħul taċ-ċittadini tagħna, il-gvernijiet tal-UE ser ikunu jistgħu jimminimizzaw l-impatt soċjali negattiv tal-kriżi tas-saħħa u jippermettu lill-ekonomiji tagħna jirritornaw għan-normal kemm jista' jkun malajr permezz ta' dan il-fond.
