Vidjokonferenza tal-Grupp tal-Euro, 3 ta' Novembru 2020

Riżultati ewlenin

Format regolari (pajjiżi taż-żona tal-euro)

COVID-19: sfidi fiż-żona tal-euro u l-ekonomija globali

Id-direttur taċ-Ċentru Ewropew għall-Prevenzjoni u l-Kontroll tal-Mard (EDCD), Andrea Ammon, kienet mistiedna mill-President tal-Grupp tal-Euro biex tinforma lill-ministri dwar l-evoluzzjoni tal-pandemija tal-COVID-19.

Il-ministri kellhom skambju ta' fehmiet mal-president tal-Kumitat għall-Affarijiet Ekonomiċi u Monetarji tal-Parlament Ewropew, Irene Tinagli, dwar l-iżviluppi ekonomiċi u l-isfidi politiċi li qed jiffaċċjaw l-istati membri fiż-żona tal-euro.

Il-Grupp tal-Euro ħareġ dikjarazzjoni dwar l-iżviluppi tal-COVID-19.

Ninsab konvint li bl-għaqda fl-għanijiet li rajna mill-bidu tal-kriżi ser negħlbu dawn iż-żminijiet ta' sfida. Din l-għaqda fl-għanijiet ser tkun importanti wkoll biex jiġi ffinalizzat ftehim dwar il-Faċilità għall-Irkupru u r-Reżiljenza, li hija prijorità urġenti għalina lkoll minħabba l-importanza kruċjali tagħha fl-appoġġ għall-irkupru ekonomiku fis-snin li ġejjin.

Paschal Donohoe, President tal-Grupp tal-Euro

• Dikjarazzjoni tal-Grupp tal-Euro dwar l-iżviluppi tal-COVID-19 (stqarrija għall-istampa, 3 ta' Novembru 2020)

L-euro bħala munita diġitali

Il-ministri kellhom diskussjoni strateġika dwar il-benefiċċji u l-isfidi ta' introduzzjoni futura possibbli ta' euro diġitali. Din hija waħda mill-prijoritajiet inklużi fil-programm ta' ħidma tal-Grupp tal-Euro.

Rapport tal-Bank Ċentrali Ewropew ta' Ottubru 2020 serva bħala kontribut għad-diskussjoni.

Ninkoraġġixxu lill-BĊE biex ikompli l-ħidma tiegħu fir-rigward ta' mudelli u għażliet għall-ħruġ possibbli ta' euro diġitali. Sadanittant, (...) ser nikkunsidraw l-implikazzjonijiet tal-proġett fuq is-sovranità monetarja tagħna, l-istabbiltà finanzjarja, il-finanzjament bankarju, il-protezzjoni tal-konsumatur u fuq ir-rwol internazzjonali tal-euro. Paschal Donohoe, President tal-Grupp tal-Euro

• Rapport dwar l-Euro Diġitali mit-Task Force ta' Livell Għoli tal-Eurosistema
• Finanzi diġitali (informazzjoni ġenerali)

Format tal-unjoni bankarja

Il-Grupp tal-Euro kellu l-ewwel laqgħa tiegħu fil- "format tal-unjoni bankarja", mal-membri tal-unjoni bankarja tal-UE. Bħalissa dawn huma d-19-il pajjiż taż-żona tal-euro kif ukoll il-Bulgarija u l-Kroazja, li ssieħbu mal-unjoni bankarja f'Lulju li għadda.

Aspetti operazzjonali tal-unjoni bankarja

Il-president tal-Bord Superviżorju tal-Bank Ċentrali Ewropew, Andrea Enria, ippreżenta l-kompiti superviżorji mwettqa mis-superviżjoni bankarja tal-BĊE mill-aħħar rapport f'Ġunju 2020. Huwa ffoka fuq:

• l-impatt tal-COVID-19 fuq il-banek u l-miżuri adottati
• il-brexit
• ir-riskju tat-tibdil fil-klima

Il-president tal-Bord Uniku ta’ Riżoluzzjoni (SRB), Elke König, infurmat lill-Grupp tal-Euro dwar l-attivitajiet reċenti tas-SRB. B'mod partikolari, hija ffokat fuq ir-rispons għall-kriżi tal-COVID-19 u aġġornat lill-Grupp tal-Euro dwar il-progress li sar fuq:

• l-ippjanar ta' riżoluzzjoni
• ir-rekwiżiti minimi għal fondi proprji u obbligazzjonijiet eliġibbli (MREL)
• ir-riżolvibbiltà
• il-bini tal-Fond Uniku ta' Riżoluzzjoni (SRF)

Format inklużiv (UE 27)

Xbieki ta' sikurezza għall-COVID-19: sitwazzjoni attwali

Il-ministri ħadu kont tal-progress fl-implimentazzjoni tat-tliet xbieki ta' sikurezza maqbula fil-vidjokonferenza tal-Grupp tal-Euro tas-7-9 ta' April 2020:

• Appoġġ biex jittaffew ir-Riskji ta' Qgħad f'Emerġenza (SURE) lil 17-il stat membru u l-Kummissjoni ħarġet b'suċċess l-ewwel bonds tagħha fis-swieq finanzjarji
• Il-Fond ta' Garanzija pan-Ewropew tal-BEI sar operazzjonali matul is-sajf u ġew approvati l-ewwel operazzjonijiet
• Il-linja ta' kreditu għall-Appoġġ fil-Kriżi Pandemika tal-MES tinsab fis-seħħ u ser tkun disponibbli bħala garanzija ta' kontinġenza għas-sovrani sal-aħħar tal-2022

• Laqgħa tal-Grupp tal-Euro, 7-9 ta' April 2020
• COVID-19: ir-rispons tal-UE għar-riperkussjonijiet ekonomiċi (informazzjoni ġenerali)