Vidjokonferenza tal-ministri għall-ekonomija u l-finanzi, 10 ta' Lulju 2020

Riżultati ewlenin

Impatt ekonomiku tal-COVID-19 u miżuri ta' rkupru

Il-ministri kellhom skambju ta' fehmiet dwar il-progress miksub fl-implimentazzjoni tal-miżuri ta' rispons għall-kriżi tal-COVID-19 fil-livell tal-UE. Il-Kummissjoni Ewropea u l-Bank Ċentrali Ewropew (BĊE) ippreżentaw il-valutazzjoni tagħhom tas-sitwazzjoni attwali.

Ninsabu f'mument kruċjali fir-rispons tagħna għall-konsegwenzi ekonomiċi tal-kriżi tal-COVID-19. Qed nintensifikaw l-isforzi tagħna biex niżguraw li l-kumpaniji, l-impjegati u l-istati membri jkollhom aċċess għall-fondi li qbilna dwarhom aktar kmieni fir-rebbiegħa. B'mod parallel, għaddejjin ukoll negozjati kruċjali dwar il-pjan ta' rkupru. Illum il-ministri tennew l-impenn tagħhom li jwettqu malajr rispons effettiv għal irkupru b'saħħtu. Olaf Scholz, il-Ministru Federali għall-Finanzi u l-Viċi Kanċillier tal-Ġermanja

Il-ministri qiesu l-implimentazzjoni tat-tliet xbieki ta' sikurezza:

• l-appoġġ fil-kriżi pandemika tal-MES għall-istati membri: dan l-istrument, ibbażat fuq linja ta' kreditu prekawzjonarja eżistenti tal-MES aġġustata fid-dawl tal-kriżi tal-COVID-19, sar operazzjonali fil-15 ta' Mejju 2020.
• l-istrument Ewropew għal appoġġ temporanju biex jittaffew ir-riskji ta' qgħad f'emerġenza (SURE): din l-iskema mmaniġġjata mill-Kummissjoni tista' tipprovdi sa €100 biljun f'self taħt termini favorevoli lill-istati membri u ser issir operazzjonali ladarba l-istati membri kollha jkunu pprovdew il-garanziji tagħhom. Dan il-proċess huwa mistenni li jitlesta sa tmiem ix-xahar.
• il-fond ta' garanzija pan-Ewropew għall-appoġġ ta' negozji tal-BEI: il-fond ta' garanzija ta' €25 biljun, li ser jimmobilizza investimenti fl-industriji kollha tal-UE, ser isir operazzjonali hekk kif l-istati membri li jammontaw għal mill-inqas 60% tal-kapital tal-BEI jkunu pprovdew il-garanziji tagħhom. Il-fond mistenni li jiġi finalizzat sal-aħħar ta' Lulju.

Il-ministri qiesu wkoll il-ħidma li għaddejja fuq l-irkupru tal-UE wara l-COVID-19. Sakemm tittieħed deċiżjoni mill-Kunsill Ewropew, tkompli l-ħidma fuq l-aspetti tekniċi tal-leġiżlazzjoni dwar pjan ta' rkupru.

Unjoni tas-swieq kapitali

Il-President tal-Forum ta' Livell Għoli dwar l-unjoni tas-swieq kapitali (CMU), Thomas Wieser, ppreżenta r-rapport finali tal-forum, ippubblikat fl-10 ta' Ġunju. Dan ir-rapport jistabbilixxi 17-il rakkomandazzjoni mmirati lejn it-tneħħija tal-akbar ostakli fis-swieq kapitali tal-UE u biex tiżdied il-kompetittività tas-swieq kapitali Ewropej.

Il-ministri kellhom skambju ta' fehmiet dwar il-prijoritajiet biex isir progress fis-CMU, b'mod partikolari bil-ħsieb li jingħelbu l-konsegwenzi ekonomiċi tal-kriżi tal-COVID-19 u jinħolqu alternattivi solidi bbażati fuq l-UE għas-swieq kapitali wara Brexit. Din id-diskussjoni ser tikkontribwixxi għat-tħejjijiet ta' pjan ta' azzjoni ġdid tal-Kummissjoni għas-CMU, li huwa mistenni li jiġi ppubblikat sa tmiem is-sena.

It-tisħiħ tal-Unjoni tas-Swieq Kapitali ser ikun fost il-prijoritajiet ewlenin tal-Presidenza tagħna fil-qasam ekonomiku. Is-swieq kapitali għandhom rwol kruċjali x'jaqdu fl-irkupru ta' wara l-COVID, biex jipprovdu sorsi addizzjonali ta' finanzjament għall-kumpaniji tagħna u biex jiffaċilitaw it-trasformazzjonijiet ekoloġiċi u diġitali. L-għan tagħna huwa li naqblu dwar approċċ komuni fil-Kunsill dwar il-prijoritajiet għat-tisħiħ ulterjuri ta' din l-inizjattiva sa tmiem is-sena. OLAF Scholz, Ministru Federali għall-Finanzi u l-Viċi Kanċillier tal-Ġermanja

Rapporti dwar il-konverġenza

Il-ministri qiesu r-rapporti dwar il-konverġenza ppubblikati mill-Kummissjoni Ewropea u l-BĊE fl-10 ta' Ġunju. Ir-rapporti jeżaminaw jekk l-istati membri mhux fiż-żona tal-euro jissodisfawx il-kondizzjonijiet meħtieġa biex jadottaw il-munita unika. Huma jkopru seba' pajjiżi: il-Bulgarija, ir-Repubblika Ċeka, il-Kroazja, l-Ungerija, il-Polonja, ir-Rumanija u l-Iżvezja.

Ir-rapporti huma bbażati fuq kriterji ta' konverġenza, inkluż l-istabbiltà tal-prezzijiet, finanzi pubbliċi sodi, l-istabbiltà ta' rata tal-kambju u konverġenza fir-rati tal-imgħax fit-tul. Tiġi vvalutata wkoll il-kompatibbiltà tal-leġiżlazzjoni nazzjonali mar-regoli tal-Unjoni Ekonomika u Monetarja. Ir-rapporti kkonkludew li għalissa l-ebda wieħed mill-pajjiżi ma jissodisfa l-kondizzjonijiet formali kollha biex jingħaqad maż-żona tal-Euro.

• Rapport dwar il-konverġenza 2020 (Kummissjoni Ewropea)
• Rapport dwar il-konverġenza 2020 (Bank Ċentrali Ewropew)

Informazzjoni mill-Presidenza

Il-Presidenza Ġermaniża ddeskriviet il-prijoritajiet tagħha fil-qasam tal-affarijiet ekonomiċi u finanzjarji. Hija ser tiffoka fuq ir-rispons komprensiv u ambizzjuż tal-Ewropa għall-pandemija tal-COVID-19. Hija ser taħdem ukoll fuq il-modernizzazzjoni tal-politika tat-tassazzjoni tal-UE, it-tisħiħ tal-unjoni bankarja, l-avvanz fl-unjoni tas-swieq kapitali, il-promozzjoni ta' diġitalizzazzjoni sigura u innovattiva tas-settur tas-servizzi finanzjarji u l-ġlieda kontra l-ħasil tal-flus u l-finanzjament tat-terroriżmu. Il-finanzjament sostenibbli jibqa' wkoll ta' importanza ċentrali.

Il-Presidenza infurmat ukoll lill-ministri dwar it-tħejjijiet tal-laqgħa li jmiss tal-G20 dwar il-finanzi u l-progress fuq il-kwistjonijiet internazzjonali li għaddejjin.