Grupp tal-Euro, 12 ta' Lulju 2021

Riżultati ewlenin

Grupp tal-Euro f'format inklużiv (14:00)

Politiki ekonomiċi u finanzjarji

Il-ministri għall-finanzi kellhom skambju ta' fehmiet dwar id-dimensjoni internazzjonali tal-politiki ekonomiċi u finanzjarji taż-żona tal-euro ma' Janet Yellen, is-Segretarju tat-Teżor tal-Istati Uniti. Id-diskussjoni ffokat fuq l-irkupru ekonomiku kif ukoll fuq kwistjonijiet bankarji u ta' stabbiltà finanzjarja.

Kellna diskussjoni wiesgħa u rikka mas-Segretarju tat-Teżor tal-Istati Uniti Yellen. Indirizzajna l-isfidi li bħalissa qed tiffaċċa l-ekonomija globali, u bdejna bil-ġlieda tagħna kontra l-COVID-19. Iddiskutejna kif din il-marda qed taffettwa n-negozji tagħna u l-ħaddiema tagħna fuq iż-żewġ naħat tal-Atlantiku, u kif l-aġendi tagħna jistgħu jiġu allinjati bis-sħiħ hekk kif nittrattaw din il-kriżi. Paschal Donohoe, President tal-Grupp tal-Euro

• Ir-rwol internazzjonali tal-euro (informazzjoni ġenerali)

Unjoni bankarja

Paschal Donohoe, il-President tal-Grupp tal-Euro, informa lill-ministri dwar is-summit tal-Euro ta' Ġunju, b'enfasi partikolari fuq id-diskussjonijiet dwar l-unjoni bankarja, bil-ħsieb li titħejja l-ħidma li ġejja.

• Unjoni bankarja (informazzjoni ġenerali)

Grupp tal-Euro (16:15)

Pożizzjoni fiskali taż-żona tal-euro

Il-ministri ddiskutew is-sitwazzjoni u l-prospetti baġitarji fiż-żona tal-euro inġenerali, u ffokaw fuq il-prospetti għall-2022. Il-president tal-Bord Fiskali Ewropew (EFB), Niels Thygesen, kien mistieden għal din il-laqgħa u ppreżenta r-rapport tal-EFB ippubblikat reċentement.

Il-kwistjoni ewlenija għaż-żona tal-euro hija kif nistgħu naġġustaw il-politika baġitarja tagħna lura għan-"normal". Bħalissa għaddejja bidla gradwali fil-fokus tal-miżuri minn appoġġ ta' emerġenza għal dak ta' rkupru. Jeħtieġ li nżommu l-aġilità politika miexja 'l quddiem. Paschal Donohoe, President tal-Grupp tal-Euro

Il-Kummissjoni Ewropea ppreżentat il-valutazzjoni tagħha bbażata fuq l-analiżi tagħha tal-programmi ta' stabbiltà tal-2021. Id-diskussjoni ikkontribwiet għat-tħejjija tal-abbozzi ta' pjanijiet baġitarji u r-rakkomandazzjonijiet għaż-żona tal-euro għall-2022.

Il-grupp tal-Euro jiddiskuti regolarment is-sitwazzjoni u l-prospetti baġitarji fiż-żona tal-euro kollha kemm hi, fil-qafas tal-valutazzjoni tal-abbozz ta' pjanijiet baġitarji mfassla mill-istati membri taż-żona tal-euro.

• Il-Bord Fiskali Ewropew jivvaluta l-pożizzjoni fiskali xierqa għaż-żona tal-euro fl-2022 (Kummissjoni Ewropea)

L-euro bħala munita diġitali: rendikont

Il-ministri għall-finanzi ddiskutew l-implikazzjonijiet potenzjali ta' euro diġitali għaċ-ċittadini, in-negozji u l-Unjoni Ekonomika u Monetarja inġenerali. Huma ffokaw fuq id-dimensjoni politika tagħha, filwaqt li jirrispettaw bis-sħiħ ir-rwoli u l-mandati tal-istituzzjonijiet kollha involuti.

Fix-xhur li ġejjin, il-grupp tal-Euro ser jikkunsidra d-dimensjonijiet politiċi differenti tat-tfassil u l-impatt tal-euro diġitali, b'mod partikolari f'termini ta' privatezza, kompetizzjoni, innovazzjoni jew inklużività. Paschal Donohoe, President tal-Grupp tal-Euro

Il-grupp tal-Euro ddiskuta l-euro bħala munita diġitali f'Novembru 2020 wara l-pubblikazzjoni tar-rapport tal-Eurosistema dwar l-euro diġitali. Reġgħu għamlu dan f'April 2021 meta ġew ippreżentati r-riżultati tal-konsultazzjoni pubblika tal-BĊE. F'Marzu 2021, is-Summit tal-Euro appella biex timxi 'l quddiem il-ħidma esploratorja fuq l-introduzzjoni possibbli ta' euro diġitali.

• Euro diġitali (Bank Ċentrali Ewropew)
• Unjoni Ekonomika u Monetarja (informazzjoni ġenerali)
• Finanzi diġitali (informazzjoni ġenerali)

Aktar informazzjoni: